Nesta unidade descubrirás que...

• O mandamento do amor resume todas as ensinanzas de Xesús.

• A Boa Noticia é mensaxe de amor e salvación.

• O amor a un mesmo é o punto de partida para amar os demais.

• Todos os cristiáns estamos chamados a anunciar a Boa Noticia.

Situaci N De Aprendizaxe

Unha gran familia

A fraternidade comprométenos a construír unha sociedade xusta e solidaria. Así creamos a familia universal.

O amor a Deus

Encontramos esta resposta de Xesús no Evanxeo de San Mateo (Mt 22, 36-39).

«Mestre, cal é o mandamento máis importante da Lei? El respondeulle: –“Amarás o Señor, o teu Deus, con todo o teu corazón, con toda a túa alma e con todo o teu entendemento. Este é o mandamento primeiro e máis grande. O segundo é semellante a el: Amarás o teu próximo coma a ti mesmo».

Axudarache a comprender o relato da Biblia

Imaxina un mundo «Cero amor»: un día espertas e do mundo desapareceu o amor. De súpeto non hai un «Bo día!, que tal?» nin un bico, nin un abrazo. Ninguén sorrí...

É coma se nos tivésemos convertido en estraños. Seguimos realizando a nosa vida cotiá, pero parecemos robots. Ninguén se preocupa por ti ou se interesa polo que queres.

O mundo sen amor é frío e gris. É triste.

As persoas non podemos ser felices se nos falta o amor. É coma se nos roubasen a alma.

• Podes ter todo o poder, ser a persoa máis guapa do mundo, rica, famosa... Pero sen amor non serás feliz.

• Podes ser boa persoa, dar esmola ou loitar contra o cambio climático... Pero sen amor sentirás tristura no teu corazón.

Oíches algunha vez a frase: «Ten un corazón que non lle cabe no peito»? Porque cando amas te sentes tan ben que é coma se se che ensanchase o corazón. E cando recibes amor é coma se che desen ás, sénteste forte e feliz.

O amor de verdade revoluciona por dentro a todas as persoas.

O amor non se ensina, vívese! (Papa Francisco).

1. Escribe no teu caderno unha lista cos beneficios do amor para as persoas.

• Compartide en clase as listas mediante chuvia de ideas e elaborade por consenso unha lista con cinco beneficios do amor. Escríbea no teu caderno para recordala.

2. Expresa a través dunha frase o que significa para ti o relato bíblico de Xoán. Procura que o teu texto sexa bonito e literario.

Unha mensaxe de amor

O mandamento do amor resume todas as ensinanzas de Xesús e o sentido máis profundo da súa vida. O primeiro é amar a Deus con todo o teu corazón, con toda a túa alma e con toda a túa mente, o que significa confiar na súa palabra, vivir como El nos pide e amar como El nos ama.

Xesús conecta o amor a Deus coas persoas, polo que é imposible amar a Deus sen amar os demais e a nós mesmos; é dicir, amar a Deus móvenos a ser persoas respectuosas, xustas e solidarias unhas con outras; a tratarnos con cariño e a buscar sempre o ben común.

O mandamento do amor é:

• A base da Lei de Deus.

• O centro da mensaxe de Xesús.

• A raíz da vida dos cristiáns e do noso compromiso para buscar sempre o ben común.

O mandamento do amor é unha mensaxe de amor universal, dirixido a toda a humanidade; porque o amor é esencial na existencia humana e fomos creados para amar e ser amados.

3. Escribe no teu caderno as respostas: a) Que resume o mandamento do amor? b) A que nos move amar a Deus?

A Boa Noticia

Xesús dedica a súa vida a proclamar a Boa Noticia. A súa mensaxe central é que Deus é o noso Pai e nos ama por riba de todo.

A Boa Noticia é boa porque é unha mensaxe de salvación que trae esperanzas e respostas ás necesidades da xente: libera de todo aquilo que deshumaniza e escraviza; devolve a dignidade aos que a perderon; trae a paz e a xustiza; é alegría e é vida.

A Boa Noticia de Xesús mellora a vida das persoas, e fai do mundo un lugar máis humano e xusto.

Xesús anuncia unha mensaxe de amor chea de experiencias e de vida para toda a humanidade. Non só o expresa con palabras, senón tamén coa súa forma de vivir: acolle a todo o mundo, abraza os máis pequenos, cura os enfermos, come con pecadores, denuncia as inxustizas e está ao lado dos que sofren.

A Boa Noticia de Xesús non é unha teoría que hai que aprenderse de memoria. É un xeito de vivir; é dicir, hai que vivila.

1. Escribe coas túas palabras en que consiste a Boa Noticia de Xesús.

2. Completa no teu caderno as seguintes frases: a) A mensaxe central da Boa Noticia é... b) A Boa Noticia é boa porque... c) A Boa Noticia de Xesús non é...

Unha mensaxe para vivila

Vivir a Boa Noticia de Xesús é:

• Abrir os ollos ao que nos rodea. Coñecer as necesidades, os soños e as preocupacións doutras persoas. O amor achégate aos demais, é como ampliar o campo de visión e descubrir que hai vida máis alá da túa realidade.

• Implicarse coas persoas e o mundo. Mirar a realidade co corazón fai que nada volva ser igual. Non poderás ignorala nin desentenderte dela.

• Abrir o corazón. O amor de Xesús é como poñer un pé na porta do noso corazón para que non nos encerremos en nós mesmos e nos leve a descubrir a Deus en todo o que nos pasa e na xente que nos rodea.

• Realizar accións transformadoras. Amar como nos ensina Xesús móvenos a levar a cabo accións que, por insignificante que nos parezan, transforman sempre a realidade a mellor.

A transformación social mediante accións que levan o amor de Deus a todas as persoas e ofrecen resposta ás súas necesidades é o compromiso da Igrexa. Por esta razón a Igrexa faise presente en hospitais, comedores sociais, pisos de acollida, escolas, roupeiros solidarios, etcétera.

Todos os cristiáns estamos chamados a vivir a Boa Noticia.

3. Escribe accións que coñezas e que realiza a Igrexa para mellorar a vida das persoas e transformar a sociedade.

• Poñede en común estas accións e realizade en clase unha guía sobre os «Recursos da Igrexa».

4. En grupo de catro persoas, analizade situacións próximas do barrio ou a túa localidade con algunha necesidade. Deseñade accións transformadoras que se poidan levar a cabo para mellorar estas situacións.

• Facede unha exposición en clase mediante un mural e dialogade sobre os resultados.