Uárbis vyesih Čuoivâg já Jievjâ, Sáárákáisá Seurujärvi

Lättee lii kyepiráid njalahâs, mut tot ij Jievjâ iästám, ko šadoh láá uáli jo mielâkiddiivááh.

UÁRBIS VYESIH ČUOIVÂG JÁ JIEVJÂ

Tekstâ já koveh: Sáárákáisá Seurujärvi

Kiđđuv 2021 muu peerâ vaaldij pááikán kyehti uárbis oresvyesi. Nube vyesi áldu ij hoittám já nube vyesi áldu lâi šoddâdâm jyemeháid, ige tast lamaš táiđu teikkâ asto hoittáđ kuohtuid.

Vyesih ko poođijn mii pááikán, te ij kihheen lamaš vises, ete eelliv-uv toh mon kuhháá. Ige kihheen tuostâm adeliđ vuossijd noomâidgin, ko jis ellest lii nommâ, te talle toos rähistuvá liijgás älkkeht ige talle tast viišâ luoppâđ. Mij talle nomâttijm vuosijd soksâmij mield. Nubbe lâi čuoivâg já nubbe lâi jievjâ. Veikkâ taah vyesiriävuh passijn eelliđ, te toh iävá finnim ubâ olmâ noomâid. Taan-uv peeivi toh lává tuše Čuoivâg já Jievjâ.

Vuosijd koolgâi piemmâđ puttâláin motomijd ohoid moddii iijâst. Ton ääigi lâi táválâš uáinu, ete kiinii muu perrust lâi lättest uáđimin, veikkâ sohvá lâi meetter keččin. Mun-uv oođđim lättest aainâs-uv oovtâ iijâ já pággu mieđettiđ, ete tot ij lamaš hirmâd šiev saje uáđđiđ.

Vyesih assáin táálu siste oovtâ mánuppaje, já mij tuálvuim taid maŋgii peeivist olgos. Tuáivu lâi, ete vyesih paškaččáin já cisâččáin olgos, mut tun tiäđáh nuorâ elleid. Iävá toh lah perustum tast, kost toh hoittáv hiivsigeeđees.

Oovtâ muddoost keesi vyesih lijkkuin viälláđ olgouuvsâi tyehin, já talle ain koolgâi várugávt lekkâđ uuvsâ. Muu uábbi čaalij uuksân laapu mast luuvâi “Váárut vuosijd!” já kiinii eres lâi lasettâm maŋeláá siämmáá laapun “Toh volliittává!”. Iävá toh luhhoost volliittâm, mut viälláin nuuvt kuhháá uuvsâ vuástá, et vijmâg lâi pággu sirduđ meddâl oovdâst.

Ko lijjii pakkâsumos peeivih, te mij aalgijm tuálvuđ vuosijd juuhân käälliđ já čuáskuttâllâđ. Toh čuávoin mielâstis čáácán eromâšávt talle ko ulmust lâi mielkkiputtâl fáárust. Talle mij piemâim vuosijd čääsist. Tot lâi ulmuid-uv pyeri vyehi čuáskuttâllâđ. Motomin ko kiinii eelij vuojâdmin, te eromâšávt Jievjâ vuolgij vuoijâđ maajeeld. Vyesi vissâ juurdij, ete ulmust lâi puttâl fáárust já sun halijdij tiäđust-uv mielhi.

Vyesih ko šoodáin stuárráábin já algijn jotteeđ iäváge toh tuše pissoom mii táálu aldasijn, te toh kavnáin muu ááhu šiljo. Tobbeen vuosijn lâi-uv juhlepevdi! Toh puuráin ááhu raasijd já šaddoid, maid jo kavnáin, já te koolgâi ceggiđ ááhu šiiljon ääiđi, amas toh puoh raasijd puurrâđ.

Tääl 2022 täälvi já kiđđâtäälvi Čuoivâg já Jievjâ lává lamaš eres poccuigijn ääiđist. Muu uábbi ain tyellitälli luáštá vuosijd piäiván ääiđist olgos, te vyesikyevtis pyehtiv uuccâđ jieijâs purrâmâš já jotteeđ. Táválávt toiguin joteh motomeh eres-uv poccuuh, maid muu uábbi koččo pärnivahtân. Talle ko lii eehidpiemmâm äigi, te muu uábbi viäžžá vuosijd maasâd ááiđán já addel pärnivavttáid váhá fuođârijd pälkkin.

Vala ij lah tiätu, maggaar puátteevuotâ vuárdá Čuoivâg já Jievjâ. Aainâs-uv toh pääcciv vissásávt juurrâđ mii pääihi alda pirrâ ihán. Táválávt áálduh maneh keessiv miäcán, iäge mudoigin nuuvt äŋgirlávt oro päikkipuásujin, mut sarvah já späiliheh joreh ennuv pääihi alda. Uážžu uáiniđ, maid Čuoivâg já Jievjâ porgâv, mut oskoččim, ete toh pissoov ain päikkipuásujin.

Paijeen: Jussá Seurujärvi uáđimin lättest, ko sun lii koccáám iijâ vuosijgijn já piemmâm taid.

Kaskoo: Jievjâ já Čuoivâg šiettáin pyereest pennuu madrâs oolâ.

Vyellin: Šiljoost ij puáhtám porgâđ maiden ohtuu. Vyesih tuđháin ain, maid kiinii pargeeld.

Paijeen: Vyesih láá šoddâm pyereest já styeresin, iäváge toh lah raavzah.

Vyellin: Válburpeeivi kunnen Máiju Siggá Seurujärvi máálái vááimuid vuosij pootân ruopsisruotâssappijn.