Lokura paden i pafó

Den un manikomio tin hopi hende loko, pero bo sa unda tin mas tantu hende loko? Pafó.

E manikomio akifó tin hende ku sí ta loko, pero straño ta ku e hendenan ku tambe mester ta den manikomio ta kana rònt huntu ku nos.

Anto pa bo wak, atrobe, loke ku ta straña mi ta ku nos komo pueblo mes no ta nota esaki. Paga bon tinu! Of mihó bo sende bo tinu, i lo bo ripará ku si bo a paga tinu mas tempran, lo b’a realisá ku bo mes t’un loko ratu ratu. Bo ta hasi un par di kos sin pia sin kabes, anto tin algun di nos ku ta asina fresku i dònfustan ku nos ta keda par’ariba ku no ta ko’i hende loko nos a kaba di hasi. Pero bo mes a kab’i splika mi ku b’a kab’i hasié.

Hopi di nos komo hóben ker sa ku loke nos pensa òf bisa ta asina ta, i ku ta asina mester sosodé. Ta mandatario bo ta anto!? Pero nos pueblo ta bisa ku nos komo hóben ta esnan mas loko, pero, señora i mener, ku tur rèspèt, no… Nos tur ta loko! Pasó si boso ta kòrda, ta mes yerba ku kabai ta kome, su yu tambe ta bin kome. Ni kashon, lo bo tin ku pens’é un tiki mas. Pero ata un ñapa, si bo wak bon, loke un yu lanta mira su grandinan hasi, e tambe ta bin hasi despues. Anto wak bon riba e kareteranan di Kòrsou i paga tinu riba e menernan di un tiki edat. Nan ta kore outo asina poko poko ku, segun mi, un morkoi mes ta pasa nan na kaminda. Bosnan ta kòrda Djo 20?

Tin ta kore asina iresponsabel, bula sali dilanti di hende, i tin e tribilidat di kore pa despues esun bin klap den dje ku e speransa di gana, pero a resultá ku el a pèrdè tambe, anto p’un laga bo tin mai bin tende e mener di edat a tribi di baha for di outo, i kuminsá tira kos na laira: He… eh, yὸnkuman, ami n’ ta komprondé di kon bo ta kore dje duru ei. Shonnan, kaminda ta pa kore kita fo’i kaminda pa yega pa kaba. Kore na midí i midi bo tragonan. Balotá bo kansansio, bo soño i… bo lokura. Ku poko mas atenshon, ménos bòrchi ta bai suela.

Outor/presentadó: Ishnarda Sluis

SKAIH – klas 2d