Summernacht TEXT SUNIL MANN
Si hei dir e nöie Name gä und derfür es Stück vo dire Seel gno. Gfragt het di kene, nid es Chind, sicher nid, und du hesch tänkt, das müess vilech so sy. Es anders Land, vergiss das nie, mir si hie nume z Gascht. Müesse dankbar sy, zfride sy, still sy, het der Vater gmeint. Und du hesch dr Müeh gä, hesch versuecht, dankbar z sy, zfride z sy, ke Lärm z mache. Di iizordne, aazpasse, derzue z ghöre. Nid uffalle, hett dini Mueter gseit, nume nid uffalle, dis ganze Läbe lang, mach di chly, wenn z gross bisch, blib unsichtbar, de gseh si di nid. Sie louft scho ganz chrumm, mit zwöiefüfzgi, vor luter Bücke und Abehuure, vor luter nid welle gseh wärde, wenn sie düre Tag ir Wöscherei schaffet und am Abe d Büro putzt. Mängisch chunnt’s dir vor, als würdi si sech am liebschte uflöse, verschwinde, irgendwohäre, wo nid hie isch, wo nid jetzt isch. U we de doch mal öppis isch, ufem Poste, bir Behörde, ufem Amt, de faht sie sofort aa gränne, dass se emel ja kene öppis fragt, kene schimpft. Träne si ihri Waffe, well si mit Wort nid ma cho, und si setzt se rücksichtslos ii, e Muur us Wasser und Mitleid, haltet sech so alli und alls uf Distanz. Blibt so sälber distanziert, chunnt drum o nie aa, isch niene dehei, verschteit so mängs nid. Warum o, si si nid cho zum Blibe, dini Eltere, das säge si immer no und immer wieder, sit fasch driissg Jahr. Aber dert, wo si meine, es sig ihres Dehei, sit ihr scho lengschtens frömd. Die, wo si gange, alls hinder sech hei glaa. Die Riiche us dr Schwiz, die, wo uf die andere acheluege, wie d Verwandtschaft seit, well si meine, jetzt öppis bessers z sy. Ds Gäld, wo dini Eltere dr Familie schicke, näme sie glych, klar, me wott ja nid schwierig tue, dir heits ja. Wachst uf de Böim, ligt uf dr Strass i däre Schwiz. Gloube si. Und du hocksch zwüsche Schtüehl und Bänk, bisch nid vo dert, nid vo hie, das merke si dert genauso schnäll wie hie. E winzigi Insle zwüsche de Kulture, wo sech orientierigslos im Strudel dräiht, ir Hoffnig, irgendwenn mal es passends Ufer z finde, es Ufer überhoupt. Eis, wott chasch aalege und vilech sogar e chli blibe.
ANZEIGE
8
Das alls geit dir düre Chopf, wott jetzt dä Drink häreschtellsch, uf das garantiert tüüre Sideboard bir Tür. Lau ischer, dä Gin Tonic, wie d Schtimmig, wo nid rächt ma ufcho. Derbii hett d Maja sech deräwä Müeh gä, hett es Büffet ufbout, isch dr ganz Tag ir Chuchi gschtande, geschter scho, das het sie öppe sibe Mal betont. Ei Sektion für d Vegetarier, eini für d Veganer, was glutenfrei isch, isch aagschribe, ds Glyche giltet für alles ohni Laktose. Me git sech total unkompliziert, solang alls genau so isch, wie mes gärn hett. Jemenitisch isch hüt ds Thema, d Maja betont gärn ihri eigeti Wältoffeheit. Aber wo dr Michu ganz am Aafang vor Party hett gfragt, wieso de usgrächnet Jeme, dert herrschi doch sit Jahre e humanitäri Katastrophe u Millione vo Mönsche sige vore Hungersnot bedroht, da sigi doch so es üppigs Büffet scho zimlech zynisch, hett ihm d Maja e Blick zuegworfe, wo d Temperatur im Ruum uf dr Stell under e Gfrierpunkt hett la gheie, und zimlech lang hett de o niemer meh mit em Michu gredt. Du machsch d Tür uf, well’s nümm ushaltisch, well dr fähl am Platz vorchunnsch, und schlichsch i ds Stägehuus use. E churze Momänt lang blibe schtah. Luft hole. D Musig tönt dumpf im Gang, häll klirre Gleser, d Stimme verschwümme zume Ruusche. Vermuetlech het kene gmerkt, dass du geisch, kene rüeft dr nache, chunnt cho luege, wo de bisch, nid emal dr Oli. Sit dir sit cho, steit dä ir Chuchi und redt mit dene beide Type, wo mit irgendeme Start-up-Undernähme wei dürestarte, demnächscht, sie hei die ganz Zyt mit änglische Begriff um sech gworfe und derbii ganz wichtig gluegt. Ihri Näme hesch sofort wieder vergässe, Evan und Tom, vilech, vilech o nid, spilt ja eigetlech ke Rolle. Sie hei di churz abchecket, wo dr Oli di het vorgstellt, und chly blasiert glächlet. Für si bisch du nid interessant gsi, das hesch i ihrne Ouge gseh, nid cool gnue, z wenig Iifluss, nid die richtige Connections, das merke Lüt wie die sofort. Derbii: Hipsterbärtli und schwarzi Hornbrülle, Holzfällerhemli, wo sech e Holzfäller nie chönnt leischte, beidi wie diräkt useme veraltete Lifestyle-Ratgäber. Du hesch di gfragt, öb de die niemer druf ufmerksam macht, dass si usgseh wie Karikature, dass ds London und ds Berlin genau söttigi oder no luxuriöseri Usgabe im Dutzend umeloufe. Aber natürlech hesch nüt gseit, hesch zrügglächlet und’s nid gmeint und när hesch dr dä Drink ar Bar gholt und bisch viel z lang verlore i däm Loft umegstande, ohni mit öpperem z rede. Si hei dr e nöie Name gä, und trotzdäm het’s nid viel gnützt. Si erkenne di, wenn di für e Stell bewirbsch, e Wohnig geisch ga aaluege. Mängisch klappet’s trotzdäm, Marie Kova hilft. So heissisch scho lang, well d Ändig vo däm Name, das hei dini Eltere schnäll gmerkt, die überchunnt i däm Land so viel Gwicht, dass si vieles ma verhindere, scho mängs isch wäge dene paar Buechstabe abverheit oder gar nid ersch zstand cho. Marie Kova, so heisseni, dänksch jetzt, aber es tönt falsch. Marie Kova, das bi nid ii. Du lahsch die moderni Überbouig hinder dir, luegsch kes einzigs Mal zrügg u loufsch dür d Stadt. D Luft schmöckt nach Summerflider, nach warmem Asphalt u immer no chly nach dr Hitz vom Tag. Du lahsch di la tribe, ohni Ziil, eifach so. Surprise 503/21
