RAGA A MIYALOKES Almayrah A. Tiburon
Sa masa imanto a kapapantagan, Masa a miyambagu so langowan taman, Masa a kiyasalin o bustan o kapepáginged, So masa a kasembi-sambi o mosim. Miyarasay so dunya sangkaya a masa imanto, Omani isa na pápadalemon so kambágu-bagu. So pitánggisaan na kataya a pekaroro so lo’, Minitaman angkaya a Ranaw a montiya sa Mindanaw. Miyada so kapepáginetao a mapiya, Miyada so kanggagayan a malinanek sa ginawa, Tomiyapeles so katikena o mokarna, Ko kiya bimban o kadekedakelan ko dunya. Da inengka-a so kiyasalin o masa sa kaludan, So di mipendarainon na tiyalikudan, Na tiyampar den so pakabimban, So kapakada-āg na piyanagontamanan. Da inengka-a go ba den piyakalipatan, So kawiyawiyag na kiyabinasaān. Mindákel so pámanagad a bagiyu, Angkaya a dunya na mikáyaw a tanto. Giyai so tigiran a “aden a tegu na da a paar”, Da sa moran na da peman sa sominang, Panenggaw imanto, mapita peman na mayaw, Miyangadudurus so manga palaw na go mindegan. Makasasayan sa raga a miyalokes, Benar a raga a titu a pekadaan sa bager, Ka so ragat na lumalangoy sa resik, Endu a mabager miyasawang ka marsik.
Binasa so endo ka so pángisasalinon a pákabinasa. Mindakel pen so manga paniyakit sa Ranaw, Aya kabasaon o manga lokes guwani na tiyuba. Kataya den so manga paniyakit lagid o dengue, Duaniyan a mala na so manga pubre, Mikálemek so sabaad na maoma niyo ron bu, Ka da niyo den arga-a so dunya sa matitu. Datar o ridu a pánanggilaan o omaniisa, Maregen pasaden, págiktiyaran o pitánggisaan, Ridu a makaola-ola den taman sa taman, Di kábelag ko manga manosiya sangkaya a dunya. Minilagid tano den ko pananaroon, O manga manosiya sa Raya go Lilod, “Baden mala so dalog a pekálilid ko lapad, A da-a kapadal iyan.”Anda den so maratabat? Mataan a raga a pekálokes ka tanto a miyarasay, Sabap ko sabaad a piyakasisingay i dinggula-olaan. Daden a tigiranon na mapasang so pákatalingoma, Kábaak o manga kalombayan so kiyalokes o dunya. Inotano di sekaw-sakawn so dunya, Ka darpa ini a mapepeno a kanggáya gumaya? Tomo pen so gádungo ba so Sendong, Ino i tomo so riski oba giyangkaya a ranti. Ipemaratabat tano aya a manga Meranaw, So matitu a maratabat a matantos a mataan. Pakasukáun so rugu, itindeg so kaselang a mapiya. Maregen angkaya a kasembi-sambi o mosim sa dunya.
Pengguraok so langit giyoto i mataan, Ipangato so maratabat go osaren so ilmo, Na kataya a pepágudas so kalasan, So sindaw a mapiya na ipanolon go itindeg tano. So manga kayo na miyangawawapat, Siyapen tano so manga baya a ginawa, Miyalaga ka miyatowa pen so ragat. Ka so kasendit na sa oriyan na go isa-isa so niyawa. Bongkaong, aruān, sireng na kiyadotiyan sa ranaw.
33
