Defisiensia di ritmo kardiako

Otro bentaha di moveshon

Bo no ta konvensí ainda? Banda di e echo ku e ta bon pa bo kurason, sufisiente moveshon tin kantidat di otro bentaha: • E ta baha e chèns riba demensia (demensia vaskular, esta demensia komo konsekuensia di vasonan di sanger insaludabel, ta e forma mas komun di demensia). • E ta mehorá funshon di bo sesunan: bo memoria ta mehorá, bo por pensa, plania i organisá mihó. • E ta redusí e chèns riba diferente tipo di kanser i te na ora bo bira malu mes, e chèns pa bo fayesé ta muchu mas abou. • E ta mehorá baimentu af. • E ta oumentá endorfina (e ‘hormon di suerte’) den bo kurpa loke ta pone ku bo ta bira depresivo ménos lihé. • E ta redusí problema ku doló króniko, problema ku lomba i otro problema ku skarní. • E ta redusí perdida di múskulo. • E ta baha e rísiko riba deskalsifikashon di wesu (osteoporosis). • E ta redusí tantu doló di menstruashon komo problema ku menopousa.

Kon bo ta kuminsá?

Si bo no tabatin un estilo di bida aktivo i nunka a hasi hopi deporte, bo mester kuminsá move na un manera trankil. Esaki ta pa evitá efektonan sekundario manera defisiensia di ritmo kardiako, glukosa den sanger muchu abou, rosea kòrtiku, sobrekarga i doló muskular. Den un programa di revalidashon di kurason, nan ta yudabo kuminsá ku un estilo di bida aktivo. Ta importante pa sinkronisá e moveshon ku loke abo ta haña plasentero i ku bo por dil físikamente kuné. Realmente no ta tur hende gusta kore duru òf jog. Kanamentu ta mesun bon pa bo! Tin hende muhé ta loko ku yoga i otronan ta hañ’é muchu zonzo.

Ta dushi pa tèst aktividatnan deportivo nobo. Asina, dos siman despues di mi atake di kurason m’a kuminsá ku kurso di yoga pa prinsipiante, ounke semper m’a pensa ku esaki lo no ta nada pa mi. Pa mi sorpresa, m’a hañ’é yùist hopi dushi. Tantu e moveshon (físikamente e ta eksigí mas esfuerso ku m’a kere) komo e relahamentu ku e ta ofresé. Awendia mi ta praktiká yoga, dos biaha pa siman. Mas aleu, mi a deskubrí ku mi ta hopi bon den korementu riba un crosstrainer. Pero korementu riba kaya, si mi no ta haña dushi. Semper mi tabata hunga tènes, pero m’a deskubrí ku badminton tambe mi ta haña hopi plasentero. Fuera di esei, mi ta purba na landa por lo ménos un biaha pa siman i regularmente mi sa kana por lo ménos un ora (tin biaha ku mi kachó, otro biaha ku mi pareha i/òf yunan i tin biaha ku un grupo di kanamentu).

Mi por konsehá tur hende pa tèst diferente tipo di deporte òf aktividat deportivo pa asina bo chèk kiko ta bai ku bo i kiko ta hasibo kontentu. I naturalmente bo mester tene kuenta ku loke ta pas den bo skema. Den mi kaso, tabata bentahoso ku part’i mainta mi por a yega trabou un tiki mas lat, ya asina mi por a hasi un ora di cardiofitness, esta di mitar’i ocho pa mitar’i nuebe di mainta. Yoga mi ta praktiká miéntras mi muchanan mes ta na nan lès di deporte. Mi por kana anochi ora e muchanan bai drumi, pero tambe mainta trempan den wikènt ora hinter kas ta na soño ainda. Tènes mi ta praktiká durante un ora part’i anochi riba un kancha no muchu leu for di mi kas, ya e no ta tuma hopi tempu.

Si bo ke kuminsá ku korementu, tin un skema di korementu útil di Hartstichting. Den diesseis siman, bo ta subi bo korementu gradualmente te ora bo por kore kasi un ora sin stòp. Kada siman e ta bira un tiki mas pisá. Den kuminsamentu tin hopi pousa den e korementu, pero e pousanan akí ta bira mas kòrtiku kada biaha. Bo ta haña e skema di korementu akí riba website di Hartstichting.

Marion: “Ku mi 42 aña, m’a disidí di kambia mi bida drástikamente di un dia pa otro. Mi tabatin un bida drùk, un trabou di tempu kompletu (fulltime), kuater yu i m’a kaba di lanta un fundashon ku tabata guli tur mi tempu. Mi tabata huma mas ku un paki di sigaria pa dia i apénas mi tabata hasi deporte. Mi mester a bai un kongreso riba dunament’i pechu di dies dia den eksterior. Esaki a parsemi un bon oportunidat pa stòp ku humamentu. Un tiki straño pa bai para huma manera un bapor na un kongreso riba dunament’i pechu... Ora m’a regresá, nos tabatin amigunan ku tabata hospedá serka nos. Nan tabata train fanátikamente pa un maratòn. Nan a halami bai kore ku nan. Korementu tabata parsemi algu asina laf. Pero mi mester a gewon tèst e pa sa si e ta algu pa mi. Si mi por a kore di un pal’i lus pa otro, lo tabata mashá kos kaba. Pero ni esei mi no tabata por. E ora ei, nan a traha un skema pa mi, ku pida korementu kaba kanamentu pa traha gradualmente riba mi kondishon. Tur dia mi tabata bai fielmente ku nan i m’a kuminsá gusta tambe. I mi tabata sintimi dushi despues di train! Ora ku nan a bai, ami a sigui kore. Kasi tur dia despues di trabou, mi tabata bai kore un tiki promé ku mi bai kas. Pasó unabes ku mi tabata na kas, e muchanan no tabata ke pa mi sali bai mas.

Aworaki mi tin 58 aña i ku fasilidat mi ta kore 10 kilometer. E aña akí, mi a te hasta partisipá na Hell’s Gate Triathlon na Saba ‘where even the swimming is uphill’ (kaminda hasta landamentu ta manera ta un seru bo ta subi). Danki na hasiment’i deporte, m’a kuminsá adoptá un estilo di bida i komementu salú. Ku e estilo di bida ku mi tabatin promé ku mi 42 aña, sigur lo mi tabata un kandidato pa problema di kurason. Tantu mi tata komo mi tawela a haña un atake di kurason rondó di 50 aña di edat. I mi mama a muri na edat mas avansá di un atake di kurason. Mi ta kere ku m’a trese kambio den mi bida realmente na tempu.” Hopi hende ta haña plasentero pa hasi deporte huntu ku otro hende tambe. Bo por partisipá na lèsnan den grupo òf kuminsá hasi un deporte den tim. Bo por palabrá tambe pa kuminsá hasi deporte ku bo partner, un amigu òf amiga òf ku un grupo di amiga. Buska un kompañero di kanamentu òf korement’i baiskel, pa asina bosnan por motivá otro. Inskribí bo mes na un klup di kanamentu, baiskel òf fitness òf na un asosiashon deportivo. Informá na Unidat di Bario Kòrsou óf bo kas di bario, unda tin aktividatnan deportivo den bo bario. Pa hasié mas plasentero i dushi, bo mester di bon paña deportivo. Malkriá bo mes i kumpra algun bunita sèt di paña deportivo, un karson di yoga nobo, un nèchi bikini òf trahe di baño ku bo por landa dushi aden i no lubidá algun bon kèts pa e deporte ku bo ta praktiká i algun bon sapatu di kanamentu. Lo bo no haña duele di e invershon akí. Bon paña i sapatu lo durabo hopi tempu i bo ta sintibo hopi mas dushi den un outfit adekuá. Ku bo tin paña deportivo ku ta parabo nèchi, ta algu dushi tambe ku ta bin aserka! Mi mes tambe a hasi esaki i te ainda mi ta disfrutá tur dia di mi dushi outfitnan deportivo.

Kuantu moveshon ta ‘sufisiente’?

E norma pa sufisiente moveshon ta minimalmente 10.000 stap pa dia. Esaki ta un norma na Hulanda kaminda hende sa kana mas ku na Kòrsou. Akinan 8.000 stap pa dia ta un bon meta. Bo por registrá esaki ku un smartwatch òf via un app riba bo selular. Mayoria hende no ta ni yega 5.000 stap pa dia. E averahe riba un dia di trabou normal ta mas band’i 3.000 stap i esaki ta ègt hopi abou. Nos tur huntu tin un estilo di bida hopi inaktivo. Mayoria hende no ta konsiente kon tiki stap nan ta dal pa dia. P’esei ta rekomendabel pa kumpra un smartwatch òf pa baha un app riba bo selular. Ademas, ta dushi pa registrá e kantidat di stap i pa fiha meta pa bo mes pa ku e kantidat di stap i pa chèk si bo ta alkansá esaki. Awendia tin sufisiente smartwatch (barata) na benta.