Zarauztik Oriora ibilbidea

Zarauztik Oriora

Zarauzko sarreran dagoen biribilgunearen ondotik aterako gara eta Talaimendirako bidea hartuko dugu, seinaleak jarraituz. Etxeen artetik igoko gara, espaloitik eta minutu batzuen buruan biribilgune batera iritsiko gara. Ezkerretarantz jarraituko dugu, aldapan gora.

Hamar minutu inguruko ibilbidea daramagunean, espaloia bukatu egingo da eta errepide ertzetik jarraituko dugu gorantz. Beste hamar minutuan Talai mendiko gainera iritsiko gara, hemendik aurrera bideak beherantz egingo du, txakolinen artetik. Ibilbidea hasi eta berrogei minututan gutxi gora behera, Oriora iritsiko gara, Oribazar hondartzara. Hemendik, ezkerrerantz kai-muturrera joango gara, eta eskuinerantz, herriranzko bidea hartuko dugu.

Berehala autobidearen zubiaren azpitik pasako gara eta aurrerantz eginez, Zarautz eta Orio elkartzen dituen errepidera iritsiko gara, ordu beteko ibilaldiaren ondoren. Ezkerretarantz joko dugu, eta hamar minutu inguruan Orioko herri-gunera iritsiko gara.

Iraupena: 1 h.

Zailtasuna: erraza

Desnibela: 90 m.

Distantzia: 4,9 km. Irteera: Zarautz

Inguruan

Iñurritzako biotopoa. ··· Núñez

Núñez

Iñurritzako biotopoa

Zarauzko herri-gunearen ondoan dago Iñurritzako babestutako biotopoa. Euskadiko duna gune zabalena eta hoberen kontserbatu dena da. Zarauzko hondartzaren amaieran eta itsasadarraren artean dago kokatuta. Nahiz eta egun biotopoaren zati handi bat golf kanpoaren barruan egon, oraindik ere elementu ugari kontserbatzen ditu, hala nola, dunak, arrokak, padura eta estuarioa, eta ekosistema bakoitzari egokitutako landare eta fauna mota ezberdinak hartzen ditu.

Mutiozabal ontziola. ··· Núñez

Núñez

Mutiozabal ontziola

Garai batean Orion zeuden zortzi ontzioletako azkena da Mutiozabal. Antonio Mutiozabalek sortu zuen ontziola 1919 urtean, aitonagandik jasotako enpresa jarraituz, eta udaletxearen aurreko itsasbazterrean dago kokatuta. Itsasontziez gain, kontserbak eta altzariak ere egin zituen Antonio Mutiozabalek Gipuzkoako itsasertzeko azken ontziola da, XX. mendearen azken hamarkadara arte egurrezko ontziak egiten aritu zena. Urteetan utzita egon ondoren, egun berreskuratzeko bidean da Orioko udalak hasitako proiektu batekin.

Orioko ikuspegia . ··· Núñez

Núñez

Orio

Orio hasiera batean Donostiaren menpe zegoen portuherrixka zen, San Nikolas elizaren inguruan kokatuta zegoena. 1180 urtean jada baziren biztanleak Orion, baina hiribildua ez zen sortu 1379 urtera arte. Ospetsuak izan dira mendeetan herriko balea-ehiztariak, XVI. mendeak Europako onenak zirenak. Bertatik igarotzen da ere Kostako Santiago Bidea. Erromesek itsasadarraren bestaldera, Zarautzera, igarotzen zen ontzia ez zeukaten ordaindu beharrik.

San Pablo ermita. ···Núñez

Núñez

San Pablo ermita

Oriotik Zarautza doan errepidearen alboan dago San Pablo baseliza, izatez Aiako herri-lurretan. 1802 urtean jada aipatzen da baseliza. 1933 urtera arte Altxerri baserriaren ondoan zegoen, baina errepidea zabaldu zenean, harriz-harri gaur egungo kokalekura eraman zen. San Pabloren irudi batek osatzen du erretaula. Pablo Churruca y Plaza eta Maria C. Azlor de Aragon senar-emazteek, San Felices-ko markesek, eman zien dohaintzan ermita Aiako herritarrei, kanpoaldeak dagoen oroigarriak zehazten duen moduan.