Pangni Ko, Wata Ko Sofailah Latip-Panggaga
Miyaka isa a alongan na miyapamikir aken a khabaya ako dumeka, Misabap ko kadakel o tepeng o Allah a maregen leseben a galebek, Ogaid na mailay aken so kalombay o pamikiran iyo, Na katagu-an ako sa panginam a galebek paroman. So kasisinga-i niyo raken ago gagaw niyo raken na makapikir ako sa mapiya Anda pho-on i bagiyo aa lengaleng na di ko paka ondasen ka Balawagan ko sa gas na bonsodan ko sa itil. Na so kiyapamakala iyo na miyakarani so bagiyo ago piligro Na salakaw ko akal galebek ko i kapaka-awat iyo ron Na makapang adap ako ko Kadenan; “Yaa Allah. Seka I lebi a makasasagipa Ko langowan o galebek o mga wata aken Na mata-an a saken na gagalebeken ko so sangan aken Ko kapakaga-ga aken. O adna ogaid na aden a soked o langowan a siyap aken kiran, Na sii aken Reka den ini-pasod so mga di akenon kagaga somiyap Ka aya mataan benar na thataman Sa pintran so alambet a korikod. Inisarig aken den siran ko kipa-ar ka ko pekaola-ola iran Ka mata-an aa Sekabo i pegendodan ami si-i ko oriyan niyan. Ameen.” Mga wata ko, aya pangni aken rekano Na so kapipiya a ginawa niyo na ayako mambo kapipiya a ginawa Ogaid na di mapen-dilengan so kapipiya a ginawa Sa dunya ka ba den man sagad so kintay na kakal so pimbasokan. So sarig aken rekano na mala, ogaid na mao-ona so kawan aken Ka so doniya na aden den a iblis a sasangan ko pembinasa Na giyoto I pelidasan iyo ron. Ka so Allah i mata-o ko langowan taman Sa Sekaniyan den I pakambaya-a niyo ron ko ped. Aya mala a pangni ko, mga wata ko Na pipiya-i niyo so parangay niyo ko salakaw di salakaw, Pakalantasa niyo so pikir iyo, Pakabagera niyo so imaan niyo, Ago pakala-a niyo so kalek ko Allah ago ko mga lokes iyo. Ka In shaa Allah na ikalimo tano bo o Miyangaden.
29
