hollusta
María Gomez
Gamla góða skúffukakan í uppáhaldi María Gomez matarbloggari og talsmaður muna.is heldur úti einu vinsælasta matarbloggi landsins, paz.is. Hún rekur einnig stórt heimili en María á fjögur börn. Hún segir fjölskylduna oft njóta góðs af vinnu hennar í eldhúsinu, sérstaklega þegar hún bakar eitthvað nýtt fyrir bloggið. Við spurðum hana út í helstu hefðirnar á heimilinu þegar kemur að bakstri.
Bakar þú reglulega fyrir fjölskylduna? Já, mjög reglulega. Stundum sérstaklega fyrir fjölskylduna en svo er ég líka mjög oft að þróa uppskriftir og baka vinnunnar vegna og þá nýtur fjölskyldan góðs af. Hvað verður þá helst fyrir valinu? Allt mögulegt, einhverra hluta vegna hafa einhvers konar kanilsnúðar og bananabrauð verið mest á boðstólum upp á síðkastið, en ég baka allt mögulegt annað líka eins og brauð, pítsur, alls kyns sætabrauð og líka oft hollustu eins og bananapönnsur og fleira í þeim dúr. Hvaða kökur eru í uppáhaldi hjá yngstu fjölskyldumeðlimunum? Það er tvennt sem er í mestu uppáhaldi á þessu heimili bæði hjá þeim eldri og þeim yngri, en það er gamla góða skúffukakan, hún er bara best. Þar á eftir koma án efa amerísku Cinnabon-snúðarnir með rjómaostakremi sem við höfum líka bakað í fjölda ára. Skiptir það þig máli að kenna börnunum þínum handtökin í eldhúsinu? Já, mér finnst það mikilvægt. Ég leyfi þeim t.d. stundum að skera með ögn beittari hníf en borðhníf. Ég kenni þeim að sjálfsögðu fyrst réttu handtökin og fer yfir reglurnar, svo eru þau undir ströngu eftirliti. Að læra á desilítramál, bollamál, matskeið og teskeið og að brjóta egg er eitthvað sem mér finnst að öll börn eigi að kunna en þau eru mjög fljót að læra og finnst yfirleitt mjög skemmtilegt að fá þessi hlutverk. Hvaða verkefni henta börnum sem eru að stíga sín fyrstu skref í eldhúsinu og vilja taka þátt? Að fá að mæla og setja innihaldsefnin í kökur er til dæmis góð byrjun. Aðeins stálpaðri börn geta fengið að skera grænmeti. Það fær þau yfirleitt til þess að verða enn áhugasamari um að borða grænmetið, svo lauma þau oft bita og bita upp í sig á meðan. 52
