A Pascua, o paso de Xesús

«No primeiro día dos Ácimos os discípulos fóronlle preguntar a Xesús: —Onde queres que che preparemos a cea pascual? —Ide á cidade, á casa de fulano e dicídelle: “O Mestre di: O momento está preto; vou celebrar a Pascua cos meus discípulos na túa casa”. Os discípulos fixeron tal como Xesús lles mandara e prepararon a Pascua». Isto conta o Evanxeo de San Mateo (Mt 26, 17-19).

Celebrar A Pascua

O Domingo de Pascua celebramos a festa máis importante para os cristiáns, que é a Resurrección de Xesús. É o final da Semana Santa, que son os días que conmemoramos a Paixón, Morte e Resurrección de Xesús.

E dá comezo o tempo pascual, que é o período litúrxico no que a Igrexa celebra que Xesús resucitou. Son cincuenta días que rematan coa festa de Pentecoste.

Antes de Xesús, os xudeus celebraban a Pascua. Nesta recordaban a liberación de Exipto da man de Moisés e o seu paso polo mar Vermello cara á liberdade. De feito, Xesús vai a Xerusalén a celebrar a Pascua cos seus discípulos e alí é entregado e crucificado.

Na Pascua, os cristiáns celebramos o paso de Xesús da morte á vida. Xesús vence á morte, a todo o que nos afasta de Deus; e devólvenos a alegría e a esperanza.

1. Comenta e dialoga en clase:

• Como celebras a Semana Santa?

• Participas dos actos relixiosos?

• Celebras a Pascua?