kala tresna mabunga (I Madé Sugianto

Satua Cutet

kala tresna mabunga

“Dék, buin pidan ngajakin tiang mlali?”

I Madé Sugianto

Kéto munyin SMS Candra Déwi ané kirima tekén tiang. Makelo tiang tusing nyidaang ngwales. Berpikir berkali-kali tiang lakarang nyawab SMSe ento. Di keneh dong ada kita malali. Dot masé malila cita, maplesiran ajak tunangan. Kéwala apa aba malali? Masekolah gén tiang numpang, karana tusing ngelah sepéda montor. Dong Candra Déwi ngelah montor aba malali, kéwala kantong tiangé pepesan matalang. Yan telah bénsiné di jalan-jalan dadi isinin yéh enceh? Sinah tusing! Yan bedak di tongosé malali, nyidaang ngelekang pues. Matunangan paling sing ngelah modal. Modal montor aba malali. Modal pipis anggon meli bénsin. Modal pipis anggon meli karcis, yan tunanganné nagih mabalih di twenty one. Mamodal pipis anggon meli popcorn apang ngancan mesra di tengah bioskop mabalih lawat.

Pengeng!

Sajan tiang pengeng minehang unduké ené. Kéweh mula dadi anak tuara. Rerama nyidaang nyekolahang gén suba aget. Diastun tuna bekel pipis, ané penting nyidaang mayah bémo, tiang suba sanget bersyukur. Kenehé dong tusing ngalih tunangan di sekolah. Sastrané nyambatang, yén nu masekolah nyukla brahmacariné kukuhang. Da matunangan, apa buin married by acident; ngantén baan tunanganné beling! Sinah masa brahmacariné pocol. Tondén maan ijazah suba ngelah gelar S2, MBA; married by accident.

Tiang suba sawai nulak anak bajang di sekolah ané ngenehang tiang. Boya ja ulian ajum, tiang nulak baan jejeh tusing nyidaang berpréstasi. Seleg matunangan, nganti engsap malajah. Ento ané sanget jejehin. Sri, Ria, Déwi, Sinta, lan Siska, ané taén nglemesin tiang makejang anak bajang jegég. Makejang truna di sekolah tiangé jatuh cinta tekén anak bajang ento. Makejang maawak sangsangan, langsir lanjar, kulitné putih cara turis. Kleteg di keneh

dong ada cinta, kéwala jejehé mamurti. Disamping ento, tiang lek matunangan ajak anak bajang jegég lan sugih. Mapan tiang truna tuara. Yén alih di goba tiang tusing ja bagus. Pelihné I Kaki mekelin tiang pipis rejuna, ento makrana bajang-bajangé liu nyambatang tresna. Tiang suba nulak dugas bekelina pipis rejuna, tiang marasa tusing perlu. Adanan tiang bekelina pipis Soekarno. Yén liu ngelah pipis Soekarno sinah tiang tusing kéweh mayah SPP. Mabekel pipis rejuna tiang malah kéweh. Kéweh megatin tresna.

Sri, Ria, Déwi, Sinta, lan Siska nyidaang tiang nulak. Nanging, sasukat Candra Déwi maekin, tiang tusing nyidaang nulak. Candra saja buka adané, sakadi wulan purnama. Jegegné ngalangin ati. Makejang truna di sekolahan tiangé ngenehang ipun. Makejang nyaratang apanga nyidaang dadi tunanganné. Candra satmaka bunga sekolah. Yén ada anak truna nulak tresnané sinah sing normal. Tiang sakadi anak muani glebugin bulan. Anak lén magarang nyambatang tresna, né mabalik, Candra Déwi nyambat tresna ajak tiang. Yén nganti tiang nulak, sinah tiang sambatanga muani tusing normal. Tiang ngancan bingung. Pengeng ngenehang tresna. Mara paek gén ajak Candra Déwi tangkah tiangé suba runtag. Candra makenyem girang. Tresna matemu tresna. Lontar Sukla Brahmacari kal sinab di kakus.

Tondén tiang ngwales SMS-né, Candra Déwi buin ngirimin pesan singkat.

“Dék, jani tiang lakarang mulih kema. Ateh jebos tiang ka Badung. Ada film luung jani di Wisata. Jani gén buin nyidaang mabalih film Hollywood,” kéto munyin SMS-né.

Buin tiang mapangenan. Tusing nyidaang nyawab SMS-né. Ada rasa jejeh yén tiang pesu malali ajak ipun. Nu tiang inget kénkén munyin reramanné dugas ngopak tiang. Dugas nyelék-nyelékin tiang, kala ketara malali ajak Candra Déwi ka Kebun Raya Bedugul. Bapané ada ditu ajak timpal-timpal kantorné. Kala ento bapanné milu family ghatering, outbond di kebun raya.

“Candra, dadi malali ngajak anak muani tuara. Matunangan ngajak panak buruh bangunan apa lakarang tidik. Apa lakar gaé ditu. Lakar ngamangin

céléng ngamah. Bapa ba pedas ngorin selegang malajah apang buin mani dadi dokter. Yén matunangan ngajak panak buruh bangunan, apa lakarang maan? Panak buruh tusing sandang cagerang. Uli jani cutetné suud matimpal ajak panak buruh!” kéto bapané ngamélmél ngopak pianakné. Nyelék-nyelékang reraman tiangé mapan dadi buruh bangunan. Makeplug asane sirah tiange kala ento.

Suba taen tiang nagih suud matunangan, kéwala Candra Déwi tusing nyak. Ipun kaliwat tresna, kaliwat cinta ajak tiang. Munyin reramanné tusing runguanga. Suud ketara malali turin tawanga matunangan, Candra Déwi ngancan nglemeng nglalinin tiang mulih. Pondok tiangé ajak umahné Candra Déwi tuah mapaekan. Tiang satu kampung ajak ipun, tuah malénan banjar.

“Dék, tiang suba majalan. Antosang buin kejep gén, inggih!”

Nu bengong tiang mamaca SMS-né, sepeda montor Mio suba mulihan jumah tiang. Candra Déwi lantas nongkrak montorné. Tiang nu kamegmegan.

“Énggalin Dék. Apang tusing kasusu di jalan!” kéto ucapné, sinambi ngejang hélmné di duur kaca spion. Dugas Candra Déwi teka, umah tiangé suwung. Reraman tiangé ka dadua magaé di Sidakarya.

Tiang ngénggalang kayeh.

Suud makikén, tiang lantas luas ka Badung.

Di jalan ada rasa lek di ati. Malali ka Badung tiang tuah mamodal hélm. Kantong tiangé bolong. Montor tusing ngelah. Ada rasa lek, yén nganti ada anak nyambat tiang muani pangérétan. Mamodal goba ngalih tresna. “Déwa ratu agung, yén tiang dadi anak ngelah, tusing ja tiang nganti kéné. Malali kantongé matalang!”

Nyerser plaib montor Mioné. Candra Déwi tekek limanné ngelut bangkiang tiangé. Neked di Balun, pajalan montoré adéng-adéng. Jalané macet. Ada sekaa layangan ngentasin jalan. Ngancan nekekang Candra Déwi ngelut bangkiang. Tangkah tiangé tusing karuan gruduganné. Tumbén jani malali, malila cita ajak anak bajang. Maplesiran ajak tunangan. Assoy geboy asané.

Wayan Jengki Sunarta

Tusing marasa, sakéng liangé di jalan, suba neked di Wisata 21. Neked ditu, film Armagedon ané kenehanga tekén Candra Déwi suba makiré main. Anaké ané lakarang manonton suba pada siaga ngaba karcis. Kéto masé ané mara teka, nu ngantri di lokét. Tiang ajak Candra Déwi masé ngantré. Maan tiang kalina meli popcorn, jeg telah pesu peluh matah-matah. Di tengah keneh tiang satata ngrestiti, apanga antréanné nu makelo. Apang énggal Candra Déwi teka. Yén antréanné énggal sinah tiang tusing nyidaang makiba. Tiang tuara nyang mabakel amangpiah. Kantong tiangé bolong; matalang.

Candra Déwi inguh nepukin tiang mapeluh. Ipun laut nyusutin baan sapu tanganné. Kala ento, liu anaké ningalin. Saja mesra, sakadi Roméo lan Juliét. Suba maan karcis, tiang ajak dadua laut macelep ka Wisata 1. Tiang maan negak di tengah-tengah. Pas malun layaré.

Lampuné makebiet mati. Film main. Grudugan munyin filmé ngulangunin. Stéréo, suround. Munyin filmé malinder. Ketah kasambatang Digital Suround 5.1. Filmé ngulangunin. Sami pameranné, aktingné luih. Bruce Willis, Ben Afleck, Chaterine Zeta Jones mula saja-saja pemain film karakter. Joh saih ajak film-film Indonésiané. Aktingné kacangan, liunan magoba bulé!

Candra Déwi ngeling nepukin perjuanganné Bruce Willis pacang ngebor planété apang pretiwiné tusing kena pancabaya. Nyelamatang Ben Afleck, anak muani ané paling gedegina mapan bani nunangin pianakné.

“Yén bapan tiangé buka Bruce Willis, amat bagia tiang dadi pianakné. Kadék suba nawang, bapan tiangé gedeg gati ngajak Kadék. Baan tiang matunangan ngajak Kadék, ané tawanga kuluwarga tuna. Rerama tuah buruh bangunan, boya pegawé negeri. Nanging, amongkén ja tiwasé ngalilit hidup, tiang tetep lakarang tresna tekéning Kadék. Tiang lakarang satia matapa lacur,” kéto abetné Candra Déwi ajak tiang, sahasa nyelélég di pabinan tiangé. Bagia di keneh tiangé ningehin tuturné. Apabuin Candra Déwi mula sangat tresna sihin tiang.

Candra Déwi nyajang ngelut tiang, kala Ben Afleck ajak Zeta Jones magelut, kairingin lagu Jhon Denver ane suba kagubah. “....So kiss me on a jet plane, i want i will back again, oh baby, i have to go. Some living on a jet plane.....” romantis sajan asané idupé buka jani. Kéto asanan tiang kala tresnané mabunga. Gumi sahasa gelah ajak dadua. Yapitui kasujatianné ajak liu.

Filmé suud, tiang makikén mulih. Di jalan tiang sawai ngendingang laguné John Denver. “....So kiss me on a jet plane, i want i will back again, oh baby, i have to go. Some living on a jet plane.....” Candra Déwi nyangetang ngelut tiang. Sarasa tekek kaasanin. Pajalan montoré nyerser ngliwatin jalan mahotmix. Suba neked di Tabanan, jalanné benyah latig. Liu ada ukiran. Pajalan montoré nongklang cara negakin jaran. Liman Candra Déwiné marasa ngubegngubeg bangkiang.

“Bangun Dék, bangun, bangun suba tengai, tusing lakarang masuk?” mémén tiangé ngubeg-ngubeg awak tiangé.

Oh, tiang tuah mangipi!

Pangrupukan, 4 Maret 2010

I Made Sugianto,

embas ring Tabanan dina Wraspati Wagé Sungsang (Sugihan Jawa) tanggal 19 April 1979. Dané ngawitin nyurat sastra Bali modéren ring warsa 2009. Ring warsa 2009 dané ngwangun penerbitan sané mawasta Pustaka Éksprési sané sampun nerbitang makudang-kudang cakepan napiké cakepan mabasa Bali wiadin basa Indonésia. Polih hadiah Sastra Rancagé ping kalih inggih punika warsa 2012 bidang jasa lan warsa 2013 antuk novél sané mamurda “Sentana”.