E boto di Moi

Den bario di Lagun, tabata biba un hòmber kurpa kòrtiku, kara seku manera kòrki, ku un bigoti estilo basor’i limpia kaya. Su karakter ta mes òf mas fastioso ku su kara yen di ploi mané parchita k’a hecha di mas. Niun hende no tin lei kuné, pasó e mes tin teima ku tur hende. Su nòmber ta Onchi Federiko Jasinto Petronia de Lus Herado, mihó konosí komo Moi. Aunke e ta kontrali di ‘mooi’. Asta sangura ta hui p’e. Win gagu ta konta algun mucha di bario sintá na toko: ‘Dddden siman ei ooora mi ttttabatata kanando ta bai kas, mi aaa a pasa bbbanda di kurá di Moi, anto mi a haña un mango bbbbentá abou ppp pafó di su kurá. Ora mi mi a sak abou kue e mango, m’a tende Moi su su stèm den palu ta bisa: “Ppp peg’é bèk!” Awèl, laga mi bisa boso,’ Prèkè a lanta para bati pechu bisa: ‘Ami sí no no tin miedu di di Moi.’ ‘Ai Prèkè, bo por stòp di papia ko’i kèns, hòmbu,’ e muchanan ta kontestá. Prèkè ta sigui: ‘Tende aki, mi ta bisa boso: Mañan mainta mi ta lanta tempran bai piska ku boto di Moi sin pidié!’ E muchanan ta bis’é: ‘Ahan sí? Si ta asina machu bo ta sinti bo, dal bai!’

Wèl, su siguiente mainta, Prèkè a lanta tempran, pasa kue su tata su liña di piska, bai playa. Tur e muchanan ku tabata huntu kuné na toko a bin yud’é sende e motor i push’e boto. Brum brum bruuumm, Prèkè a sende e motor, i subi awa kabes pa horizonte. Mir’aki, e muchanan ku a keda kantu tabata mas nèrvioso ku Prèkè mes. No a pasa un ora riba awa, ku Prèke a pega un kos na liña. El a bringa, bringa kuné, te ora el a logra subi asin’un buní. Prèkè kontentu ta bria, anto pa kolmo, riba boto di Moi! Awó, mi ke men, no, b’a kue un piská bunita, bai kantu bèk no! Pero nò, Prèkè tin ku hasi buya, pasa na tur playa promé. Awèl, kos di grasia, a bira desgrasia!

Ora por n, Prèkè a disidí di bai sende motor pa bai kantu bèk, motor no ke sende! ’Esta ko’i bestia, m’a lubidá di wak ta kuantu gasolin tin den e tanki.’ Ora Prèkè a wak, e tanki ta blo bashí, i e no a kue rema tampoko!

A kuminsá bira skur, anto tur piskadó a bini paden masha ora. E muchanan a bira preokupá i laga nèt Win gagu bai bisa Moi loke a pasa. Un eternidat promé ku Win kaba di konta, anto e ke konta ku luho i detaye. ‘Karamba, mucha, bo ta papia hopi, t’un tehi, mi no ke niun karchi pa laba outo, pasó ta Delikado, mi buriku, mi ta kore,’ Moi a bisa. ‘Nò, nò, nò, O.. Onchi Moi, labament’i outo ta pa o.. o.. otro siman, Ta Prè.. Prè.. Prè... Prèkè a subi laman ku Onchi su bo.. bo.. boto, sin bini bèk. Mir’aki, ònchi Moi su kurason por a para. E di ‘Awe sí mi ta mata yu di hende.’ El a yama su primu Pedro p’e a su boto p’e bai kue esun di dje.

Awèl, ora Moi a yega kantu ku Prèkè i su boto, el a kome Prèkè ku sla dilanti di tur e muchanan i e turistanan na playa, anto pasa man kita tur e piskánan for di Prèkè i hib’é te kas pa konta su mayornan loke a pasa. Bo mes sa, na kas tambe Prèkè a haña mas riba dje. Moi mes a kana bai kas, pa skama su piskánan. Despues di e dia ei, a ni kachó no a tribi wou Onchi Moi mas, pero el a siña sí, ku no ta na un kurá so baka muhé a pari toro. Ora bo ta kore bai Lagun, paga tinu rib’un boto koló di bandera poné riba seru.

Si bo ta sintibu asina machu, bai mishi kuné! Despues, ta bo kuenta ku spiritu di Moi. Ala n alafan... e kuenta a kaba!

Outor/presentadó: Gyandro Marselia

MIL - klas: 3