LÓPEZ SOUTO, África, Mulleres que (nos) dan que pensar,
Número 58
Decembro 2019
Galaxia, Vigo, 2019, 392 pp. Cómpre sacar á luz mulleres que foron agochadas, esquecidas. Pararnos a pensar con elas e sobre elas. Aprender das máis coñecidas, pero tamén das máis próximas. Neste libro fálase da oceanógrafa Ángeles Alvariño, da primeira almiranta, Sabela Barreto; da primeira farmacéutica galega, Manela Barreiro ou das primeiras universitarias... A listaxe é longa e aínda será máis. Ampliala é unha forma de facer sororidade, de dar pasos sen ter que ser sempre pioneiras.
MARTÍN, Paco, O home que mercou un libro, Galaxia, Vigo, 2019, 104 pp. Un libro sobre os libros, sobre o esforzo que hai detrás de todos e cada un dos libros. Un libro para ler os que devecen por ler como respirar, para os “lecturaferidos”.
MORAN, Caitlin, Como se fai unha rapaza, Rinoceronte Editora, 354 pp. Nesta narración realista e chea de humor preséntase unha peculiar indagación sobre a feminidade. Johanna Morrigan convértese en Dolly Wilde, e comeza a dedicarse á crítica musical nunha revista londiniense. Entre concerto e concerto, a protagonista relata sen rubor os seus esforzos por converterse en adulta a base de fumar, beber e deixar de masturbarse con todo tipo de obxectos para pasar ao sexo con todo tipo de homes.
MORRIS, Heather, O tatuador de Auschwitz, Xerais, Vigo, 2019, 296 pp. Relato de superación, amor e supervivencia no medio do terror do Holocausto. Esta é historia real dos xudeos Lale e Gita. Lale era un tatuador ao que os nazis obrigaban a gravar a numeración nos brazos dos prisioneiros. Así coñeceu a Gita, da que namorou intensamente, grazas a iso puideron recobrar o sentido da vida e sobrevivir ao horror. Cando remata a guerra, Lale e Gita volven atoparse e inician unha nova vida en Australia. Unicamente tras a morte de Gita, Lale decide dar a coñecer a súa incrible historia.
PEIRANO, Marta, O inimigo coñece o sistema, Factoría K de Libros, 2019, 344 pp. “A tecnoloxía que mantén Internet en funcionamento ou a que levamos nos nosos dispositivos móbiles non é neutral. O propósito último é manternos cos ollos pegados á pantalla durante o maior tempo posible”. A rede non é libre, nin democrática. Ese conxunto de servidores en sitios remotos, antenas, routers e cables de fibra óptica está controlado por moi poucas empresas. Internet é secreta; os seus algoritmos son opacos. Os centros de poder que almacenan e procesan a información están ocultos, camuflados por criptografía... O inimigo coñece o sistema, pero nós non.
Bo Nadal!
LIAO, Jimmy, No soy perfecta, Barbara Fiori Editora, 2012, 128 pp. Aos seus pais Perfecta Nueno, cando era nena, parecíalles perfecta. Pero a medida que crecía, a cousa foi cambiando... As esixencias dos pais e da escola foron en aumento. E ela xa está tan cansa que quere berrar: "Non son unha nena perfecta!" No mundo son poucas as persoas que pensen ser tan imperfectas coma ela. Cantos, nenos ou maiores, abandonamos a procura da perfección, podemos escoitar as súas mensaxes: Quen é realmente perfecto? Ser perfecto faite feliz? As persoas demasiado perfectas non resultan molestas? Unha invitación para ser nós mesmos. VV. AA., Anónimo era yo, Montena, 2019, 128 pp. Margarita Hickey, Juana Inés de la Cruz, Emilia Pardo Bazán, Rosalía de Castro ou Alfonsina Storni víronse obrigadas a vivir a media voz, agora as súas voces soan máis alto que nunca baixo o lapis inflamable de Bebi. Elas, que escribían escondendo os seus nomes; elas, que vivían calando; todas elas, aínda así, gritaron ao mundo a súa poesía. Nas súas voces atopamos unha e outra vez, como unha canción demasiado coñecida, o medo, a culpa, a represión.
VV. AA., O libro dos trens, Galaxia, Vigo, 2019, 252 pp. Trens, lectura e vida están interconectados. Os trens enchen as nosas vidas e as nosas historias. O tren vai por ese camiño de ferro polo que transitan existencias singulares cheas de paixóns, dores, esperanzas, risos e segredos. Neste volume, cinco autoras e cinco autores toman o tren, a vía, a estación, os revisores ou os maquinistas como motivo de inspiración para crear un relato que sexa, ao tempo, unha viaxe literaria feliz.
ESO BOLUDA, Paco, Kallaikos. Unha viaxe á Galiza céltica, 2019, 132 pp. “fixen o que non atopaba: unha obra didáctica e amena sobre os castros” di o autor e autoeditor desta publicación. Boluda, que participou en múltiples campañas de escavación arqueolóxica e tamén é ilustrador, decidiu publicar unha obra divulgativa pensando nun público non especialista para que coñezamos mellor a realidade e a vida castrexa e, en definitiva, a historia dos nosos devanceiros.
CANOSA, María, Candorcas e unicornios, Galaxia, Vigo, 2019, 152 pp. Fábula onde o mar, a natureza e a fantasía van da man nunha historia que busca entreter e tamén facer pensar. A dedicatoria do comezo avanza a idea do que o lector atopará despois: «A ti, que es diferente e saberías ser candorca ou unicornio». Nunca sobrará lembrar que na diferenza está a verdadeira beleza.
ESTÉVEZ, Xavier, Os camiños do vento, Xerais, Vigo, 2019, 216 pp. Lucas e Sara comezan o novo curso xuntos no instituto. O cambio á ESO non será doado, e menos cando xorde un novo misterio. Unha pequena ladroa de peixe aparece no peirao onde adoitan ir pasear. Na súa pescuda por descubrir quen é esa rapaza, aprenderán a ver o mundo con outros ollos e coñecerán dous novos amigos e a odisea que viviron ata chegar á vila: unha viaxe a través dos camiños do vento.
FERRARI, Andrea, También las estatuas tienen miedo, Loqueleo, 2018, 152 pp. Florencia, a protagonista, narra en primeira persoa os avatares que sofre desde o divorcio dos seus pais. Apenas entra diñeiro na casa e o curso está a ser un desastre. Pero non dubida en poñerse a traballar como estatua vivente nun parque, para así poder sufragar os gastos, polo menos, dos libros do colexio. Ferrari logra manter o interese de forma constante e converte o relato das vivencias desta rapaza nunha aventura moi enriquecedora e divertida.
GOSCINNI, UDERZO et alii, Astérix: A filla de Vercinxetórix, Xerais, Vigo, 48 pp. No ano 50 a. C. na Galia conquistada polos romanos unha aldea resiste. A vida non é doada para os lexionarios nos reducidos campamentos de Babaórum, Aquárium, Laudánum e Petibónum... Unha misteriosa adolescente chega de noite á aldea. Xulio César e os seus lexionarios búscana, pois murmúrase que o seu pai é o gran Vercinxetórix, vencido dous anos antes en Alesia.
HARROLD, A. F., Una canción de muy lejos, Blakie Books, 2019, 230 pp. No soto da casa de Nick soa unha canción misteriosa. E é mellor que ninguén saiba de onde sae esa música. Cada día na clase ve a unha nena chamada Frank que tamén garda un secreto. Séntese soa, pero non quere contarllo a ninguén. Unha tarde, Nick descubrirá o secreto de Frank. E ela, o de Nick. Pero todos os segredos entrañan perigos: nese soto hai xanelas que dan a outros mundos e seres que desexan atravesalas; só Nick e Frank poden detelos.
PEDREIRA, Enma, Os corpos invisibles, Xerais, Vigo, 2019, 176 pp. A protagonista desta obra (Premio de Literatura Xuvenil Jules Verne 2019) é unha rapaza de quince anos traballadora nunha fábrica téxtil do Londres da Revolución Industrial. A súa vida cambia cando le unha carta escrita por Prometea Stoner, unha muller propietaria dunha cadeira de rodas motorizada, cunha saúde fráxil mais cunha vontade de ferro. As vidas de ambas son diferentes, pero as dúas buscan a liberdade, a existencia e o recoñecemento que a sociedade lles negaba a elas e a todas as súas compañeiras.
POE, Edgar A. e MIRCALA, F., Versos para Musas y cuatro cuentos de Edgar Allan Poe, Bululú, A Coruña, 2019, 84 pp. Nesta escolma descubrimos os amores perdidos, as mulleres -reais e imaxinarias- que inspiraron a Poe; recuperamos cantos, poemas e relatos inesquecibles; escritos que xa forman parte do acervo popular. Os sentimentos que destilan ecoan con forza dous séculos despois e brillan con nova intensidade grazas ás imaxes de Mircala.
RÍO, Anémona de (Aldara ÁLVAREZ GARCÍA), Tam, Retranca Editora S. L., 2018, 78 pp. Unha análise dos ataques ao aspecto físico da muller por parte da sociedade e a influencia tiránica do mundo da moda entre os gustos da mocidade. Este primeiro manga galego presenta a historia da moza Tam que recibe unha invitación para participar nunha cea de antigos alumnos. Hevin, o seu amor platónico, tamén irá. Mais as súas inseguridades e a opresión dos modelos de beleza impostos farán que dubide ir... Conseguirá Tam sentirse ben consigo mesma?
TOMÁS, Xosé e ROSALES, Diego, Luzbell. O demo bombilla, Galaxia, Vigo, 2019, 68 pp. Nesta novela gráfica Luzell, o demo bombilla, xefe dun exército de diaños, está disposto a facer o mal e traer a desgraza e a destrución aos humanos… Se lle deixan!!!
BACHARELATO BUSTOS, Luís, Fariña. A novela gráfica, Xerais, Vigo, 2019, 128 pp. Reinterpretación como novela gráfica da exitosa obra homónina de Nacho Carretero. Unha obra áxil, fermosa e directa que nos mergulla na Galicia do contrabando nas rías, das planadoras, dos clans, dos capos, da impunidade e do narcotráfico.
CARVALHO CALERO, Ricardo, Scórpio, Através Editora, 2017, 304 pp. Quen é o enigmático Scórpio? Quen é ese rapaz que medra no Ferrol dos anos dez? Quen é ese brillante estudante da Universidade Compostelá dos anos vinte? Quen é ese mozo que embriaga de desexo ás mulleres que coñece? Quen é ese novo poeta que escribe en galego? Quen é ese capitán republicano que loita contra os facciosos? En 1987 Carvalho Calero con esta novela recibe o Premio da Crítica de narrativa, logo chega o esquecemento do autor e da súa obra por mor do seu lusismo.
HERMO, Gonzalo, Diario dun enterro, Galaxia, Vigo, 2019, 128 pp. Esta novela, premio de Narrativa Breve Repsol 2019, presenta a historia de Xacobe, un escritor mozo que vive en Barcelona e recibe a nova da morte do seu avó materno. Cando regresa a Eiradona, a vila galega onde naceu, vólvese encontrar coa familia e cunha nai mancada polo pasado. Baixo a influencia da personalidade do finado, Xacobe revive a súa infancia e, sobre todo, a relación cun amigo íntimo que axiña ha perder. Aquela primeira experiencia da separación volve agora co afastamento definitivo producido pola morte.
LEIRA, Rocío, Veleno en familia, Baía, 2019, 160 pp. Un ingreso hospitalario fai saltar polos aires un triángulo familiar no que nada é o que parece. Unha trama intrigante na que todas son vítimas e verdugos para dar conta dun crime perfecto nunha familia imperfecta. Esta obra finalista do I Premio de Novela Vilar Ponte (2018) é, segundo o xurado, “unha radiografía da sociedade galega actual” con “dinamismo narrativo e polifonía de voces”, que realiza “unha excelente recompilación de fraseoloxía de linguaxe popular” e que contén “unha análise da situación específica das mulleres”.