E bèrdat di mi sekreto

Mi nòmber ta Jeanie. Mi ta un mucha muhé normal manera tur mucha. Mi gusta siña i eksperensiá kos nobo. Pero mi tin algu ya pa basta tempu wardá ku mi ke bisa. Kon kuminsá, mi no sa.

Amm, laga mi kuminsá asina aki. Tur mucha ta gusta hunga den nan tempu liber. Mi mama semper ta kumpra un Barbi òf un pòpchi pa mi, pero nunka e no ta mira mi hunga kuné. Semper ami ta kore mi baiskel i hunga ku bala i tambe outo. Mama gusta pa mi bisti shimis i saya, pero ami ta rabia, pasó pa mi parti mi bisti djins i kèts so. Na skol ku mi amigunan, mi ta sinti mi bon. Pero e sekreto mi no sa kon pa bisa. Mama lo tuma mi na malu? Mi koalumnonan di klas lo aseptá mi? Nò!! Mi ta keda ketu, mi bida lo kambia demasiado. Pero mi no por mas tampoko, tiki tiki e lo sali mas.

E amiga di Carlos ei ta nèchi, e tin bunita kara i un sonrisa manera or. Bo ta kere, e lo papia ku mi? Mi no tin e kurashi pa enfrent’é. Den klas mi ta sinta wak e só. Nami konta bo algu. Siman pasá, el a sinta banda di mi den klas; m’a sinti mi nèrvioso i mi a kuminsá kanta. Pero mi n’ sa. Ora mi mira kon e ta papia ku Carlos, mi ta haña beis. M’a tende ku Carlos gust’é, pero ami tambe gust’é. Pero mi n’ sa. Mi ke regal’é un or komo símbolo di atmirashon. Pero atrobe mi no sa. Mi tin bèrgwensa. Di ripiente mi ta tende un bos. Uhm, ta kua e bos akí ta?

‘No tin bèrgwensa pa ekspresá ken bo ta. Bo sekso no ta kita ken bo ta! E bèrdat di mi sekreto’

Outor/presentadó: Rodjeska Martina

Ancilla Domini vsbo - klas: 3

Rodjeska ta risibí su premio for di man di Dulvanca Hansen MC i eksganadó di AdP