monâttiđ pargoos

Puáris visteh Ijjäävrist ive 1932 Kove: Günter Thaer, Museovirasto (CC by 4.0)

Paaihij nabdem teoriast

Puoh kielâkevttein lii máttu nabdeđ paaihijd olmânáál. Talle ko páárnáš uáppá sárnuđ, te sun uáppá siämmást meiddei nommâkielâoopâ. Tot meerhâš, et sun tobdá já iärut noomâid eres kielâ saanijn sehe máttá kevttiđ taid já jieš rähtiđ uđđâ noomâid. Tagareh päikkinoomah, moh oroh ovtâskâs ulmuu áinookiärdásâš hutkosin, čuávuh távjá viehâ tárkká ton kielâ nommâkielâoopâ, mon olmooš sárnu jieijâs eenikiellân. Sun lii tieđehánnáá arbim tom jieijâs kielâ já kulttuur uássin.

Nommâkielâoopâ vuáđđun láá toh noomah, maid olmooš tobdá. Uási tain sun kiävttá piäiválávt, uási tuš tyellitälli. Mut nommâkielâoppâ meid muttoo aaigij mield. Puáris noomah láppojeh aanoost teikâ muttojeh, ovdâmerkkân uánáneh teikâ tain tábáhtuveh eres nubástusah. Toi mield nommâkielâoopâst puáhtá lappuđ miinii jiešvuođâid teikâ saanijd, mii lii lamaš tovle táválâš. Uđđâ noomah šaddeh toi sajan. Tain pyehtih leđe vaikuttâsah eres kielâin teikâ noomâi nabdemmuoti puáhtá nubástuđ monnii suujâst.

Motomin kielâkevtteeh láá kreatiivliih teikâ mudoi lijkkojeh kieláin sierâdmân. Talle mottoom uđđâ päikkinommâ puáhtá-uv leđe nobdum aaibâs uđđâ vuovvijn: uđđâ päikkinoomâst lii miinii kielâlijd innovaatioid. Motomin taggaar uđâsmittem páácá nommâkielâoopâ pisovâš uássin, motomin tot láppoo jotelávt aanoost. Taggaar uđâsmittem puáhtá pissoođ páihálâžžân teikâ leevvânškyettiđ vijđásubbooht. Aaigij mield oovtâ kielâkevttee kreatiivlâš idea puáhtá-uv šoddâđ kuávlukielâid teikâ kielâid iärutteijee nommâkielâoopâ uássin.

Puoh päikkinoomah iä ele hirmâd kuhháá. Motomin päikkinommâ lii adelum uccâ páihážân, iäge tom keevti hirmâd stuorrâ olmoošjuávhuh. Tagareh noomah iä laavii peessâđ káártán iäge toi innovatiivliih