53 Dos alma inseparabel

‘Tabata mi mihó amigu. Den un forma kruel, mi a pèrd’é.’ Kathie tabata konta su sikiatra. ‘Nos tabata konosé otro for di chikitu na skol di fundeshi. Mas aña pasa, mas será nos tabata ku otro. Dandjo tabata un mucha hòmber lif, alegre i alabes ketu. Nos tabata kompartí alegria i tristesa ku otro. Nos tabata kompañá otro bayendo tur kaminda. Tempu a pasa, i ya nos tabata den e delaster klas na VWO. Dandjo a kuminsá duna mi gesto bunita, yuda mi mas intensivo ku tarea di skol, i el a bira mas kariñoso. Tabata parse ku e tabatin algu di bisa mi, pero e no a bisa mi nada. A yega e dia pa mi bai studia na Inglatera. Dandjo a keda studia na Kòrsou mes. Dandjo no a yega ainda pa despedí di mi. Ami tabata buskando Dandjo, mi no a mir’é! Ora a yega. Mi a subi avion. A bin resultá ku Dandjo no tabatin hende pa hib’é aeropuerto. El a kue bùs, i el a kai lat. Dandjo a bira tristu i bai kas bèk ku e karta di despedida ku e tabatin pa mi den su man. Segun aña tabata pasa, nos tabata komuniká ku otro via koreo elektróniko, i te na e momentu ei, Dandjo no a bisa mi nada ku tabatin den e karta ei.

Entre tantu mi a kaba di studia. Mi a bira abogado, i por n mi por a bini Kòrsou bèk serka mi mama i mi amigu Dandjo ku tabata sostené mi. Mi a yega aeropuerto i kue un taksi bai mi kas. Bayendo kas, mi a mira Dandjo, pa mi sorpresa, kanando riba kaya. E tabatin un kamisa blanku i un djins pretu bistí. Un herida na su kabes. Mi a eksitá i para e taksi mesora. Ya asin’ei, mi por a baha, papia kuné i naturalmente bras’é. Su brasa tabata friu apesar ku tabata hasi hopi kalor. E no ker a bisa mi e motibu di e herida mahos na su kabes. El a invitá mi sí pa nos topa na Cinema e siguiente anochi. Mi a bis’é ta bon i mi a despedí di dje pa mi sigui mi ruta pa kas. Dia a bòltu, i mi a mira Dandjo sintá riba un banki den Cinema ta warda mi. Ku e mesun kamisa blanku i e djins pretu. Te ainda e tabatin e herida intakto na su kabes, pero mi a skohe pa no puntr’é nada. Nos a pasa bon maske ora mi a bras’é, su kurpa tabata friu meskos ku e dia anterior. Segun dianan tabata pasa, nos a sigui kontra otro te un dia ku Dandjo no a aparesé riba e dia di nos sita kustumbrá. Mi a keda straño. E kos akí a molestiá mi mashá. No ta hasí di Dandjo. Mi a bai su kas e mes anochi i puntra su mama p’e. Ku masha asombro, Dandjo su mama a kontestá mi ku Dandjo no t’ei. Mi a keda wak e ku un kara sin por keda kla. E mama a bisa mi: bo no sa? Mi a puntr’é, sa kiko? Dandjo su mama a invitá mi e ora ei pa pasa paden, i mesora el a kuminsá konta mi: “For di dia ku bo a bai, Dandjo a bira masha depresivo. Kasi e no tabata kome ni papia ku ningun hende. Tabata un djasabra ku el a bisa mi ku e ta bai sali ku bo i tres amigu mas.

Dandjo no a bini kas bèk. Su siguiente dia mainta, polis a bèl mi i bisa mi ku Dandjo a sufri un teribel aksidente di outo. El a fayesé al instante. No tabatin ningun hende mas huntu kuné. E tabata su so. Den su poder, a haña un bòter di ròm i un karta. Mi a spanta ora mi a tende esaki serka e mama. Mi a kai den un shòk, i a dura un ratu promé ku mi por a konta e mama ku mi sí tabata mira Dandjo regularmente. Tur biaha ku un kamisa blanku i un djins pretu, i un herida na su kabes. Yorando e mama a saka e karta for di un kahita i duna mi pa lesa. Esaki ta e karta ku for di dia bo a bai, Dandjo tabata kana kuné. Ku awa na wowo, mi tabata lesa e karta: Kathie promé ku bo bai, mi ke bisa bo ku di tantu tempu konosiendo bo, mi a kuminsá sinti algu mas ku amistat pa bo. Manera bo mes sa, mi ta un gai masha tímido, i mi no ta’tin kurashi su siente pa bisa bo esaki personalmente. Mi ke pa bo sa ku maske kon leu bo bai, lo bo keda semper den mi kurason i mente. Mi ke pidi bo aseptá mi komo bo frei ora bo ta bèk. Por fabor, no laga e karta akí kibra nos amistat. Si bo kontesta ta ‘nò’, semper lo mi keda bo amigu manera dos alma inseparabel.

Su siguiente dia, mi a bai Cinema manera kustumbrá. Mi ker a komprobá ku mi mes wowo ku Dandjo a pasa pa un mihó bida. Mi a drenta den e sala i bai sinta presis e mes kaminda. Riba e stul kaminda Dandjo sa sinta, pa mi sorpresa, mi a topa ku e kamisa blanku di Dandjo kompañá ku un karta. Mi a kue e karta i les’é: Semper lo mi keda stima bo, te den eternidat manera dos alma inseparabel, mi ta bin buska bo.

Kathie ta puntra su sikiater: ‘Dòkter, ... bo tambe ta kere ku mi ta loko?’

Outor/presentadó: Shardey Martis

VSBO St. Jozef - Klas: 4TA3