Plaasbestuur deur digitale tweelingbeelde

Boere kan nou hulle plase van ՚n afstand bestuur deur 3D-tegnologie te gebruik.

Die Sweedse nuutskeppingsplatform, Agtech 2030, aangebied deur Linköping Universiteit, het 'n digitale beheerkamer vir landbou geskep. Dit word die Agtech Dashboard genoem, kortweg AGDA, en sluit ՚n digitale tweelingbeeld van plase in.

Martin Stenmarck van die tegnologiemaatskappy HiQ sê: “Boere het vandag baie stelsels om te bestuur: trekkers, masjiene, melkrobotte en silo’s. Alhoewel 'n mate van integrasie van die stelsels gedoen is, is daar nog baie meer nodig. Verder ontbreek gebruikersvriendelike koppelvlakke dikwels.”

Inspirasie uit Afrika

Fredrik Gustafsson, professor in sensorinformatika aan die Universiteit van Linköping, sê: “Ons is geïnspireer deur die behoeftes van wildwagters in Kenia. In die Ngulia-projek is nuwe tegnologie ontwikkel vir verhoogde beskerming van renosters. Dit gaan oor digitalisering, elektroniese veldverslae, sensornetwerke en posisioneringstelsels.

'n Sentrale deel was posisionering en bewegingsontleding in werklike tyd. Ons het dit nou oorgedra en aangepas by die Sweedse landboukonteks.”

Die span het gevorderde funksies in die model getoets, byvoorbeeld kaarte waar jy presies kan sien waar elke koei die afgelope 24 uur beweeg het.

Digitale 3D-modelle

Die span het ook digitale tweelingbeelde geskep. Die idee is dat die boer die hele plaas as 'n interaktiewe 3D-model moet kan opstel.

Die model sal 'n boer in staat stel om 'n goeie oorsig van sy plaas te kry en hy kan die werk makliker saam met sy span beplan. Die inligting is visueel en maklik om te absorbeer, jy kan dit selfs deur VR-bril beskou.

Mikael Pettersson, plaasbestuurder by Rotenberg Manor en deel van die span agter AGDA, sê: “Die 3D-model bestaan uit twee modelle, een oorsig wat die lande insluit en een wat op die plaasgeboue fokus. Hierdeur kan jy vinnig en duidelik wys na iets wat jy wil bespreek, byvoorbeeld watter sonpanele reggemaak moet word. Dit sal maklik wees om die werk te beplan en take te koördineer.”

Baie foto's en video's

Oscar Hoffmann van Linköping Universiteit, wat die 3D-model geskep het, verduidelik: “Die model is gegrond op ongeveer 4 000 stilbeelde wat met hommeltuie gefotografeer is, asook beelde van die grond af met ’n handkamera om besonderhede vas te vang. Die samestelling van die beelde in 'n 3D-model word fotogrammetrie genoem. Die 3D-modelle het ook fokuspunte. As jy daarop kliek, word foto's en in sommige gevalle video's intyds vertoon.

"Hierdie konsep gee 'n voorsmakie van hoe toekomstige plaasbestuur moontlik sal wees," sluit Per Frankelius, skeppingsleier in Agtech 2030 af. (world-agritech.com)