Marisela Dip

Te awe mi ta kòrda kon sintá na lèsenar di mi opa, mi a skirbi un poema, ku inisialmente tabata un tarea pa lès di papiamentu. Di un dia pa otro, hopi kòmplimènt, atenshon: ‘Kon bo por a skirbi algu asina?’

Sinseramente, mi no sa, pasó mi bida tabata total otro for di e persona ku ta na palabra den e poema Di kon mi a ignorá?

Yùfrou Jessurun a pidi mi pa deklamá e poema akí durante e kompetensia di Arte di Palabra 2002. Mi a ninga rotundamente! Ami? Dilanti di un multitut di hende? Hamas! Mi tabata un mucha masha tímido, ku bèrgwensa i poko kurashi, ku tabata preferá di ta djis su so òf ku su mihó amiga i famia.

E éksito di Di kon mi a ignorá tabata inkreibel. Geisha Naut, mi amiga, ku ta esun ku a deklam’é, a hasi un trabou fantástiko, i no opstante ku nos a sali na di dos lugá, te awe e poema ta resoná. Te ku último ei, un konosí a saka un portrèt na sentro di bario Janwe, kaminda un poster di e poema ta kologá for di 2002.

Despues di Di kon mi a ignorá, mi no a sigui skirbi di forma aktivo, pero aki i aya mi ta pone mi sentimentunan riba papel òf mi ta hunga ku palabra, sea na papiamentu òf na ingles. Kisas ta ora pa kuminsá bek kaminda mi a keda?

Arte di Palabra a habri porta p’ami, pa mi kurashi, pa para tras di mi kreashon, pa ta orguyoso di mi mes i di mi logronan. Te asta ku di e mucha tímido i ku bèrgwensa, apénas a keda algu atras. Pa kasi dos aña, mi a dirigí un programa na radio di forma oudiovisual pa míles di hende mira i skucha.

Arte di Palabra a hiba mi leu. Un di mi outornan faborito, Paulo Coelho, a bis’é bon: ‘Bisa bo kurason, ku miedu di sufri ta pió ku sufrimentu mes.’

Mi a realisá ku e opstákulo di mas grandi den bida ta bo mes.