Angelle Stamper

Cu 12 aña di edad mi a cuminsa skirbi poesia. Mayoria di poesia tabata na Ingles door di in uencia di media social. Na 2007 mi a cuminsa skirbi na Papiamento. Na aña 2009 tabata e di dos aña cu a organisa Arte di Palabra na Aruba. Ora mi a tende di Arte di Palabra na 2009, mi a bira hopi entusiasma pa participa. Mi a scoge e poema “Canando sin destinacion” pa participa cu ne. Mi no a logra bay cu premio, pero tabata un experencia hopi inspirado. For di e momento ey un motivacion inmenso a surgi pa mi sigui skirbi den nos dushi idioma Papiamento.

E aña siguiente, 2010, mi a bolbe participa na Arte di Palabra. E biaha aki mi a presenta mi poema “Garnachi di speransa”. Cu e poema aki mi a sali na e di cuater lugar na Aruba. Esey no tabata su ciente pa bay participa na Corsou. Pa motibo cu un ganador a bay cu dos premio den dos diferente categoria, a resta un luga mas pa un participante bay competi na Corsou. E oportunidad a toca na ami, pa motibo cu mi tabata e siguiente cu e puntuahe mas halto. Na Corsou “Garnachi di speransa” a logra bay cu e di dos luga den categoria di poesia original. Mi tabata sumamente contento cu e premio ey. Mi no a imagina mi di por a yega asina leu mes. Tabata un fuente di inspiracion hopi grandi pa sigui crea y presenta den nos idioma.

Aña 2011 tabata e ultimo aña cu mi lo por a participa na e competencia di Arte di Palabra, pa motibo cu mi mester a bay biba na Hulanda pa sigui cu mi estudio. Mi no a duda di participa un ultimo biaha na Arte di Palabra. “Bo no mag di bay” ta e poema cu mi a scoge pa comparti. Cu e poema aki mi a logra sali na prome luga na Aruba. Un di mi logronan mas keri. Na Corsou mi no a logra bay cu premio pa e poema ey, pero si mi a hiba hopi recuerdo bunita bek cas.

Arte di Palabra a habri hopi porta di oportunidad p’ami. Mi a ricibi diferente invitacion pa presenta mi poesianan na diferente evento cultural, exposicion di arte, evento formal y presentacion di buki.

Tur di nan ta experiencia cu ta laga bunita recuerdonan atras. Tambe na 2011, hunto cu 24 otro hoben, mi a haya reconocemento en conexion cu celebracion di 25 aña di Status Aparte, pa medio di e exposicion “Chikito y simpel bo por ta, pero si respeta”. Parti di e reconocemento tabata cu tur e hobennan a haya un banner grandi cu nan potret riba dje, cu a keda exhibi dilanti di Cas di Cultura Aruba. Den e mesun aña mi a haya invitacion pa presenta un poema tocante libertad na e desvelo di estatua di Anne Frank na Wilhelminapark. Eynan mi a presenta mi poema na Ingles “Freedom within”, cu a cay na agrado di e publico.

Ora cu mi a yega Hulanda, mi a presenta e poema “Freedom within” na un Club meeting di Toastmasters. Esey tabata tin como consecuencia cu mi a ricibi invitacion pa presenta e poema na diferente evento, incluyendo graduacion di un scol secundario Mericano y na un celebracion di Black History na un base militar na Alemania. Na april di aña 2016 mi a logra haya e oportunidad pa bay presencia Arte di Palabra na Corsou. Mi tabata cu vakantie e tempo ey na Aruba y mi a dicidi pa no perde e oportunidad aki. Hunto cu mi ruman nos a bula bay Corsou pa presencia Arte di Palabra ABC. Tabata un experiencia hopi bunita cu hopi recuerdo agradabel.

Arte di Palabra a yuda mi crece na diferente manera como autor na Papiamento, pero tambe na otro idioma. Arte di Palabra tambe a yuda mi duna forma na mi declamacion y presentacion, creando mi identidad artistico dinamico. Semper mi tabata tin e deseo di comparti mi poesia cu publico den forma skirbi. Despues cu mi a coy rumbo pa Hulanda pa mi estudio, mi a dedica gran parti di mi tempo liber pa traha riba un publicacion. Cu ayudo di UNOCA, mi guia literario, autor Munye OduberWinklaar, mi ruman Erienne, e diseñador gra co Irene Peterson, e docentenan, demas famia, amigo- y profesionalnan cu diferente punto di bista, disciplina artistico y literario, mi a debuta na aña 2016 cu mi buki di poesia “Cicatriz di Mirada”. “Cicatriz di Mirada” ta un coleccion di poesia cu mi a skirbi durante un periodo di 10 aña. E ta contene 19 poema na Papiamento, 2 poema na Ingles y 2 poema na Hulandes. Actualmente e buki ta obtenibel na diferente libreria na Aruba y Hulanda.

Arte di Palabra sigur tabata un fuente grandi di inspiracion y motivacion. Mi ta encurasha un y tur, hoben y adulto, pa sigui conkista nan soñonan artistico y literario. Hunto nos por nutri nos cultura y idioma tan stima.

Angelle L. Stamper