Kolumne

Text und Illustration: Valentina Botic

Ich und d’Gsellschaft: Achtung, Fertig, Diskutier!

Online, nid online, präsent, nid präsent. Vorlesig, Gruppearbet, möglichi Tools für d’Onlineseminar; Um die Theme ischs gange ade Podiumsdiskussion vom «Tag der Lehre 2022». Ich han det derfe mitdiskutiere und min Senf dezuegeh.

Diskussion- Achterbahn vodä Gfühl

Was hät Corona Guets bracht in Bezug uf euses Studium? Mini Antwort: Abschaffig vodä Präsenzpflicht! Voll druf losdiskutiert, stelli fest, dass mir alli e anderi Vorstellig vo Präsenz hend. Während für eus Präsenzpflicht sich uf d’Pflicht physisch vor eim z’stah bezieht, isch für Dozierendi au ä Onlinepräsenz ä Präsenzpflicht.

Gemein die Frag: Jewiels wieviel sött im 1. Semester vor Ort si und wie viel online? Im 1. Semester! Eigentlich hät ich wie min Mitstudierendi 30 % PH und 70 % online gseit, aber denn falled mir all die Studis ih, mit welne ich im letschte Semester Kontakt gha han.

«Ich han online gstartet, ich kenn mich null ufem Campus us» , «Ich kenn niemert us minem Jahrgang», «TBB was isch das?» Hm, oke simmer mal nid so, aber mit Betonig uf im 1. Semester segi 40 % PH / 60 % online.

Wenni aber diä Rechnig vo dene 3 ECTS Pünkt gleich 90 Ah no einisch ghöre, dreh ich doch komplett am Rad. Rechnerisch isch das nie lös- oder machbar ohni z’sege, dass es zviel isch.

Also isch das doch kei Rechtfertigung für alles. Nimm mir doch wenigstens die Pflicht vode Schultere, dassi da hocke. Dänn chani mini Nächt au no opfere zum dere Rechnig grecht werde.

Kommentier dich doch selber!

Selbst nach dä Diskussion lies ich Kommentär und Frage usm SpeakUp vom Live-Publikum: Wenn entstaht bi eus Studis es Füür: vor Ort, im SOL oder idä Interaktion mit de Dozis und Peers?

Logischerwies chan ih jedere gnannte Situation es Füür entstah, wenn defür brennsch ä gueti Lehrperson zwerde. Natürli gits aber au die Studierendi, wo nid fürs Studium brenned sondern für dä Bruef und eifach durs Studium gah wend, wel sie das Diplom ha wend zum das chöne mache, wofür sie Liiedeschaft empfindet.

Das heisst aber nid, dassi Liiedeschaft fürd Theorie empfinde muss, ich muss sie eifach ha und nutze chöne. Die Studierendi sind denki nid schlechteri Studis, nur wel sie realistischer überlegged. Ou ja min Liebling: Was würed mir zwei Studierendi ufem Podium de Studis sege, wo vo 14 Verahstaltige im Fachunterricht im erste Semester 10 mal nid erschiene sind (Realitätsbispiel)?

Weli Massnahme würd ich ergriffe? Seg mal sorry, sind mir Erwachseni anere Hochschuel oder simmer idä Sek oder Primar, woni Eigeverantwortig no lerne muss? Lömmer doch so Studis is Messer laufe: Sinds würki so schlau, das si ohni Input etc. sich das alles selber bibringe chönd und abliefered, denn isch es dem sis guete Recht so zstudiere, wenn das sini best Lernmethode isch, bitte.

Wenns än Dubbel isch, rasslet er halt dur di erste Zwüscheprüefige, Pech gha, no so gern. Ich weiss mir händ än Lehrpersonemangel, das heisst aber nid, dass jedes Lebewese, wo da ufm Campus umelauft ä Lehrperson wärde söll.

Mal ganz ungfiltert mitteilt: Wer mitäm Druck, mitäm Arbetsufwand und mitm Ziitmanagement nid klar chunt, sich selber nid orientiere und organisiere chan, derf sich gern anere Akademi-mi-mi immatrikuliere, aber bitte nid Lehrperson wärde.

Wär erst im Studium uf diä Idee «Eigeverantwortig» chunt, isch nonid riief gnueg zum e miterziehendi Person im Läbä vonem Chind zsi. Statt z’kontrolliere, ob ich ahwesend bi, sött lieber kontrolliert werdä, WER Lehrperson wird.

Lernform, Tools etc.

Während dä Diskussione sind Frage ah eus Studierendi grichtet wordä, weli Tools mir bruched und wie mir eus effektiv Notize mached. Klar isch das «nice to know», denki mir, aber din Unterricht muss sich doch nid nach minärä Notizemacherei richtä.

Vorallem red ich, di Jüngst ufm Podium, vo «old school» wäl ich no zu dene ghör, wo gern en Stift brucht, wel dä dKanalisierung vo minere Konzentration isch. Da schmunzlet sogar dä erfahreni Dozent mir gegenüber.

Es git nid DIE eini Lernform, nid DAS einä Tool, wo bitte alli Dozierendi bruchä sötted. Bruched doch eifach sglichä Ziiel vom Unterricht, wo eus ahgehendi Lehrpersonä immer predigt wird: Gstaltet eifach en abwächsligsrichä sinnvolle Unterricht, denn chömmemer gern. «catch them being good» betriibä bi allnä Studis, wo präsent sind, und nid go Kompensationsufträg verteilä für die wo gfehlt händ.

Wenni eis als Lehrperson glernt han, denn dass ich als guets Bispiel vorah gah söll. Liebi Studis ich weiss, ihr wend Struktur, aber kei Lehrperson unterrichtet wiä dä ander, wärdet mir nid, münd Dozierendi au nid. Struktur und Einheit in organisatorischä Sache chani nahvollziehä.

Bispiel: 17.1. werdet alli Stundeplän veröffentlicht. Wieso nid irgendwo churz vor Semester es Datum wo alli Dozierendi ihri provisorische Semesterplän veröffentliched? So weiss ich worah ich drah bin bevor Semester ahfangt und schnall nid erst idä 3. Wuche was mich erwartet. Chan sogar allefalls Frage stelle, wenni welchi han.

Präsent sii, ja – Pflicht nei!

Ob ich mich ad Rektorä richtä oder ad Studis, so oder so chani beidnä sege: Strebet nid danach, es jedem Recht zmache. Es isch nid möglich. Mer chan sis beste geh beidersiets, aber das wärs denn au gsi.

Chüele Chopf bewahre und das mache, was möglich isch. Und im Endeffekt, denkemer doch as Wohl vo eusne Chind wo mir underrichte möchtet – niemert will ä ufgschmisseni Lehrperson, wos absolut nid im Griff hät.

Präsente Unterricht isch keis Problem für eus Studierendi. Vieli Studierendi chömed gern ad PH. Es isch das chline Wörtli «Pflicht» dehinder, wo stört. Wäl mir eus freiwillig meldet, das Studium zmache und dä Bruef usüebe möchtet. Wär nid parat isch sich Müeh zgeh für sini eigeti Wunschusbildig, hender ächt sGfühl dä isch dänn au parat sich um d’Usbildig vo andernä zkümmere?

Drum seg ich: Fadegrad is chalte Wasser gheie lah, voll is Messer drih, duregheie und ab dä PH – selbstverschuldet. Sorry wer sich nid bewusst isch, dass wenn mal nid ufchrützisch, eifach meh ztue het und meh lese muss, dä isch fürs Studiere nid gmacht.

Wers selber hibringt, findii cool. Aber d’Motivation für euses Studium sött bi eus allei ligge. D’Ufgab vom Dozierendi isch es nur dä Underricht möglichst intressant zgstalte. Mengi chönds, mengi nid, mengi hend eifach en Symphatiepunkt, egal mit welne Tools, weli Lernform etc.

Chers wiä du wetsch, so oder so: Wetsch Lehrperson sii, musch was defür mache und defür söttsch du allei, wo sich defür entschiede hät, verantwortlich sii.

LMS: Dein Studi-Laden in in in der Europaallee.