Mi soño a bira realidad

Boso ta corda aña pasa m’a bini cu mi storia ‘Curashi’? Awel, awe m’a bini cu un otro storia yama: Mi soño a bira realidad. Mi ta corda cu mi a conta cu mi no tabatin curashi pa participa na e eleccion di Reina di Carnival di scol. Ni pa mustra tur hende mi talento. Wel, wel, wel! M’a haya curashi y Si! Mi a bay participa pa Reina di Carnaval di mi scol.

M’a prepara pa asina tanto tempo. M’a bay cu e tema ’Explosion di Talento’. M’a presenta mi discurso, y mi a trece dilanti ehempel di entre otro Gwendolyn Brooks: e prome hende muhe di colo cu a haya un premio pa su poemanan y … Bum! Esey a yena mi cu curashi pa presenta mi storia na boso. Mi a sigui cu mi talento di arte y mi a menciona Frida Kahlo, e prome hende muhe cu a revoluciona mundo di arte y a cend’e chispa di creatividad. Y … Bum! Esaki a inspira mi pa traha mi trahe di fantasia. Talento di baile manera esun di Nadia Comăneci, e prome persona na mundo cu a haya un score perfecto di 10 den olimpiada di gimnasio. Cu cada movecion cu el a haci! Y … Bum! Asina mi a logra captura curason di e hurado.

E dia di eleccion mes tawata un dia inolvidabel. M’a gosa, m’a yora, m’a balia, m’a hari. Tabatin momento malo, pero mi tabatin momento hopi bon tambe. E momento mas malo tabata, ora mi mester a warda riba decision di hurado.

E momento mas miho pa mi tabata ora mi a subi riba escenario e prome biaha. M’a saca tur mi energia, y mi tabatin e curashi pa mustra mi talento.

Asina mes! M’a gana e premio di e miho Speech, e miho Disfraz, e miho Show, y mi a bay cu e corona di Reina Hubenil Ceque College 2018. Pero mas tanto, m’a gana un experiencia inolvidabel.

P’esey mi ta bisa boso, laga miedo un banda y bini cu curashi padilanti y haci bo soñonan bira realidad.

Y corda bon publico: Diki t’e triki!

Outor/presentadó: Maria Piternella

Ceque College Aruba - klas 2

Un vakantie cu Anita lo no lubida nunca

Anita, su casa y su yiu a bay riba un yate. Finalmente, nos por disfruta di e solo cayente como un famia. Pero lamentablemente, dos dia mas so, prome cu nos bay cas bek.

”Wel, ami ta bay descansa eybanda un rato … Ay no! Mi ta kere cu mi a drumi mas largo cu mi mester a drumi.” Anita ta core bay den cushina y prepara desayuno hopi lihe.

”Ayo ma, mi ta bay scol.”

”Pero bo no a ni come bo desayuno.”

“M’a trah’e mi mes, mientras cu bo tawata durmiendo.” ”Warda, y bo tata?”

”E ta wardando pafo pa hiba mi scol. Okay, ayo, mi tin cu bay!”

Anita su casa a bay hiba nan yiu scol, awo e ta su so na cas. Anita ta prepara y bay su trabou. Ora e ta drenta e edi cio, tur hende ta keda wak e. Un di su coleganan ta bini cerca dje y puntr’e: ”Anita bo a bisa mi cu e siman aki bo ta bay riba un yate cu bo famia. Kico bo ta haciendo aki anto?”

”Di kico bo ta papiando? Mi a bay caba!”

Su colega no ta contesta nada mas y ta sigui cana. Wel. Esey tawata straño. Anita ta bay den su o cina y cuminsa traha. Ora el a caba di traha, e ta cana bay na e cafetaria banda di su trabou. E ta cumpra un ko e y sinta wak television.

”Señora, esey no ta abo?”, un señora bieu ta puntr’e. ”Si, mi ta wak esey, Pero ami ta aki.”

Anita ta bay su cas den pura.

”No, esaki no por, mi ta corda cu mi a bay cu vakantie y cu nos a landa den lama. Nos a saca potret. Potret. Si!”

Anita ta bay riba su computer den pura.

”Pakico no tin potret?”

Anita ta tira e computer abou kibra.

”Anita, bo ta bon? Lanta lanta!”

Anita ta habri wowo.

”Unda mi ta? Unda mi famia ta?”

”Anita …, nan ta morto, abo ta e unico cu a sobrevivi.

Outor/presentadó: Shantal Marin

John Wesley College Aruba - Klas: 2