kilomeetter (uán

Teedâ killájijjee uuvsah (Kove: Matti Valle)

Aassâmskippáár lâi Humppilast, te iätá mottoom oho keččin vyelgiđ Humppilan oholoopân. Nuuvt mun jođeškuottim tobbeen. Sust lâi táálu, kálgu já nieidâ. Sust kullui lemin viljâinis Petsikkojuhâpiällást kesitupe. Tääl-uv vala ko sij láá jotemin keessiv tohon, te ratkuustâleh muu kolliimin. Paijeel kyehti ive tot Helsigist aassâm piištij, ko miäštár mottoom iiđeed puátá muu kuuvl já iätá, et lii Paavo suáittám já kolgâččij Matti vyelgiđ Tornion šaldetuáján. Kalehân tääbbin leim tuu tarbâšiđ, mut jieš tun tiäđáh maid poorgah. Nube peeivi eehid vuolgim ryevdirađe sajattâhân já ostim uáđđimsaje Ruávinjaargâ junán.

Tääl lijjim juná seeŋgâst já lâi äigi smiettâđ jyehimuđusijd aašijd. Iđedist ko lijjim Ruávinjaargâst, te ostim oppeet auto já vyeijilim Tornion. Šaldesajan ko vuojijm, te ohtâ auto tobbeen lâi toimâttâhkoopi paaldâst. Uuvsâ ko lehâstim, te Paavo lâi eidu vyelgimin Tornio Putaan keččâđ oovtâ táálust aassâmsaje. Muoi vuolgijm tohon. Tohon munnui kavnui aassâmsaje. Tot šalde ij lamaš kukke. Suullân 50 meetterid lâi ohtâ koskâcagge virdeest. Šalde valmâštui kesimáánnud loopâst. Aalgij kesiluámu kuhes ááigán. Kale lâi hitruu vyelgiđ luámun Sulgušjáávrán.

Porgemáánnud aalgâst vyeijilim Ylivieskan. Kyelijuuhân älgih rähtiđ Hamarikuoškân čäcivyeimilájádâs 6 já 1,5 MW turbiinijd, puáđu sehe tulveluŋká. Munhân lijjim lamaš ive puárisin ennijn evakkost 5 km Sievin mannee luoddâpiällást uálgiskieđâbeln luodâ. Tyejipääihist lijjii kulmâ tyejijođettijjee, miste lijjii laiguuttum muáddi aassâmviste. Ohtii poođij táluiššeed. Te iätá:

– Kolgâvetteđ mutteđ kiirjijd teehin. Tij asâvetteđ lavâttemeht.

Tontovváá sun kuođij mii ráávhun. Mottoom lávurduv mun vuolgim uuccâđ evakkoaassâmtálo. Hiälpust mun tom kavnim. Ävđin neevtij šiljo lamaš kuhes ääigi. Koijâdellim tááluin, tietih-uv maiden tálo ässein. Loopâst kavnui almai, kiäst lâi čoovdâ. Vuolgijm eelliđ siste. Stuorrâ tupekievkkân lâi tyehin, kyehti káámmár. Nubebeln lâi ohtuunis káámmár. Täst muu enni lâi muin aassâm. Maarit-Piättár Selma kuovttijn kandáin aasâi stuárráb kámárist. Kuusah táán tááloost láá lamaš. Mielkki já vuojâ kuittâg lii lamaš. Talle iä evakkoliih tiättám, vala-uv peessih kuássin maassâd. Suovâsävni lâi. Kossâ kuosâ tálo tyehin še lâi, mii eeni mield talle jo lâi kossuv. Nube keesi porgemáánnud aalgâst vuolgim luámun, já luámu maŋa vuolgim Kuácámân K 70 luáhá rähtimtuáján.

Informaatiotavlu (Kove: Matti Valle)