Cinexornal 3

Número 3

I.E.S. “San Paio” — Tui

MARZO 2020

CINE para tempos de PANDEMIA FILLOS DOS HOMES (Alfonso Cuarón, Gran Bretaña, 2006) Filme baseado na novela distópica The Children of Men de P. D. JAMES (en español: Hijos de hombres, Ediciones B, 2018, 352 pp., comeza a lela premendo aquí).

No ano 2027 os humanos están a piques de extinguirse: os homes perderon a capacidade de procrear e ignórase o motivo polo que todas as mulleres do planeta son estériles. Ao mesmo tempo, o mundo estremécese cando morre un mozo de 18 anos, a persoa máis nova da Terra. Vívese, pois, unha situación de caos galopante. En tales circunstancias, Theo, un desilusionado ex-activista radical de Londres convertido en burócrata, é contratado por Julian para que protexa a unha muller que pode ter o secreto da salvación da humanidade, a persoa máis valiosa da Terra…

FRONTEIRA (Manuel Pérez Cáceres, España, 2013) Os ensaios dun grupo de teatro son interrompidos por unha alarma. Atopámonos dentro da prisión de Quatre Camins e o sinal indica o illamento dos módulos. O grupo, integrado por seis presos e oito persoas do exterior, permanecerá illado por unha epidemia de orixe descoñecida. A falta de información e o temor a un posible contaxio poñerá a proba a súa fortaleza e cambiará para sempre as súas vidas.

O LIMPADOR (Adrián Saba, Perú, 2012) A cidade de Lima padece a invasión dun virus que en apenas unhas horas termina coa vida dos seus habitantes. Ao parecer estamos diante dunha enfermidade estraña e indescifrable para a medicina, pero altamente contaxiosa. Eusebio é o limpador, quen tras a morte dalgunha persoa pasa por alí para desinfectar e limpar os rastros do virus e de sangue. Nunha desas limpezas atopa a Joaquín, un neno de oito anos cuxa nai falece a causa do virus. Sen orfanato dispoñible para poder deixar ao neno, Eusebio non atopa outra alternativa máis que aloxalo na súa humilde casa e tentar buscar a algún familiar. Unha peculiar historia de tolerancia e comprensión.

MARABILLOSO BOCCACCIO (Paolo e Vittorio Taviani, Italia, 2015) Adaptación libre do Decamerón. Fuxindo da Peste Negra que azouta Florencia, dez mozos refúxianse no campo e pasan o tempo contando breves historias. Tráxicos ou enxeñosos, eróticos ou grotescos, todos os relatos teñen un único protagonista, o amor nas súas múltiples formas. E o amor acabará sendo, para estes mozos, o mellor antídoto contra o sufrimento e as incertezas da época.

NAI E PAI (Brian Taylor, EE. UU., 2018) Unha parte da humanidade sofre unha mutación terrible que afecta á súa conduta ata entón civilizada e que fai dos pais asasinos dos seus fillos O instinto de protección que define a calquera proxenitor e en xeral a calquera adulto respecto aos máis novos da especie habería transmutado en instinto de destrución. Carly e Joshua tratarán de sobrevivir nestas circunstancias, ameazados por uns proxenitores que posúen os trazos de Nicolas Cage e Selma Blair.

OS ÚLTIMOS DÍAS (Álex e David Pastor, España, 2013) Unha misteriosa enfermidade esténdese por todo o planeta. A poboación, dominada polo pánico, négase a saír á rúa para evitar unha morte fulminante. Mentres a civilización se desmorona, en Barcelona Marc, que non poder saír das oficinas onde traballa, emprende unha misión case imposible: a procura de Julia, a súa noiva embarazada e desaparecida.