1. Prinzips generai dla normazion

A. FONETICA y ORTOGRAFIA

1. Prinzips generai dla normazion

L ladin standard (LS) se baseia sun l sistem de scritura che vegn da deplù agn adoré sot l inom de “grafia unitara” te duc i idioms ladins entourn l Sela. La gran maioranza di segns grafics à donca tl standard l medem valour che ti idioms. Purempò él n valgunes desferenzies emportantes anter chisc y l ladin standard desche al vegn descrit te chesta gramatica. I idioms de valeda y si dialec vegn plu che auter adorés “a ousc viva”, y sia ortografia à la funzion de simbolisé chesta realté fonetica. L ladin standard endere é n lingaz scrit destiné en pruma linia a vegnì liet “a uedl”. Sia grafia ne raprejenteia nia n lingaz rejoné bele esistent, ma n sistem de sons plu astrat o ‘virtual’, che é ence a la basa di desferenc idioms ladins. N tel sistem astrat che raprejenteia dut chel che deplù sistems plu concrec à deberieda, lascian da na pert les particolarités de vignun de ei, vegn denominé tla linguistica con l term diasistem. Chest diasistem ladin vegn chilò esponù per prum, l paragraf 2 (sotite) mostra de ciunes unités funzionales che l LS é metù adum a livel di sons (fonems). L fat che la grafia dl LS descriv demé n sistem astrat à emplù la conseguenza che les realisazions fonetiches (manieres concretes de pronunzié les singoles unités) ne é nia fisses per cheles unités che vegn realisedes autramenter da un n idiom al auter. Enscì pò les variantes de sons che ne é nia raprejentedes graficamenter tl standard vegnì pronunziedes desche an é usés ti idioms. Per ejempl, l grafem <u> pò vegnì pronunzié sibe sciche l <ü> dla Val Badia che sciche l <u> dles autres valedes tles paroles <prum>, <mur>, <natura> y e.i. Da chisc prinzips sautel fora per l standard n sistem grafich scialdi plu scempl che chel di idioms, ti lascian la colorazion locala a la realisazion a ousc dles paroles scrites, olache chesta va debujegn. Les desferenzies anter la grafia dl standard y chela di idioms vegn mostredes tl paragraf 3.