iveäigi

Evakkotáálu suáđi ääigi (Kove: Matti Valle)

Kuácámân ko moonnim, te roovvâdmánudist miäštár iätá, et muoi vyelgeen puáttee ohhoost Lohinivan tondiet ko tobbeen álgá šaldetyeji. Nuuvt moonáim Ounasjuuvâ riidon. Šaldeest koolgâi šoddâđ 150 meetterid kukke, 7 meetterid kubduv, kyehti koskâcage virdeest. Šalde lâi nuuvtkočodum lohtâpalkkišalde, ooliš ryevdibeetoonlokke, čäci- já beetoonsyeji ovdil keđgiasfalt. Ävđintálo, mii lâi lamaš paŋkki, laiguuttijm aassâmpäikkin. Nuuvt tyeji pyereest ovdánškuođij. Vuosmuš virdecagge ko lâi vaalmâš, te Paavo iätá: – Tääl Perusyhtymä firma ij lah innig. Tääl mij lep Rakennusvoima-nommâsii firmaast puáris tyejilâžžân.

Paasij tuše olgoeennâm uási, já tom-uv oostij YIT 28.11.1988 talle ko mun lijjim Leningradist. Lohiniva šalde valmâštui syeinimáánud loopâst 1985. Ton ive lijjii ennuv luámáneh. Tiegâs lijjim Kittâlist K-Market vijđedemtyejeest, Ruávinjaargâst postâtáálu vijđedemtyejeest já Kemi Ajosist muorâkuškâdemrakânâs rähtimist. Nuuvt uđđâivemáánud loopâst tyeji lâi vaalmâš. Te tyejiuáiváámus iätá:

– Tääl vyelgip págguluámun, ij lah tiäđust uđđâ tyeji.

Nuuvt mun vyeijilim nube peeivi Njellimân. Talle lâi ihe 1987 já vyesimánudist vuolgim Leningradin Astoria já Angleterre hotellij tuáján. Toh mainâseh láá lamaš Anarâš loostâst syeinimáánu 2015 numerist já juovlâmáánu 2015 numerist.

Kalehân rakânâsalmai uáiná ennuv uđđâ paaihijd, šaddeh ennuv uápis ulmuuh ige ohtâgin tyejipeivi lah siämmáálágán.

Evakkotáálu ive 1973 (Kove: Matti Valle)