E yaya

Luna yen a kaba di sali, e nubianan tabata rondon’é, i kada biaha, un ta pasa tap’é un ratu. Prisca tabata kana p’e bai wak yu pa un señora. Tabata 10 or di anochi, e no konosé e bario ni e señora tampoko. Ta via app, el a mira ku mester di un hende pa wak yu. …Ata… el a yega na e adrès. Tabata un kas grandi, labatina di porta, un señora masha pèrtinènt ku un bistí largu, a habri porta. ‘Bonochi,’ e señora a bisa, ‘ta yùfrou a bini pa wak mi yuchi? Drenta!’ Tabata un kas simpel, aki i aya bo ta mira ko’i hunga di mucha bentá. E señora a mustr’é kushina, pa ora e ke kome òf bebe algu, i tambe na unda e yuchi su kosnan di nesesidat ta. Despues el a bai ku Priska na e kamber, kaminda e yu ta, un lus dòf sendé, i te den huki, bo ta mira un wig. Nan a kana bai na e wig. Ora Priska a wak den e wig, e no a mira un baby ... pero un pòpchi. Asombrá, Priska a bira wak e señora, pero esaki a keda gewon i kuminsá papia ku e pòpchi mané ta un kriatura bibu e ta. E ta bisa e pòpchi: ‘Mama su dushi, kuchi kuchi, esaki ta e señora ku a bini pa wak bo, mama ta bai sali un ratu, anto durante ku mama no t’ei, e yùfrou akí ta tira bista pa bo. Mama no ta keda te lat, tende, dushi.’ El a sunchi e pòpchi na su frenta. Priska a keda wak e señora, i den su mes, e ta bisa: ‘Esaki su kabes no ta bon!’ E señora a hisa kara i bisa Priska: ‘Tin un aparato den su kama, i tambe un den sala, bo por tend’é tur ora. Si e yora, bo sa kaba kiko bo mester hasi.’ Sin a kita wowo for di e señora, Priska a sagudí su kabes.

Poko poko nan a kana bai bèk den sala, sin bisa un pia di palabra. E señora a sali, Priska a sera e porta, i hala un rosea profundo i pensa den su mes: ‘Ta ki’ e kos ku mi a haña mi aden aki?’ Pero despues di un ratu, el a mané bin bei. E di: ‘Nan ta paga mi pa mi wak un pòpchi, hahahaha!’ El a pasa bai kushina kue pòpkòrn i limonada i kuminsá ta app su amigunan pa bisa nan kon idiot, kèns e señora ta. Miéntras ku e ta manda app bai gol, el a tende un zonido straño. Tabata manera un yu ta yora. El a pensa ku ta su imaginashon, pero e yorá ta’ sigui mas fuerte. El a wak rònt di dje. Su bista a kai riba e aparato ku ta den sala. El a bai mas serka, i e no por a kere, e zonido ta bini djei! Sin pensa, el a bai e kamber, e zonido tabata bira mas fuerte. Ora el a wak den e wig, e yoramentu a stòp, i e pòpchi no tabata t’ei. El a kuminsá pensa ku e ta birando loko. El a bira wak rònt …….... aaaaaa! El a spanta ku kasi su kurason a para! Tras di dje tabatin un pòpchi grandi ku su wowonan ta saka kandela. BRAM! …… porta di kamber a dal sera, e pòpchi a kuminsá papia: ‘Awe ta bo bùrt, awe ta bo bùrt!’ Bou di gritu, e tabata kore den kamber, den su pániko, su man a dal riba su telefòn, i esaki a èsh. Sin sa di ki manera, el a hañ’é te den sala, habri porta i sali na kareda bai pafó. Su paña tabata tur kibrá, i e tabata tembla mané bara bèrdè, un machi ku a mir’é, a bini serka dje i puntr’é kiko a pasa. Priska a kont’é e historia. E machi a respond’é: ‘Mi yu, no por ta! Doño di e kas ei a muri 50 aña pasá, fo’i dje dia ei, e kas ei ta para bashí!’

Outor/presentadó: Sendion Balentin

SGB Liseo Boneriano – klas 3