E poder di pakico

Laga mi conta bo e storia di Buster Douglas. Bo por skirbi kico cu ta. Bo por tin e curashi di skirbi tur bo metanan riba un lista. Pero laga mi bisa bo algo: ”Bida ta bay dal bo den bo boca. Haci mi un fabor grandi, bo pakico mester ta mas grandi cu e ’knock out’ ey.”

M’a gusta e pida ey di Buster Douglas, kende Mike Tyson a manda vloer. Nunca niun hende no a haya un ’knock out’ di Mike Tyson, y pio ainda lanta bek. E conteo di dies tabata casi yega, y Buster Douglas tabata lucha, 4 … 3 … 2 … 1, ding, ding, ding. Salba pa e campana. Buster Douglas ta yega na su skina. Henter mundo tabata pensa: Aha, ora e sali bek afo, Mike ta bay djis caba cu ne. Y exactamente esey Mike tabata pensa, ora el a sali. Aki mi tin e. Mi tin e guy aki contra cabuya.

Pa hopi hende, bida tin nan contra cabuya. Bo no por entrega, bo no por admiti. Scucha mi: si e tabata facil, tur hende lo por hacie. Y ora bida tin bo primi contra e cabuya ey, mi kier pa bo haci loke Buster Douglas a haci. El a cuminsa bringa bek. Asina el a sorprende mundo.

E leon a keda benta abou. Kico a pasa? Nan a acerca Buster Douglas, y nan a hacie un pregunta simpel. Nan a puntr’e: ”Kico a pasa? Buster Douglas a contesta: ”Wak, ta hopi simpel. Prome cu mi mama a muri, el a bisa henter mundo cu ami ta bay gana Mike Tyson. Anto dos dia, prome cu e pelea, mi mama a muri.”

Buster Douglas mester a tuma un decision. Y esey tabata cu ora su mama a muri, e por a muri hunto cu ne. Pero el a bisa cu con ansa: ” Mi por lanta y mi por biba pa mi mama.” Y asina el a manda Mike Tyson abou. Knock out! Cada pakico tin su pasobra. Simplemente pasobra su pakico tabata mas grandi cu su mokete. Anto ami ta bisa bo, cu si bo no sa kico bo pakico ta, y si e no ta su cientemente grandi, nan lo benta bo abou cada un dia di bo bida.

Outor/presentadó: Charlie Hill

Ceque College Mavo Aruba – klas 2

Mi ke amor di mi tata

Stè ta un mucha muhé ku a lanta sin tata den kas. Bibando den un bario, kaminda tur tipo di hende ta biba i tur kos ta sosodé. For di chikí, Stè ta bai skol. Semper ta mama so a hib’é. Stè tin deseo ku un dia e tambe por lanta bai skol ku su papa.

Tur dia e mes pregunta ‘Mama unda papa ta?’ E mes frase: ‘Mama, mi ta sinti falta di mi papa!’ Mama di Stè ker wanta e sekreto, pero komo ku nan ta biba riba un isla chikí, esei ta imposibel. Hende por ta gusta redu rib’e lugá akí, di un pa otro, notisia ta kore rib’e isla akí pió ku koriente.

Até! Awe mama a bai buska Stè na skol, i Stè tabata rabiá, e ta yora so den outo. Na kaminda pa kas e no ker papia ku mama. Den mama su kabes, e ta pensa ta kiko por a pasa Stè . Ora nan a yega kas, mama ta puntra Stè ‘Bo ke kome?’ Stè ta kontestá: ‘Nò!’ Mama ta kuminsá zundra: ‘Bo sa kon duru mi ta traha pa tin kuminda akiden, kria bo, anto awor bo tin beis. Mucha di diesun aña ke habri boka manda ku e ke kome sí òf nò, bo tin mi fadá!’

Stè a hisa su kara wak e, baha su kara, i e ta kuminsá papia: ‘Asesino! P’esei bo no por a bisa mi di kon mi no tin tata!’ Mama ta keda wak Stè ku wowo hanchu habrí.

‘B’a mat’é! Wancho a bisa mi ku su mama a bis’é ku bo a mat’é!’

Mama a kuminsá emoshoná i keda sin abla. Stè ta grita: ‘Unda mi tata ta! Tur ora bo ta zundra “Bo sa kon duru mi ta traha pa tin kuminda akiden, kria bo, mucha, bo tin mi fadá!” Pero mama, unda e amor a keda? Komunikashon? Kon ansa? E amor di mi tata!!’

E mama, yorando, ta kontest’é: ‘Mi yu, bo tata ta den shelu, kaminda e ta, e ta bon.’ ‘Shelu? Mi ker bai serka dje awor,’ Stè ta grita. Mama ta bisa: ‘Ora bo pasa for di e mundu akí, lo bo enkontrá ku bo tata.’ ‘Awèl, mata ami tambe!’ Stè ta bis’é. Despues koré Stè a pasa bai pafó. No a dura muchu ku Stè a drenta paden ku furia pa bai baño i ku algu den su man. El a para dilanti spil i kuminsá papia ku su mes. ‘Kon shelu lo ta? E lo tin pais i isla ku awa ta separá? Kisas aya lo mi por kana yega unda ku mi ke? Mi tata, lo mi top’é?’

Iiii pa!

Asina Stè a kometé suisidio. Un despedida asina kruel, lagando su mama atras. E mama arepentí i ku duele na su kurason a keda pensa riba importansia di amor, komunikashon i kon ansa den kas.

Outor/presentadó: Kimberly Vasquez Dominguez

SGB Boneiru (Scholengemeenschap Bonaire) - klas 2

E bida ku a toka ami

Nan no tabata ke mi ... òf a lo ménos, mi mama sí, pero mi tata sigur ku nò! E sinbèrgwensa tabatin manera un rabia riba nos. Sí riba nos.., pasó ta konstantemente e tabata yega kas lat, fuma i tabata harta mi mama ku sla. E gòlpinan tabata keda marká rònt su kurpa. Tur dia di nobo, ami meimei di nan, mester a soportá e gritunan di ousilio di mi mama, sin por a hasi nada. Mi tabata chikitu i débil. Pero kada biaha di nobo, un imágen diferente tabata keda grabá den mi mente, i un parti di odio den mi kurason. Dia tras dia, meskos … ripitishon dje mes novela. Segun e añanan ta bai, i mi ta krese, mi a bira un hóben yená ku odio i deseo di vengansa. Sin amor. Mi no sa ta kiko ta un brasa ni un sunchi di mayor. Mi wela part’i mama mi konosé, pero ta tantu bal. E mama di mi tata, mi no sa mes ta ken. Mi no tin frei... Mi sa mes kon mi tin ku trata nan anto? Nan ta bisa mi ta brutu, sin sintimentu. Pero bo sa, mi por sigurá bo ku no ta asina... Mi tin hopi amor pa duna, ta sa mi no sa kon pa ekspres’é. Nan sa bisa nunka no deseá pa bo ta manera otro. Mi deseo ta pa niun otro pasa manera mi. Di kon, Dios, di kon??? Asina mi por keda bati Bo ku di kon… Di kon mi no por a nase den un otro famia? Di kon mi tata no por a stima ami ku mi mama? Di kon mi bida no por ta manera di abo? Of abo? Di konnnnnnn???

Aunke mi tata ya no t’ei mas, pasó satanas a tum’é den su èrnu, ainda mi no ta trankil. Mi ta sinti un kos paden. Mi tin ku sak’é. Mi tin miedu, mi no ke bah’é riba un robes. Kura mi, bon Dios, sana mi dolor. Kita for di mi bida e renkor.

Hasi mi un hòmber rme i fuerte pa biba segun bo boluntat i honor.

Outor/presentadó: Luigino Molina

SGB(Scholengemeenschap Bonaire) - klas 4