BULEVAR DE LA SIDRA

BULEVAR DE LA SIDRA Una tonelada castañes y mil llitros de sidre’l duernu

L’amagüestu de Gascona torna a lo grande dempués de dos años ensin cellebrase por mor del andanciu y la falta permisu municipal; había bien de ganes de recuperar el tiempu perdíu ¡y bien que se recuperó!

Nun faltó sidre, castañes nin ganes d’esfrutalo. Cientos de presones acudieron al esperáu amagüestu de Gascona, onde yá a primeres hores de la mañana escomenzaron a amagostase les castañes pa teneles en su puntu pal meudíi, con xente faciendo cola media hora enantes de la hora fixada pa entamar. Como davezu, foi esta una fiesta bien participativa y enforma familiar, con xente de toles edaes. Esti añu tamién tevo’l so llau solidariu, porque collaboraron cola asociación Síndrome de Down y Patos Salvajes, siendo estos caberos los que s’encargaron de dir poles castañes, enllenar cucuruchos y cobrar a los veceros. Muncha xente, y perbón ambiente, colos cabezudos y la banda Los Gascones, qu’animaron tovía más un ambiente bien prestosu calecíu poles castañes y la sidre’l duertu. En total siete puestos, onde se vencíen los cucuruchos de castañes acompangaos de la sidre’l duernu.