9 minute read
TIEMPU DE MAYAR
La vecería marca un añu de mazana escaso. Les ellevaes temperatures y la seca tampocu nun aidaron a la collecha. Entrugamos a los llagareros comu encaren la mayada del 2022
Tamos en tiempu de mayar y como yá tamos ansiosos por saber daqué de la sidre que vamos beber l’añu que vien, pedimos información a los que meyor mos la puen dar, los llagareros, que cola mayada yá fi ná o metanes d’ella van calculando de primer man comu va salir la viniente collecha de sidre
Advertisement
Gustavo Costales Palacio. Sidra Frutos
¿Cómo va la collecha esti añu?
Nun toca collecha, asína que ya contábamos con que diba haber poca, pero incluso dientro d’eso ye verdá qu’hai menos mazana tovía qu’otres veces. Ca vuelta ye más estrema la diferencia pente l’añu de collecha y el que num toca. Ye verdá que dentro de la denominación d’orixen hai cosecheros que compensen más la vecería, pero pa la sidra tradicional siempre traemos dalgo de fuera, pa suplir les carencies de la vecería.
¿Vais mayar tanto comu otros años?
La cantidá de mazana que mayamos sedrá la mitá que la del añu pasáu, más o menos, pero vamos completar colo que sobró del añu pasáu.
¿Cómu va repercutir eso na sidre?
La sidra tendrá un poco más de alcol, pero al haber sidra del añu anterior val de base pa trabayar, meciendo pa conseguir una bona calidá media.
¿Y nel so preciu?
La mazana subió de preciu, comu ye llóxico. Too sube, nun conozo nengún productu que nun suba nesti momentu. El problema nun ye lo que subiere hasta agora, la cuestión ye ver cuándo va aparar está escalada.
Jose Luis Piñera. Sidra Piñera
¿Cómo veis la collecha d’esti añu?
Esti añu ye alarmante la falta de mazana qu’hai. Xuntamos la vecería con que’l pasáu foi un añu de collecha histórica, polo que ta l’árbol cansáu; depués tuvimos un branu calurosisimu o más, con esi calor de la poca manzana qu’había perdióse mucha... vas sumando factores. Amás, la mayor parte de pumaraes tradicionales cuídense mui poco, recuéyese la collecha cuando ye un añu buenu pa vendelo y el restu’l tiempu nun se mira pa ello, asina qu’e encontramosnos que tenemos namás la mazana de les nueves plantaciones pa poder ellaborar sidra esti añu.
¿Cuánta manzana pensáis mayar?
Nosotros tamos mayando dalgo más de la mitad de lo que mayamos l’añu pasáu, prácticamente pa llenar el llagar. L’añu pasau hubo cosechona asi que mayamos de más.
Pero cola poca qu’hai, ¿d’onde vais sacar la mazana?
Esti añu cola vecería que hai, ponte que’l 25% de la mazana que vamos a usar seya asturiana, el resto vendrá de fuera, sobre tou de Francia. Eso si, lo que traemos de Francia son variedaes mui buscaes, pa facer sidre mui paecio a lo d’equí. En Francia hai munches variedaes de mazana y escoyemos les que son acidulaes, variedaes mui asemeyaes a les nuestres.
¿Qué carauterístiques tien la mazana del 2022?
Lo que mayamos hasta agora, en contra lo que pensábamos, ta siendo baxo en zucre y mas o menos como suele ser la mazana que tenemos equí, muncha calidá pero non mui dulce. Tamos escoyendo bien la manzana y basándome n’ello yo espero que sea una collecha buena de sidra.
¿Esta escasez infl uye nel preciu fi nal de la manzana y poro nel de la sidre?
Si, claro que subió, ente un 10 y un 12 por cientu. Llóxicamente, dalgo va repercutir nel preciu la sidra, los llagares nun somos ONGs, nin vivimos del aire. Va infl uir non solo la manzana, sinon tamién los incrementos en los precios de la lletricidá, del gasoil pal trasporte de la sidra... y lo mismo que subió too, el preciu de la sidra tamién subirá, trataremos de que sea lo menos posible, pero habrá que repercutilo.
Pedro Baldó. Llagar El Duque
¿Qué tal ves la collecha?
Mui escasa, la mazana ye pequeña. El porqué nun lo se, la vecería seguro qu’afecta porque l’añu pasáu dieron muchísimo y yo por exemplu les plantaciones que llevo nun s’abonen. La seca yo creo que non. ¿Dalgo más qu’haya nel ambiente? Eso quién lo sabe, nun sabemos nada.
Entós pa compensar, ¿Vas trayer mazana de fuera?
Non, yo nun importo mazana, yo prenso namás manzana d’equí. Esti añu voi prensar unes 18 tonelaes como muncho. Multiplícalo por ochenta o así y tienes lo que mayé l’añú pasáu.
¿Como va salir la sidre d’esti añu?
La experiencia que tengo ye que cuando más poca cosa paez la mazana que prenso ye cuando meyor sidra me sal. Ties una mazana ruina, piqueña y fea y esa ye la que te da una sidra coyonuda. Prenses mazana grande, hermosa y salte una porquería, ties problema cola fermentación, ties problema con too, asina que yo pienso que va salir una sidra buena.
¿Y va haber xubía de preciu?
Non, el preciu nun tien por qué subir, porque los que compren mazana de fuera traenlo más barato que lo d’equí, nun se porqué la d’equí ye tan cara y sal la mazana francesa más barata que la d’equí, si será polos impuestos, por que les pumaraes tan anticuaes, por too un pocu… habrá que mirar por qué.
Julián Castañón. Sidra Castañón
¿Cuánta mazana pensáis mayar esti añu?
Vamos mayar tolo que nos venga, que nun va a ser tolo que nos gustaría; necesito mayar bastante, porque quédame poca sidra del añu pasáu, pero no va a poder ser tolo que quixera. Hai mui poca manzana, y non solo de lo d’equí, también de la de fuera. Toi consiguiendo manzana, si, pero non pa mayar tanto como otros años.
¿D´ónde trayéis la mazana?
La mayor parte de la mazana asturiana que conseguimos utilízase pa la DOP, que ye de lo que hay más mazana, y d’ello da pa llenar bien. Mazana común nun ta entrando na, así qu’habrá que comprar bastante fuera. Casi tolo que traigo de fuera vien de Galicia, que facía años que nun compraba allí, y son les mismes variedaes que uso d’equí, ye mazana asturiana, pero collechada en Galicia, así que la sidra nun va variar les sus característiques. Tamién traeré dalgo d’Alemania y Francia, pero muncho menos.
¿A qué se debe esta falta de mazana?
La vecería famosa. Si ye verdá qu’hubo más seca y perxudicó un poco, pero l’añu que toca manzana da igual que llueva que non, hai manzana. Si nun toca mazana ye cuando too afecta. Y nun somos quien a eliminar esti problema.
Aparte d’escaso, ¿Qué característiques tien la mazana del 2022?
Lo que tamos mirando ye bastante similar a lo d’otros años, más o menos igual de zucre y con una densidá media de 1.040, que ye lo ideal, rondando la media d’otros años. En la sidra nun va haber variación d’alcol nin d’otres característiques.
¿La xubía del preciu de la mazana va repercutise nel preciu la sidra?
El preciu fi nal de la sidra tendrá que subir, claro, nun se si ye pola escasez, pero la manzana ta pagándose un cachu más. Supongo que se tendrá que repercutir, pero non solo’l preciu de la mazana, sinón toles xubíes, yo esti mes pagué más del triple de lluz… dalgo habrá que subir la sidra Menos mal que’l mercáu esti añu ta diendo bien, los bares tan furrulando, los últimos díes veo que tan animándose les barres, que taben un poco paraes, paez que se ve movimientu, hai xente, el puente fue buenu; pero como dende’l gobiernu nos falen tanto de la crisis que ta por venir, habrá que ver que pasa.
Rubén Pérez. Sidra El Piloñu
¿Cómo ta siendo la collecha nesti añu?
La collecha esti añu yo toi viéndola más escasa qu’otros años… hai que tener en cuenta que tamos en añu par y la vecería, yá se sabe, sin embargo ta siendo aún más escasa, creemos que la climatología puede tener dalgo que ver.
¿Qué consecuencies va tener eso na sidre?
La consecuencia, en cuanto a produción, que va ser menor, pero la calidá nun tien por qué baxar, al contraru de fechu va ser entá meyor porque esti añu diéronse les condiciones buenes pa tener buena materia prima, un branu secu y lluéu dalgo de lluvia n’agostu. La mazana tien una calidá fabulosa, vamos tener sidra, non abundante, pero si mui mui bona.
¿Hai mazana abondo pa mayar n’Asturies?
Eso depende, si preguntes a los del Conseyu Denominador van decite que cola mazana qu’hai, hai de sobra. Nosotros creemos que si, que va llegar pa la DOP pero pa la sidra que se pon nel mercáu nun va llegar. Hai dellos factores, lo primero porque la mazana ye escasa, lo segundo porque Asturies tien la evolución que tien y que la orografía nun mos permite tener muncha producción. Yo creo que necesitase bastante mazana de fuera.
¿Eso repercutirá en costes?
El preciu la mazana va subir, pero non porque la manzana se traiga de fuera, nin la sidra va subir pol preciu la mazana. Va subir porque los costes d’enerxía son altísimos. el corchu subió munchísimu, el papel subió munchísimo… Sube, sube, sube too, colo que tamién va subir la materia prima. Pero si hai que subir los precios nun va ser pola mazana, va ser por too.
Gerardo Menéndez. Sidra Menéndez
¿Cómu ta siendo la collecha de mazana esta temporada?
Esti añu tenemos una collecha pequeña de mazana, equí n’Asturies, pero la mazana que ta entrando ye de bona calida, oseya qu’hai bona mazana y va haber bona sidre. Yo entiendo que se debe a la veceria, que n’Asturies tenemos un añu con mucha mazana y un añu con mui poca. Por suerte en Menéndez tenemos tratos con pumaraes grandes y con una cooperativa d’equí, que nos van a dar la sufi ciente manzana como pa facer la de DOP y que mos queda la sufi ciente pa mecer cola manzana que tenemos que venga de fuera d’Asturies
¿Podemos decir entós que la calidá de la sidre ta garantizao?
Si, al fi nal ya te comenté que nosotros pa facer la de Denominación d’Orixe tenemos la mazana sufi ciente y pa la sidra normal, al fi nal, ye lo que pasa siempre ca medios años, el públicu yá ta avezáu a tomar sidra con dalgo de mazana que se traiga de fuera Aparte, l’añu pasáu hubo cosechona y tovía queda dalgo de sidra del añu anterior, así que ente lo que queda de sidre del otru añu y que lo que producimos lleva un bon porcentaxe de mazana d’equí nun creo que la xente vaiga a notar diferencia, ya tamos avezaos, ca segundu añu pasa, nun tenemos problema.
Con too esto ¿tenemos que preparanos pa una subía de preciu de la sidre?
El preciu la sidra subirá pero no por la collecha, al fi nal como too subió’l precio de la manzana, tanto la local, como la de DOP que subió un poco más como la que trayemos de fuera.
