TELQU ’L BARRA MAL-KAP U REĠGĦU DAĦLU BIEX MA JITILFUX MILL-ONORARJA

Tkompli minn paġna 1

Il-KullĦadd tista’ tiżvela li biex il-mossa politika tidher fuq it-televixin kulħadd qabad il-basket u deher jikkopera. Minkejja dan, kien hemm min, bil-kwiet, reġa’ daħal xħin ikkalmaw l-affarijiet. U dawk li daħlu qagħdu għal ftit minuti ġewwa biex, minkejja li l-Oppożizzjoni kienet assenti mill-Parlament, iserrħu moħħhom li ma titnaqqsilhomx €50 kull wieħed mill-onorarja.

Jidher li din il-mossa ġabet rabja kbira fil-Partit Nazzjonalista, bi strateġisti fid-Dar Ċentrali jgħidu li dawn id-deputati mminaw id-deċiżjoni u l-awtorità tal-Kap tagħhom stess. Iżda, fl-istess ħin, jirriżultalna li fost id-deputati kien hemm ukoll id-diskors li ma jistax ikun jiddeċiedu dwar mossi ta’ dan it-tip mingħajr imqar ma jkunu mgħarrfin bihom jew anke jiġu kkonsultati qabel, imbagħad jippretendu li huma jsegwu qisu qatt ma kien xejn.

Is-sorsi tagħna qalu li dan anke għax l-istess deputati fesfsu internament li l-Kap kien jaf li ma kienx qiegħed skont l-istanding orders tal-Parlament u, għalhekk, ma kellux jitlef ruling jumejn wara xulxin.

Nhar it-Tlieta, l-Ispeaker Anġlu Farrugia ma laqax it-talba ta’ Grech għal dibattitu urġenti fuq l-Air Malta, wara wkoll li l-Ministru Clyde Caruana spjega li t-taħditiet relatati mal-Kummissjoni Ewropea għadhom mhux konklużi.

Diżgwid fil-PN dwar mossi ta’ dan it-tip mill-Kap

“Li Kap tal-Oppożizzjoni, jumejn wara xulxin, juri li lanqas il-bażiku ta’ kif jaħdem il-Parlament ma jaf, mhux tajjeb. Nifhmu li ried jagħmel punt politiku … iżda biex tagħmel punt politiku trid tkun taf fuq xiex qed tibbaża l-argumenti tiegħek,” kienu kkwotati jgħidu sorsi fid-Dar Ċentrali. Dawn ukoll kienu kritiċi għall-mod kif l-Oppożizzjoni ħarġet ’il barra waqt dibattitu fuq suġġett sensittiv ħafna, bħalma hu dak tal-vjolenza domestika.

Il-Partit Laburista wkoll ħareġ stqarrija u kkritika bil-kbir din id-deċiżjoni. U l-għada reġa’ kien hemm diskussjoni sħiħa fl-ogħla istituzzjoni, bil-Partit Laburista jgħid li “minflok mar il-Parlament biex jiskuża ruħu għall-fatt li lbieraħ (it-Tlieta) ibbojkottja l-Parlament waqt liġi importanti dwar il-vjolenza domestika, il-Kap tal-Oppożizzjoni u d-deputati tiegħu reġgħu marru l-Parlament jieħdu r-raġun u jkunu arroganti waqt seduta li ddiskutiet l-istess suġġett.”

B’referenza għall-aġir vjolenti fl-ogħla istituzzjoni li wriet l-Oppożizzjoni x-xahar li għadda, kif kien żvelat minna permezz ta’ ritratti ppubblikati juru lil Bernard Grech innifsu u Chris Said jisfidaw lin-naħa tal-Gvern għallġlied, il-Partit Laburista kompla jgħid li “mhux ta’ b’xejn li deputati tiegħu heddew deputati tal-Gvern. Mhux ta’ b’xejn il-folla barra l-Parlament kienet vjolenti inċitata mill-istess Kap tal-Oppożizzjoni. Għax meta żbalja, minflok skuża ruħu, wieġeb b’arroganza u insensittività.”