geguritan bangbang wétan (IBW Widiasa Kenitén

Geguritan

geguritan bangbang wétan

IBW Widiasa Kenitén

Pupuh Sinom

/17/

Tṛeṣṇa brahmacari kucap, rangkungan malih asiki, sang wikan mangamel dharmma, guru kakung dharmmaning strī, jaba jero patut nunggil, tegtegang raṣaning kayun, gegodannė katah kebah, patibrata katunggulin, ratu ayu, ngemit satya ngagem lampah.

/18/

Becikang satyanė gamel, salampah laku pang apik, ngandika ngeningang idhep, idhep dharmma manyunarin, satya ngempu pati urip, satya linggihang ring tanu, dabdab degdeg gemuh raṣa, satya patirthaning ati, gelut etut, patut tibakang ring wargga

/19/

Satyaning Sang Dharmmawangsa, satya tunggul pati urip, satya patut anggėn bantang, satya dharmma galang ati, satya suci manyarengin, satya ngintil ngatut tinut, satya ngiring mantuk budal, satya ngrereh genah margi, satya puguh, satya ṡastra satyāgama.

/20/

Satya wacana tekekang, munyi mobadė ejohin, tutur tatwanė limbakang, etis raṣa sang miragi,

sawitranė dados kanti, ngardi liyang tuna uyut, ngrucak ngrucukin icalang, dabdab solah dabdab ati, lidah manut, ngamerthanin tan pawiṣya.

/21/

Satya hṛedaya uripang, edoh kayun bingung paling, osah idhep wetu pusang, degdegé pucukang ati, gegodan gelis ngrucakin, mategepan rupan ipun, maya maya nyuti rupa, ngardi twasė tan patangkis, nyingsė ngrudug, tutur ṡastranė pagehang.

/22/

Polah sadhunė limbakang, satya lakṣaṇa wastanin, kayika ṡudhanė margyang, ejoh solah mapi-mapi, tingkah baka jwa tunain, sebeng dharmma mraga putus, ngeca tatwa kauripan, dayanė sepel madungki, ngaba sau,

ejuk lantas kasabatang.

/23/

Satya mitra nué timpal, ngrereh kanti jwa pilihin, ipun midep manyengkalėn, kadang luwih ngawė becik, mitra satya ya gugonin, janten urip sidha lanus, kawekas kaucap melah, matulung ri panes etis, raṣa tulus, mangemit wengi rahina.

/24/

Satya samaya melahang, tuut tekek tekėn janji, semaya ėling sudharmma, dharmma embas dharmma urip, tėja hṛedaya nguripin, galang idhep panggih gelut, nilar semaya pucehang, suratin lakṣaṇa luwih, wibuh lanus, idup melah sayan ingan.

(pacang kalanturang....)