Dikon remedi?

tapá por lo ménos 8 ora. Sefta e djus i deshasí di tur sobrá di kané, gèmber, etc. Ward’é den frishidèl.

Komo sosten pa redusí òf stòp ku bebementu di alkohòl, lo bo por hasi uzo di un app. Por ehèmpel, e Maxx-app ku Trimbos-instituut a desaroyá. Of bo por partisipá na e programa IkPas, kaminda bo no ta bebe alkohòl pa un luna largu (tambe ku un app).

7.3 Strès: bai ‘gewon’ un tiki mas trankil?

Den sierto situashon, strès ta un reakshon mashá normal di bo kurpa. E ta yudabo keda skèrpi i reakshoná alertá. Pero strès ta oumentá e chèns riba malesa kardiako i vaskular, sigur serka hende muhé. E síntomanan mas komun di strès ta: • sla di kurason i respirashon aselerá; • kansansio i falta di energia; • hopi òf yùist tiki gana di kome; • doló’i kabes; • doló muskular. Bo por tin problema ku sodamentu tambe, problema ku soño, preshon di sanger haltu i birament’i kabes.

Efektonan indirekto di strès riba bo salú por ta lo siguiente: • Bo ta bai huma mas òf bo ta bolbe kuminsá huma. • Bo ta kome insaludabel. • Bo ta bebe (muchu) hopi alkohòl. • Bo ta move tiki. Tur esakinan ta faktornan di rísiko pa malesa kardiako i vaskular.

Strès kontinuo pa largu tempu por resultá den un preshon di sanger haltu, un nivel di kolesteròl haltu i reakshonnan di infekshon. Esaki ta kousa daño na e muraya di vaso i bo ta aselerá kreashon di vasonan ku ta bira smal (kalsifikashon di arteria). Si bo tin hopi strès, ta importante pues pa bo hasi algu na dje. Pero kon bo ta baha strès den bo bida? Hopi hende ku bon intenshon lo bisa e ora ei: “Bai un tiki mas trankil, shon.” Pero kon bo ta hasi esaki? E di tres F di e Plan F4L ta para pa focus (enfoke). Kiko enfoke tin di ber ku strès awor? Bo por splika esaki na dos manera: 1. Dor di enfoká òf fiha bo mente riba loke ta realmente importante i no preokupá pa tur otro kos, bo por redusí strès den bo bida. 2. Dor di enfoká riba bo mes, bo kurpa i bo halament’i rosea, bo ta krea un mindfulness (konsiensia) ku ta yudabo relahá i redusí sintimentunan di strès.

Mi aserkamentu pa e F di focus i pa redusí strès, ta konsistí di tres stap: 1. Buska pa sa kiko ta dunabo mas strès i dil ku e kousanan akí ku un plan konkretu. 2. Krea mas relahamentu den bo bida dor di mindfulness i un otro mindset. 3. Drumi mas i mihó.

Kiko ta dunabo strès i kiko bo por hasi na dje?

E promé stap ta pa deskubrí kiko ta tur e kosnan ku ta dunabo strès. Kiko ta e kousanan di bo strès? I nan no mester ta kosnan grandi manera preokupashon di sèn òf muchu tarea di kuido. Por ta e potoshi riba bo buró òf bo outo ku ta keda lagabo na kaya. Unabes bo sa kiko e kousanan ta, bo por traha un plan pa hasi algu na dje. Dor di tin un plan so kaba, lo bo eksperensiá ménos strès. Aloménos den mi kaso sí tabata asina.

Mi a literalmente traha un lista di e kosnan ku tabata kousa strès serka mi i loke mi lo a bai hasi na nan. M’a warda e lista akí den mi pòtmòni i na momentu ku mi a ‘terminá’ algu, mi tabata pasa un strepi dor di dje.

A dura algun luna si promé ku mi a pasa strepi dor di kasi tur kos (te ainda e último punto ta pará habrí), pero m’a eksperensiá hopi trankilidat di sa ku mi tabata hasiendo algu konkretu pa atendé ku loke tabata okashoná strès serka mi.

Un di e kosnan mayó ku ta okashoná strès serka mi, i probablemente serka hopi mama trahadó di yunan ku ta bai skol, ta e kore kore ku yu, hiba i buska na skol i despues di ora di skol, kore hiba nan serka nan amiguitunan, klupnan deportivo òf lès. Simplemente mi no por a kombiná esaki ku mi trabou i otro okupashonnan. Dor ku nos tabatin un señora pa wak yu ku tabata na kas ku e muchanan despues di ora di skol, e solushon tabata pa kumpra un outo chikí segunda-mano p’e, ya asina e por a tuma e tarea di korementu akí over. Ideal! E trankilidat ku esaki ta dunami tabata realmente bal e invershon. I semper mi por bolbe bende e outo ei, ora no tin mester mas. Un otro punto di preokupashon tabata ku, dor di mi atake di kurason, diripiente m’a hañami konfrontá ku e echo ku mi no por a biba pa semper. I mi no tabatin nada reglá pa e momentu ku mi no tabat’ei mas. Ke men, basta lihé despues ku mi tabata na kas bèk, m’a traha un sita ku un notario pa laga traha un tèstamènt. E ta dunami hopi trankilidat pa sa ku tur kos ta bon reglá awor i fihá den un tèstamènt pa si mi mester bin fayesé. Mayoria otro kos ku ta okashoná strès serka mi tabatin di ber ku mi kas. Dor di mi bida okupá, kuido di kas a keda neglishá un tiki. Konsekuentemente, e situashon den kas tabata sòru pa hopi strès innesesario: no por haña kosnan den sala, pasó esaki tabata un chiké, no por hasi uzo di e mesa di salon, pasó tin stapel di buki ariba, iritashonnan tur dia pasó e stof i fòrnu no tabata traha bon, e imposibilidat di risibí bishitá òf hende pa hasi trabou, pasó nos no por a sera e kachó un ratu den un kouchi, no por toka piano na un manera desente, pasó e krùk di piano ta kibrá... Bo no por imaginá bo kuantu strès tur esakinan tabata kousa. No ta pòrnada ku decluttering ta un hype awendia. Marie Kondo di Hapon ta un berdadero guru riba e tereno akí. Su moto ta: “Ordená bo lugá, transformá bo bida.” I e ta traha ègt! Un kas ordená kaminda tur kos ta funshoná manera nan lo mester funshoná, ta duna hopi ménos strès. Mi ta leu fo’i pone tur lès di Marie Kondo den práktika, pero e komienso t’ei. I tabata te hasta plasentero pa ordená kosnan, pasó m’a topa buki i kosnan ku m’a pèrdè òf di kua m’a lubidá limpi ku mi tabatin nan mes.

Tur hende tin su mes lista di kosnan ku ta okashoná strès serka dje. I pa kada hende tin otro solushon. Importante ta pa bo no hasi bo lista muchu largu. E mester ta realístiko si pa bo por kaba bo lista denter di algun luna. I kuminsá e ora ei ku e punto te ariba di bo lista.

Si bo tin problemanan mas grandi ku ta okashoná strès òf si bo no ta logra sali afó bo so òf ku yudansa di bo partner òf un bon amigu/a, lo mi rekomendá bo pa buska yudansa serka un trahadó sosial òf un sikólogo. Pidi bo dòkter di kas pa un referensia.