Kesipargo Yle Sää mist Taan keesi mun lam lamaš Yle Säämist hárjuttâlmist. Fáárust lijjii meiddei nelji eres nuorâ. Mun lijkkojim čuuvtij leđe tobbeen pargoost, tastko jyehi peivi lâi tuođâi-uv ereslágán ko oovdeb já oppim ennuv uđđâ aašijd.
Tekstâ já koveh: Sáárákáisá Seurujärvi
Muu vuosmuš olmâ keikka lii pááccám pyereest mielân. Mun eellim kovvejeijein párnáid tárguttum Harry Potter -teemasii leeirâst sahhiittâlmin párnáid já leirâpargeid. Mun lijjim muuneeld smiettâm, ete taat lii kal hiälpus hommá! Mut hommá ij lamaškin nuuvt älkkee. Sahhiittâllâm já kuvvim ferttij porgâđ siste tondiet ko olgon oorvij. Párnááh lijjii eidu oppâm tiijdâid já tääl sist lâi lope sierâdiđ. Sij huikkii, kaččii já ilodii. Mun smiettim, ete tast ij kale šoodâ mihheen, ko jiem ubâ kuulâ jieččân jurduidgin! Kavnim tobbeen kuittâg kulmâ sárnáás párnáá, mii lâi maailm pyeremus hommá! Sij mainâstii munjin uáli pyereest. Keika maŋa mun ferttejim rähtiđ TV-uđđâs leeirâst sehe mainâs radion já neetin. Tiätturohjelmeh lijjii munjin uđđâseh, jiemge mun lamaš vala hárjánâm porgâđ hirmâd ennuv ohtuu. Loppâloopâst mun mattim puoh já finnejim iše ain ko toos lâi tárbu. Kuittâg ton oho loopâst mun oinim peinijáid pargoaašijn. Luhhoost tagareh peinijááh iä lah puáttám ton maŋa. Mun lam smiettâm tääl taan keesi maŋa, ete must puávtáččij šoddâđ anarâškielâlâš toimâtteijee. Jiem lamaš ovdeláá smiettâm, ete tot ličij muu hommá, mut tääl ko peessim olmânáál keččâliđ maggaar toimâtteijee pargo tuođâi lii, te mun kal kiddiistuvvim. Já anarâškielâliih toimâtteijeeh iä lah ko tuše muádis – ađai lii vaarâ máhđulâš finniđ pargo ton syergist.
18
