om. SOS

perusyhtymä-firmaast

Čällee: Matti Valle

Suomâ Sukkâr lâi uástám eennâm Solojäävri máddáábeln alda uáivuš eennâm, já poorá kiäčán koolgâi pelkkahiirsâin sälviđ tuodârviäsu. Syeinimáánu vuosmuu vuossargâiiđeed muoi viljâpeelijn vyeijiláim tuáján. Vuáđutyejeh lijjii álgám. Mottoom peeivi keččin pottii hirssâsälveeh. Hiirsâid lâi Meccihaldâttâs nuurrâm Torkočielgist, já toh lijjii sáhhájum já stapâlistum ovdebáá keesi. Kossâ hiirsah toh lijjii. Veeskir, kievkkân já orroomviste puátih porekiäčán já eres visteh láá vuálus vielti, vyelemusân šadda sävni já porthááh. Solojäävri riidon kalgeh vala riddosävni já kärbisruggâ. Miästárin lâi insner Paavo Flygare. Sun lâi Oulust puáttám teehin. Mij aasâim Anarist Ranta-Máárjá mooteel pajekeerdist kyevti visteest.

Nube ohhoost hirssâsälveeh pottii tuáján já seeinih paijaanškuottii. Káátuid aalgijm rähtiđ. Irján Antero poođij poccee já täähi muvráđ. Laasâid pieijii sajasis. Roovvâdmáánnud loopâst leim šiev muddoost. Šiiljon poorájii kááivu já ton pirrâ vala hiirsâin mahte äitti teikâ vuárkká tyejiniävui várás.

Skammâmánudist pottii muotâalmeh, te mij peetijm, et kyeđđip tyejieennâm táálván já juátkip kiđđuv Válburpeeivi maŋa. Miäštár eeđâi muin, et moonah nube peivi juovlâmáánnud autoškoovlân já uástáh auto, maid tun puátteevuođâst tarbâšah. Nuuvt mun moonnim autoškoovlân. Koortâ finnejim ovdil juovlâi. Ostim kevttum auto já vuoijim Njellimân. Eeči tállán civhádij:

– Lah autoškoovlân moonnâm já auto uástám. Maid ááiguh toin porgâđ? Taan šiljoost tot ij lah oovtâgin iijâ.

– Taat äššihân lii nuuvt, et tun jieh muu pargoid meerrid. Jiemge mun tust love koijâd. Muštáh-uv ollágin, mon räävis mun lam?

Nuuvt vyeijilim maassâd Avelân. Válburpeeivi maŋa joođhijm Solojäävri kesiviäsu rähtim. Tothân lâi porgemáánu loppâ, ovdil ko puoh lâi vaalmâš.

Uđđâivemánudist vyeijilim šaldetuáján Ruávinjaargân. Lâi puolâštälvi. Ko nube keesi šalde lâi vaalmâš, te vuobdim auto Konelan já kirdim Oulun. Tast miäštáráin vuolgijm suu autoin Mäntsälän. Tobbeen lâi 103 meetter kukke vuovdâpalkki beetoonšalde koške eennâm ramppišalde, mon vuormâ lâi račohánnáá. Vyele koolgâi moonnâđ väldiluoddâ 4, mut esken lijjii njaajâ kuáivumin luoddâvuáđust já sajan vuoijii keđgijuovâ. Lâi eehid ohtnubáloh ovdil ko láim Mäntsäläst. Mottoom parakist lâi almai. Miäštár paasij toimâttâhân. Mun moonnim almaa skipárin nube parakin. Tyejeest kullojii lemin meid ávusfaŋgâl 8 faŋgâd. Sii tyejiäigi lâi oovcest pel niälján. Iđedist puohtii já ehidist viežžii maassâd. Oholoopâin muoi Paavoin láim kost kuás ain Helsigist, Olympiastadionist maailmkištoid keččâmin. Maŋgii eelijm Hyvinkää Sveitsist. Ohtii tobbeen lâi Danny já Armi show.

Nuuvt tot tyeji nuuvâi. Muu kiäsuttâllii vyelgiđ Helsigân Pohjois- já Etelä-Kontula källeesuojijn álgám sistepiällásijd tuojijd. Jurdâččim, et peesâmhân mun meddâl vyelgiđ jis lii aaibâs máhđuttem tyejipäikki. Tobbeen kullui lemin Maati Saammâl-uv tyejeest. Täin suojijn kolgii rähtiđ aatoompoomi várás syeijin ohtsis 13 400 ulmui, tommit vissâ-uv lijjii talle Kontulast ässeeh. Laavtâs já tuolvii tobbeen källee siste lâi áimu. Almaah iä pissoom tyejeest. Talle mun iberdim, mane muu nuuvt halijdii teehin tuáján.