uážžoo nuuvtá

sponsoristem juátkoo ive 2022

Čällee: Fabrizio Brecciaroli

Peerâ Hotels & Cottages sponsorist Anarâškielâ servi meiddei ive 2022. Koronapandemia keežild ihe 2021 ij lamaš táválâš toimâihe, já tondiet sponsoristem juátkoo vala oovtâ ive. Tastmaŋa finnodâh väljee mottoom eres seervi tâi ornijdume, tastko sij halijdeh tuárjuđ täsipiälásávt ubâ sämisiärváduv. Ulmen sist lii ain skeŋkkiđ 10 senttid jyehi hooteelijâstâlmist puoh Peerâ Hotels & Cottages hotellijn: Hotelli Sodankylä Suáđigil markkânist, Kartanohotelli Karolineburg Kajaanist, Budget Hotel Raahe Raahest, Tietotunturi Kelovilla Pyhätunturist já Peurasuvanto Mökit & Camping Suáđigil kieldâst.

Kuovâmáánu 9. peeivi Anarâškielâ seervi mediapargee Fabrizio Brecciaroli já stiivrâ värijeessân Anja Kaarret eelijn Suáđigilist viežžâmin ive 2021 sponsoristemruuđâid, moh lijjii ohtsis 1 520 eurod. Sunnuu lasseen tilálâšvuotân uásálistii Inarilainen-loostâ toimâtteijee Leena Klemi-Lohiniva sehe Peerâ Hotels & Cottages toimâttâshovdâ Hilla-Rina Palokari já vyebdimhovdâ Niina Hilarto. Juurdân lii kevttiđ ubâ skeŋkkejum sume kiirjij kuástidmân. Servi kijttá ruđâlii torjust.

Fabrizio Brecciaroli já Hilla-Rina Palokari (Kove: Anja Kaarret)