sir ngasirsir angin pasih (Nyoman Dévi Ary Cahyani

Artikel

sir ngasirsir angin pasih

Nyoman Dévi Ary Cahyani

genénin indik pariwisata, Bali sampun kaloktah ka dura negara. Pariwisata sané kasenengin sakadi tradisi, budaya, alam miwah sané lianan, samian wénten ring Bali. Nika mawinan akéh N wisatawan dura negara malancaran ka Bali. Yéning maosang indik wisata alam punika, Bali madué akéh wisata alam, nika wénten air terjun, gunung, danu, pesisi miwah sané lianan. Wisata alam ring Bali sané sampun kasub inggih punika kaluwihan pesisinyané, nénten ja sumandangsaya yéning Bali madué akéh wisata laut utawi pesisi duaning wates wawidangannyané samian kalingkerin antuk pasisi, nika mawinan Bali punika kabaos antuk wawidangan maritim. Pasisi ring Bali sané sampun kaloktah inggih punika wénten pasisi Sanur, pasisi Kuta, pasisi Jimbaran, pasisi Pemuteran, miwah sané lianan.

Maosang indik kaluwihan pasisi, siraké sané nénten seneng malancaran ka pasisi?

Ri kalaning sampun rauh ring wawidangan pasisi punika, i raga nyingakin pasih linggah, ombak sané magulungan, warnan toyan pasihé pelung lumlum. Desir anginé ngaé punyan-punyanné maigelan, asri tur seger karasayang, selem utawi putih biasnyané, alus kainjek, jukung-jukung sané wénten ring sisin pasihé, kaanggén olih juru pencar ri kala ngrereh ulam, munyin ombaké magulungan, tur langité pelung ngawinang kenehé ngancan bungah. Napi malih ri kala sang surya jagi kelem, ngalon-alon warna jingga sang surya sakadi kauluh olih pasisi punika duh, nénten prasida kaucapang, ngaé luluh ati, ngaé pikobet ring déwék sarasa ical. Boya ja nguluk-nguluk napi malih nganggu, niki wantah rasa sané maosang.

Wénten malih ring soring samudera (bawah laut), punika wénten sakancan sané maurip, sakadi kaang utawi terumbu karang. Kaang punika genah sakancan ulamé. Mangkin kaang-kaang punika wénten sané kaanggén seni adah pesisi utawi seni bawah laut, sakadi ngaryanin wentuk barong nganggé kaang punika tur kagenahang ring adah pesisi utawi bawah laut. Nika nénten ja kaanggén antuk genah ulam maurip nanging kaanggén malih antuk wisata bawah laut. Maosang indik kaang punika, wénten pasisi Pemuteran, pasisi sané kasub duaning madué kaang utawi terumbu karang sané angen utawi becik. Nika mawinan wisatawan seneng nyilem ring pasisi punika.

Lian malih yéning maosang indik ombak, Bali madué pasisi Kuta. Sira sané nénten uning pasisi Kuta? Pasisi sané madué ombak gedé. Duaning ombak gedé punika, wisatawan dura negara seneng maselancar ring pesisi Kuta, nika mawinan pesisi Kuta kasub.

Malih wénten sumber daya lautnyané, sakadi ulam, minakadi sakancan ulam wénten ring pesisi. Ulam punika madué akéh sumber nutrisi sakadi protéin, lemak, vitamin sané mawiguna ring kauripan manusa.

Yéning pinehang, asapunika sampun alam ngamolihang guna majeng ring manusa. Nanging, mangkin napi sané i raga icén antuk ngawales punika? Nglestariang alam?

Boya ja éling antuk punika, sakéwanten mangkin manusa wantah makayunan antuk pikolih sané wénten ring pasisi. Minakadi wénten sané nganggé bahan-bahan utawi alat baya antuk ngarereh ulam sakadi pukat harimau miwah ubad baya mangda akéh polih ulam, nika mawinan kaangkaang utawi ékosistem laut punika nyag. Wénten malih alih fungsi lahan sakadi villa, hotél, réstaurant miwah sané lianan, nika mawinan wawengkon pasisi punika sasai wénten abrasi utawi pengikisan tanah oleh air laut, wénten malih luu-luu sané wénten ring wawengkon pasisi punika. Hmmm, yéning sadurungnyané nyingakin pasisi déwek sarasa bagia, mangkin lian, pedih, pedih sané karasayang.

Nyoman Dévi Ary Cahyani, embas ring Banjar Tegeha, 20 Maret 1999. Ngaranjing ring Kampus Sekolah Tinggi Agama Hindu Negeri Mpu Kuturan Singaraja, ngrereh Jurusan Dharma Acarya, Program Studi Sastra Agama dan Pendidikan Bahasa Bali. Email nyomandeviarycahyani@yahoo.com