Kalsifikashon di arteria

7 | Estilo di bida

Kon ta un bon manera pa mi sòru pa mi kurason?

Manera ya indiká, bo por redusí bo chèns pa haña un malesa kardiako òf vaskular òf riba un siguiente atake di kurason, dor di hasi adaptashonnan na bo estilo di bida. Por prevení 80 porshentu di e problemanan di kurason pa medio di un estilo di bida saludabel! Bon mirá, e ta enserá, dil ku bo faktornan di rísiko. Ya ku serka tur hende por papia di un kombinashon úniko di faktornan di rísiko, e aserkamentu semper ta un plan individual tambe. Pero pa tur hende ku ta huma, lo siguiente ta konta: stòp ku humamentu ta e prioridat di mas importante. Dor di keda sin huma, bo por redusí bo chèns pa haña malesa kardiako i vaskular konsiderablemente. Den mi kaso, e faktornan di rísiko tabata: humamentu, preshon di sanger haltu, kolesteròl un tiki haltu i strès. Despues di mi atake di kurason, mi no a huma nunka mas i bon mirá esaki tabata mas fásil ku mi mes a pensa. For di investigashon a sali na kla tambe ku un atake di kurason ta e motivadó prinsipal pa stòp ku humamentu i pa realmente no hasié nunka mas tampoko. No tabata dje fásil ei pa dil ku e otro faktornan di rísiko. No ta di un dia pa otro bo ta baha bo preshon di sanger i kolesteròl. Mester di un plan pa esaki! I strès... Kon bo ta baha strès den bo bida awor?

Por resumí e aserkamentu ku mi a skohe komo fit-foodfocus-fun (òf F4L). M’a topa e konsepto ‘fit-food-focus’ pa promé biaha den un entrevista ku kardiólogo Janneke Wittekoek, kaminda el a resumí e konsehonan di mas importante pa hende muhé riba tereno di estilo di bida. Huntu ku fun, fit-food-focus ta representá tur loke tin ke ber ku estilo di bida. Den e kapítulo akí lo mi trata e siguiente puntonan mas den detaye: • fit L moveshon; • food L nutrishon; • focus L strès.

Fun ta parti di tur tres i ta sòru pa kosnan keda agradabel tambe. M’a ripará ku mi bida a realmente bira mas agradabel i mihó dor di e adaptashonnan ku mi a hasi den mi estilo di bida!

E promé stap di bo plan F4Lta pa inventarisá bo faktornan di rísiko korektamente. Ata e faktornan di rísiko di estilo di bida pa malesa kardiako i vaskular un biaha mas akí: • humamentu (e faktor di rísiko mayó, spesialmente pa hende muhé); • nutrishon insaludabel; • uzo eksesivo di alkohòl; • insufisiente moveshon di kurpa; • muchu tiki soño; • strès.

Esakinan por kondusí na e siguiente faktornan di rísiko: • preshon di sanger haltu; • nivel di kolesteròl haltu; • sobrepeso.

Preshon haltu

Den kapítulo 3 bo a lesa ku e preshon di sanger ideal ta

120/80 i ku bo tin preshon di sanger haltu si esaki ta mas haltu ku 140/90. Bo sa kon haltu bo preshon di sanger ta? Ta bon pa bo laga midi bo preshon di sanger un òf dos biaha pa aña. Esaki lo mester ta mesun normal ku ora bo ta bai dentista un òf dos biaha pa aña pa kòntròl! T’asina ku bo no ta ripará nada di preshon di sanger haltu i te hasta un tiki preshon di sanger muchu haltu lo por okashoná problema di kurason serka hende muhé. Komo pashènt di kurason, probablemente lo bo haña remedi kontra preshon di sanger haltu. Aparte di esei, pa medio di adaptashon di bo estilo di bida, bo por sòru tambe pa bo preshon di sanger keda mas abou posibel.

E konsehonan di mas importante ta:

• stòp di huma; • baha di peso; • bebe ménos alkohòl; • move mas; • kome ménos salu.

Nivel di kolesteròl haltu

Di un nivel di kolesteròl haltu tampoko lo bo no ripará nada. Lo bo haña sa esaki solamente via di un tèst di sanger. For di e tèst di sanger lo sali un balor pa e kolesteròl total. Huntu ku esei, ta midi e nivel di LDL i esun di HDL: • Pa e kolesteròl total, e balor deseá ta ménos ku 5,0 mmol/l.

E ta hopi haltu si e ta riba 8,0 mmol/l. • Kolesteròl LDL ta e kolesteròl malu. Mas abou esaki ta, mas mihó. Un kolesteròl LDL bou di 3,0 mmol/l generalmente ta bon. • Pa hende ku un rísiko oumentá riba malesa kardiako i vaskular, e balor ideal pa kolesteròl LDL ta ménos: ménos ku 2,6 mmol/l serka hende ku rísiko haltu riba malesa kardiako i vaskular i ménos ku 1,8 mmol/l serka hende ku malesa kardiako i vaskular ku ta mas yòn ku 70 aña. • Kolesteròl HDL ta e bon kolesteròl. E ta yuda eliminá e mal kolesteròl for di sanger. E nivel di HDL mester ta por lo ménos 1,0 mmol/l, pero (serka hende muhé) preferiblemente mas haltu.

Por trata un nivel di kolesteròl haltu ku remedi, p’esei hopi pashènt di kurason ta haña remedi pa baha kolesteròl. Pero bo por baha bo kolesteròl tambe ku adaptashonnan den bo estilo di bida.

E konsehonan di mas importante ta:

• kome salú (ménos vèt saturá); • baha di peso; • move mas.

Sobrepeso

Den kaso di peso, no ta bai solamente pa e kantidat di kilo ku bo ta pisa, pero tambe bo BMI i tamaño di bo barika. BMI (body mass index òf indise di masa di bo kurpa) ta indiká si bo peso ta salú relashoná ku bo largura. Ku peso salú, bo tin ménos chèns riba malesa kardiako i vaskular. Bo ta kalkulá bo BMI dor di dividí bo largura den centimeter dor di bo peso den kilo. Un BMI saludabel ta entre 18,5 i 25. Den kaso di sobrepeso, ta importante pa sa unda e vèt ta. Hopi vèt den kavidat apdominal (barika) ta oumentá e rísiko riba malesa kardiako i vaskular, miéntras hopi vèt rondó di hep i chanchan no tin influensia òf apénas tin influensia riba esaki. P’esei ta bon pa bo midi sirkumferensia di bo sintura, entre e repchi mas abou i parti ariba di bo pèlvis, mas o ménos na altura di bo lombrishi, ku un sinta pa midi. E balor ideal pa grandura di bo barika ta 80 cm òf ménos pa hende muhé i 94 cm òf ménos pa hende hòmber.

Bo plan F4L Ora bo tin bo midínan personal pa preshon di sanger, kolesteròl i peso riba un rei, bo ta traha un lista di e faktornan di rísiko di estilo di bida ku ta konta pa bo i kiko ta loke bo