Literatur

Text: Gioia Rodriguez

«Gits gueti Büecher uf Schwizerdütsch?»

Das isch ehrlichgseit s erste gsi woni mich gfrogt han, womer das Thema usgwählt hend. Ich mein, ganz ehrlich ich han nonie eis gläse und woni umegstudiert ha, öbi de überhaupt eis kenne, isch mer keis in Sinn cho.

Mental schrib ich Schwizerdütsch eher chindliche Gschichte zue; halt so Büechli für Chind zum ahluege, wos irgendwie no paar beschriibendi Sätzli hed. Also hani ned anders chönne als halt in Orell Füssli stiefle (oh no …) und mich mol go schlau mache, öbs überhaupt öppis ufem Märt hed momentan.

(Hätti au id Bibi chönne? Jo. Hani welle drü Stund ih dene Regal umeirre und glich nüt finde? Nei.) Es isch ja auned so als öb ich fest die Schwizer Kunst-Szene verankeret wär und so irgend en Zuegang zu Schwizer Literatur hätt, also hani müesse die Professionelle go fröge.

Anyway, long story short: ich han paar gfunde, aber aunöd viel. Es hed ih beide Stöck sone mini Abtrennig wo stohd «Mundart» und det sind gfühlti 1.5 Büecher dinn. Vo dene hani zwoi für Erwachsni und zwoi für Chind usgwählt.

Ich lueg halt doch no gärn ah, was d Chinderabteilig für Büecher z offeriere hed, mängisch chammer so grad Idee füre Unterricht sammle.

Die zwoi Büecher hend honestly no spannend tönt und mer liest sich no schnell is Dialäkt vo de Autore ih. Vorallem… wer hätt dänkt dases en ganzi Reihe vo Krimis uf schwiizerdütsch gid? Weni das ned spezifisch wär go sueche hättis ganz sicher nie usegfunde.

1| Culturestress – Sarah Elena Müller

2| Der Ääschmen und die toot im gaarte – Viktor Schobinger

S nöchste Buech isch sicher scho bekannt und auscho es älters, aber ich has würklich nonie uf Schiizerdütsch gse! S vierte chani au vo ganzem Härze empfähle will ned nur isches sooo süess, ich find es hed ganz genau die perfekt grössi zum de Chind chönne vorläse und nacher grad zeige und zu allem äne sind d Illustratione so schön gmacht!

3| I ha di weisch wie gärn – Sam McBartney, Lorenz Pauli 4| Ds chlyne brune Hüendeli – Brigitte Kunz

MÜENDS DE NUR BÜECHER SI?

Nei. Es macht Sinn, dass die Schwiz genauso, wie ah andere Ort, d Lüüt dra interessiert sind, d Gfühl und Ihdrück us ihrem Läbe uf ihri Sproch, Art und Wiis z'verarbeite und das offesichtlich nöd nur in literarischer Form. Am meiste überrascht hed mich d Musig vo «The Cotton

Mafia» wills teilwiis chli nach «Gregory Alan Isakov» tönt; aber eifach mit schwizer Lyrics! Und natürlich d

Podcasts! Es wär mer nie in Sinn cho usserhalb vo dem Artikel spezifisch noch schwiizer Podcasts z sueche, obwohls rächt viel und mega tolli hed!

Mer wüssed alli, es hed super schwiizer Musig, ned nur will mer natürlich immer die beste und coolste Lieder mit de Chind singed, sondern will mers äbe näbed Ed Sheeran und Glass Animals au würklich im Radio ghöred (für die wo auno Radio losed natürli) oder sälber die Tüüfe vom Algorithmus irgendwie gfunde hend. Zum Bispiel:

4| Abraham – The Cotton Mafia

5| Baobab – Nativ

Natürlich chamer au vo schwiizer Filme rede, wemmer scho debi sind; nämlich chund de Pedro Lenz nöd nur bide Büecher und Literatur oft vor, er hed au dank em Film «Dr Goalie bin ig» 6| en feste Platz im Film- und Liinwand-Diskurs. Um grad bimne Film blibe, wo Ufsehe erregt hed und zwar erst no chürzlich, döf mer «Platzspitz-Baby» 7| nöd vergässe z erwähne. Beidi Filme sind definitiv sehenswärt; eine mitere mitriissende Story und de zwoit beruhend uf ächte Begäbeheite.

Da Podcasts öppis sind, wo würklich kei Nachteil hend, bini uf Spotify auno go stöbere, und go luege wases so git, wo entweder lustig oder nützlich chönnt si. Natürlich hend jede ganz anderi Vorliebe was das ahgohd, aber nach all dem wo ich ghört han findi, dass die zwoi sich würklich würded lohne drizlose. Entweder binere lange Zugfahrt oder zum Bispiel bim Putze/Choche etc.

8| Muetersöhnli

9| Unbeschwehrt Nachhaltig