Uáivičaalâ

fabrizio.brecciaroli@gmail.com +358 41 713 2612

KUÁSTIDEIJEE:

www.anaraskielaservi.fi

MÁCCUM:

susanna kaartinen

susanna.kaartinen@gmail.com

ČÁÁLLUP ANARŠKIELÂN!

Onnáá peeivi anarâškielâ várás lii huksejuumin noonâ luuhâm- já čäällimkulttuur. Anarâšâin lii vuoigâdvuotâ luuhâđ já čäälliđ jieijâs kielân, já sij láá-uv tääl čäliškuáttám äŋgirávt. Jieškote-uvlágán teevstâi täärhistmist já njuálguluhâmist lii šoddâm stuorrâ já tehálâš uási Anarâškielâ seervi tooimâst. Muáddi uđđâ kirje almostuveh jyehi ive, já anarâškielâlâš Wikipedia ovdán já vijđán jotelávt.

Anarâškielâ sárnoi iäljáruššâm čällen uáinoo meiddei lostâtooimâst. Taan tove čalluuh láá puáttám käävci ulmust, mii lii ulâttâs Lostâžân. Já vuossâmuš čaalâ lii-uv uđđâ anarâškielâ luuhâm- já čäällimkuursâst, mon Iida lii máttááttâm taan kiiđâ Säämi máttááttâskuávdáást (SMK). Kuursâ ulmen lii lamaš ruokâsmittiđ ulmuid čäälliđ eenâb anarâškielân.

Kielâ já kulttuur iäláskittem ij kuittâgin kuoskâ tuše anarâšâi siärvádâhân. Taankiärdásii numerist mij peessâp uápásmuđ udmurtkielâ- já kulttuuraktivist Avgustinan, kiäm Tomi lii sahhiittâllâm Lostii várás. Avgustina muštâl mijjân tast, kii sun lii já maid sun parga, sehe Daur TV:st, mii lii vuossâmuš udmurtkielâlâš viermitelkkarkanava.

Taan Lostiist mij uážžup luuhâđ meiddei Čuoivâg já Jievjâ -nommâsijn vuosijn já toi feeriimijn Sáárákáisá perruu kulen Pärttihist. Tastmaŋa Tiina čáálá jieijâs vistešaddoin Helsigist já čielgee mijjân, maht sun tipšo taid. Majemui pandemiaiivij ääigi vistešadoi tipšomist lii šoddâm pivnohis puđâldâs, já meiddei Lostii lohheeh pyehtih vissásávt ávhástâllâđ Tiina ravvuiguin.

Tääl ko anarâškielâst láá eenâb sárnooh, kiäh láá meddâl teikâ ääsih olgoenâmijn, te Lostii peht mij peessâp ain uápásmuđ jyehilágán staatáid já kaavpugáid. Taan tove Hana oovdânpuáhtá Praha kaavpug, kost sun aasâi nelji ive. Ton lasseen Jasmina čáálá Saksa viiđâd iveääigist ađai karnevaalist.

Já loopâst Henna juátká jieijâs kirjeárvuštâllâmrááiđu. Taan tove Henna árvuštâl taggaar kirje ko Masa jo Mánudáást, mon lii čáállám Márjá-Liisá Olthuis. Tot lii vuossâmuš sämikielâg scifi-roomaan, já tondiet meiddei tehálâš lävkki ovdâskulij anarâškielâ noonâ luuhâm- já čäällimkulttuur huksiimist.

Fabrizio Brecciaroli