E bèrdat konfesá na porta di San Pedro

Dilanti di San Pedro, dos kriatura ta konfesá e bèrdat ku tin e tres islanan akí paralisá.

Ta asina ku e dos chikitinnan a kore yega na porta di San Pedro i bati dos biaha.

San Pedro a keda straño, ta dos man masha inosente a bati. El a disidí di habri e porta di kas pa wak ta ken a yega na su porta pa interogashon nal kuminsá.

Pero na momentu ku el a habri e porta, el a keda asombrá di mira dos ruman chikí ta para mir’é ku kara masha inosente i wowo hanchu habrí ta eksplorá. El a pasa ku nan na mesa di veredikto nal pa interogashon kuminsá, pero ya e sa kaba kiko hues lo disidí. Mirando ku ta dos chikitin indefenso ku awor a kuminsá eksplorá mundu, inkapas pa kometé maldat ta sintá enfrente di dje.

San Pedro ke sa kon a bai ku e biahe aya na mundu, i pa ki motibu e tabata asina kòrtiku ku ya alma di e chikitinnan akí ta sintá enfrente di dje, i el a bira hasi nan un pregunta.

I mesora e chikitin a kuminsá papia i konfesá. ‘Mi nòmber ta Jackson, mi tin 5 aña, pa di promé amor, kariño, komprenshon i atenshon nunka ami no a risibí. Awèl, San Pedro sa, mi padrastro a maltratá mi, i sla fuerte ta loke mi tabata risibí, doló ku ya mi kurpa chikí no por a risistí. Di ripiente un lus blanku grandi a blèndu mi, i m’a bin haña mi pará dilanti di e porta akí ku indikashon pa bati i duna bo kuenta i rason.’

San Pedro mes ku ta un santu fuerte, ku diariamente ta tende tur tipo di historia, a emoshoná i spantá a bira puntra e ruman chikí di Jackson ku un stèm tur temblá: ‘ I abo?’

‘Ami, San Pedro, ta Mishèl, mi tin 3 aña, i meskos ku a pasa mi ruman a pasa ku mi tambe. Aunke mi tabata stima mi padrastro i mi mama masha hopi mes... tòg, mi tabata haña sla fuerte i maltrato. Nan a dera mi, mi no por a hala rosea mas, i un lus a blèndu mi, i m’a enkontrá mi ruman, i nos a bini aki pa duna kuenta i rason.’

Na mes momentu, San Pedro no a pèrde pa gana, i el a kombertí e dos chikitinnan akí den dos angelito, ku awe ta e dos angelnan ku ta kuida i protehá inosensia di nos muchanan aki na mundu. Leu for di hende sin eskrúpulo, sin konsenshi, ku diaramente ta abusá di un òf otro manera di nos muchanan.

Pa ami esaki tabata djis un storia, pa abo esaki ta un tristu realidat. No bira siegu, surdu i muda p’e, pero lucha pa kombatié.

Stòp ku abusu di mucha!

Outor/presentadó: Kimberly Vasquez Dominguez

SGB MBO Boneiru – klas 2