Mari-Stella Koeiman

Algun palabra en konekshon ku selebrashon di 20 aña Arte di Palabra.

Ami, Mari-Stella Koeiman, un dama hóben di awor 27 aña, nasé na Kòrsou 14 di desèmber 1990. Mi ta un hende semper energétiko, positivo i optimista. Mi gusta ekspresá mi mes ku mi bos di un forma semper sigur di mi mes i amistoso unda ku mi ta.

For di edat hóben, mi mama a mira ku mi tin kurashi i hopi talento, i mesora el a laga mi forma parti di un kor di hóben na misa di Sta. Maria, kaminda mi a desaroyá mi talento di kanto. Mi a bishitá e skolnan Maria Auxiliadora, Stella Maris i VSBO St. Jozef. Na Stella Maris College, mi a haña e oportunidat pa partisipá pa promé bes na Arte di Palabra. Esaki tabata na 2006. Aki mi a partisipá den e kategoria di kuenta eksistente ku e kuenta E hòmber Chikí, i mi a sali na di dos lugá.

Na 2007, mi a bai VSBO St. Jozef, i mi a partisipá na elekshon Rei i Reina Tiner, i mi a sali ganadó apsoluto di Reina Tiner 2007.

Na 2007, mi a partisipá un biaha mas na Arte di Palabra den e kategoria di kuenta original ku mi propio kuenta Wela skèrchi.

E biaha akí, mi a sali na promé lugá. E premio tabata un biahe di interkambio kultural pa Boneiru, kaminda nos a presentá na Kas di Arte na Playa.

Na 2008, mi a kompetí tambe pa Reina di Deporte, i mi a sali di 3 nalista.

Na 2010, mi a partisipá na Reina Karnaval, representando mi grupo di karnaval. Aunke mi no a sali den premio, mi a keda masha kontentu ku Monique Felida (q.e.p.d.) a guia i prepará mi presentashonnan.

Ku tur mi kurashi, talento, inteligensia i abilidat, mi a sigui lucha te ku awor mi ta lokutora na un Radio Lokal Telecuraçao

FM 93.3. Kondusiendo mi progama tan gustá GOSTOSO di djaluna pa djabièrnè di 9 pa 12 or’.

Mi ta kòrda semper na unda mi a kuminsá mi karera, i esaki ta na ARTE di PALABRA.

Waauww...pabien ku 20 aña di Arte di PALABRA.

Mari-Stella Koeiman