lífrænt
Indíana Nanna Jóhannsdóttir
Námskeið fyrir heilsumiðaðar nútímakonur Indíana Nanna Jóhannsdóttir, þjálfari, ástríðukokkur og talsmaður muna.is, hefur sett á laggirnar nýtt netnámskeið fyrir konur sem snýst eingöngu um mataræði og lífsstíl. Segðu okkur aðeins frá nýja námskeiðinu þínu og hvað það felur í sér? Um er að ræða 60 daga netnámskeið fyrir heilsumiðaðar nútímakonur sem vilja sækja sér hnitmiðaðan fróðleik, leiðsögn og hvatningu til að bæta mataræðið og auka svefngæði. Námskeiðið inniheldur allar mínar helstu áherslur og þumalputtareglur sem ég hef sjálf að leiðarljósi þegar kemur að mataræði, næringu og svefni. Mig langar að veita konum innblástur og gefa þeim hugmyndir. Ég vil hvetja þær áfram og sýna fram á að hollur, bragðgóður og næringarríkur matur þarf alls ekki að vera leiðinlegur, tímafrekur eða valda hausverk. Matur á að vera gleðiefni og láta okkur líða vel. Betri svefn skilar sér alltaf í betri líðan og er mikilvægasta undirstaðan fyrir allt annað sem við gerum. Við erum ekki að fara að vigta matinn okkar eða telja kaloríur. Við ætlum ekki að gera mataræðið eða svefninn okkar að leiðinlegu heimaverkefni. Við setjum okkur heilbrigð mörk og leggjum áherslu á næringu, vellíðan og skemmtilega fræðslu. Við ætlum að einblína á að vera saddar, sælar, úthvíldar og vel nærðar. Hverjar eru aðal áherslurnar á námskeiðinu? Matur: Höfuðáhersla verður á að elda og útbúa sjálfar næringarríkan og bragðgóðan mat. Í gegnum námskeiðið deili ég uppskriftum, innkaupalista og þeim þumalputtareglum sem ég vil að nýtist heima fyrir hjá þeim sem stunda námskeiðið. Svefn: Gæðasvefn er mikilvægur fyrir eðlilega líkamsstarfsemi og skýrar hugsanir til að takast á við dagleg verkefni. Við skoðum tengsl mataræðis og svefns: Hvernig hefur svefn áhrif á matarlyst eða langanir? Hvernig hefur mataræðið áhrif á svefn? Við setjum saman svefnrútínu og vinnum að því að bæta gæði svefnsins til að gera hvern einasta dag betri. Ef við ætlum að ná árangri á einhverju sviði lífsins er svefninn alltaf undirstaðan.
22
