6 minute read
Angina pectoris
tin mas komprenshon pa e aspektonan akí, miéntras te ainda hende ta keda wak balornan di midi puramente kardiológiko for di perspektiva di hende hòmber so.”
Un ekspreshon notabel den e pida akí ta ‘kapasidat pa dil ku tenshon’. Esaki ta bo kapasidat pa esforsá bo kurpa òf bo kapasidat pa dil ku karga. Bo elastisidat, bo kapasidat di rekuperashon, bo agilidat. Den kuminsamentu, m’a nota e falta di kapasidat pa dil ku tenshon fuertemente i mi tabatin hopi difikultat tambe pa regresá trabou bèk. Mi balornan di midi kardiológiko (preshon di sanger, kolesteròl, ECG, peso, etc.) tur tabata bon na òrdu despues di kuater luna, pero tòg mi no tabata sintimi realmente kla pa kuminsá traha. Pa oumentá komprenshon pa mi situashon, mi a te hasta laga gerensia i e manager di rekurso humano lesa e pasashi anterior for di Angela Maas su buki.
Loke no ta yuda tampoko, ta e echo ku despues di algun luna di biba salú, bo ta mustra hopi mas mihó. Ora ku m’a regresá trabou bèk, tur hende tabata bisami ku mi tabata mustra tremendo. Nada straño: mi tabata kome bon, hasi deporte, mi no tabata huma mas, tabata bebe hopi ménos i drumi sufisiente! Pero esaki no ta bisa nada ainda di bo kapasidat pa bolbe bai traha bèk. Naturalmente ta dushi pa bo ta mustra bon, pero no ta p’esei nan ta pagabo. Den kuminsamentu ta hopi difísil pa kombiná bo estilo di bida nobo saludabel i aktivo ku bo aktividatnan diario, bo tareanan doméstiko i un trabou tambe aserka. Maske bo ta super salú atrobe segun e balornan di midi kardiológiko, bo ta ripará tòg ku bo energia ta kaba mas lihé i ku bo por ménos ku promé ku bo atake di kurason. Bo mes ta ripará ki bo límite ta, i bo sa kon largu bo por keda mantené un aktividat. Kosnan ta bai ménos bon un biaha i bo ta kansa mas lihé? No buska moda di fòrsa bara e ora ei. Bo rekuperashon ta bai ku subida i bahada i esaki ta tuma su tempu. Lo bo ripará ku alalargu bo ta kai den un ritmo nobo kaminda bo ta sintibo dushi. Esaki ta ègt un kestion di tempu. E mihó kos ta pa bo oumentá e trabou tiki tiki den konsulta ku e dòkter ku ta tratabo i bo dòkter di Arbo. Ku nan bo ta deliberá di ki manera bo por kuminsá traha i kon lihé. Despues di seis siman, e servisio di Arbo lo evaluá si bo por kuminsá traha ful bèk. Denter di ocho siman, bo doño di trabou, den konsulta ku bo, mester traha un plan pa bo reanudá trabou bèk. Kada seis siman bosnan ta deliberá riba e progreso. Si ta nesesario, bo dòkter di Arbo ta konsultá bo dòkter di kas òf kardiólogo. Den e kuadro akibou bo por lesa kon mi regreso pa trabou a bai. Tin biaha bo por kuminsá ku bo funshon aktual, tin biaha (temporalmente) lo bo haña otro tarea òf trabou adaptá. Bo mes tambe mester indiká loke ta bai bon i ménos bon òf loke bo tin miedu di dje. Si bo no tin gana pa nan mirabo komo pashènt, lo bo aseptá mas kos ku bon mirá lo bo no por kuné. Of nèt kontrali: bo por tin dje tantu miedu ei pa algu no bai robes, ku bo ta evitá sierto tarea. Papia ku bo hefe di servisio, kolega i dòkter tokante bo sintimentu-, inseguridat- i hanshanan. Ta mihó bo mes indiká kiko bo por dil kuné i kiko nò.
“Kuater luna despues di mi infarto di kurason, m’a kuminsá traha mitar dia. Esaki tabata dushi si, pasó riba e otro mitar dianan mi por a dediká tempu na kushiná salú, hasi deporte, kana i gewon hasi kos pa mi mes. Di otro banda esaki no tabata ideal tampoko, pasó mi no tin un trabou ku bo por hasi den 20 ora. I esaki tabata sòru pa èkstra strès. Despues di seis siman, e konklushon di tantu mi dòkter di kas komo mi kardiólogo tabata ku mi no tabata kla pa kuminsá traha ful bèk, pero ku mitar dia tampoko no tabata e solushon. E ora ei, den konsulta ku mi doño di trabou, mi a haña dos siman mas di vèrlòf kompletu di dòkter i pegá na esaki m’a plania un fakansi. Finalmente ta te despues di shete luna numa, m’a bai traha kompletu bèk.”
7.1 Moveshon: ta realmente nesesario pa mi kuminsá kore i praktiká yoga?
Move pa keda salú no ta un hype moderno. E influensia bentahoso di aktividat físiko riba salú di hende tabata konosí kaba serka griegonan di antigwedat i den sivilisashon indio di 2500 aña pasá. Esaki ta un sitado di e dòkter griego, Hippocrates for di e di kuater siglo promé ku Kristu:
Ekantidat korekto di nutrishon i ehersisio físiko, no di mas ni di ménos, ta e kaminda mas seif pa un bon salú.
Tòg 40 porshentu di hende na Hulanda ta muchu pisá i 80 porshentu ta move muchu tiki!
Sufisiente moveshon ta bon pa bo kurason
Dikon moveshon regular ta asina bon pa bo kurason i lo mester forma parti di bo plan F4L? Sufisiente moveshon di kurpa ta mantené (muraya interior di) bo kurason i vasonan di sanger den kondishon i ta kombatí dañonan chikí na e muraya interior di vasonan di sanger. E ta redusí e proseso di infekshon den bo vasonan di sanger i ta kombatí biramentu smal di vaso. Manera bo por a lesa anteriormente kaba, sufisiente moveshon por te hasta sòru pa traha vaso kapilar nobo i ku esaki forma ‘bypassnan’ natural den e sistema di vaso koronario rondó di bo kurason.
Aktividat físiko tin un influensia positivo tambe riba bo peso, bo preshon di sanger i nivel di kolesteròl den bo sanger. E ta baha e preshon di sanger i ta prevení komplikashonnan di preshon di sanger haltu. E ta baha mal kolesteròl LDL i ta oumentá bon kolesteròl HDL. Esaki ta nifiká ku ora bo ta move, bo ta traha riba kuater faktor di rísiko pareu! Sobrepeso ta sòru pa un karga èkstra pa bo kurason. Baha di peso ta bon tambe pa bo preshon di sanger i bo kolesteròl. Ke men, asina e faktornan di rísiko ta reforsá otro. Tantu den sentido negativo komo positivo. Den un entrevista ku vrouw.nl, kardiólogo Janneke Wittekoek ta bisa ku ta sientífikamente demostrá ku pashèntnan di kurason tin benefisio di praktikamentu di yoga. For di un investigashon merikano a sali na kla ku pashèntnan di kurason ku a partisipá na un programa di yoga pa dos luna, tin sorprendentemente ménos molèster di nan malesa ku pashèntnan ku ta uza solamente remedi. E partisipantenan di yoga tabatin ménos problema médiko i tabata mas satisfecho ku nan kalidat di bida. Segun e investigadónan, esaki ta dor ku yoga ta un bon método deportivo pa hende ku problema di kurason. Mayoria biaha nan ta move ménos, pasó nan tin rosea kòrtiku òf nan ta haña doló den pechu ora hasi esfuerso físiko. For di e investigashon a sali na kla ku yoga sí ta un forma di moveshon ku ta agradabel i sigur pa nan.
