Góðir hlutir gerast hægt Í nóvember á síðasta ári sóttu þrír slökkviliðsmenn fimmtu alþjóðlegu ráðstefnuna um krabbamein á meðal slökkviliðsmanna sem var haldin í Düsseldorf í Þýskalandi. Sú fjórða var haldin á Íslandi 2018 og var ákaflega vel heppnuð. Í Düsseldorf mættu til leiks slökkviliðsmenn og helstu sérfræðingar sem farið hafa fyrir baráttu systursamtaka okkar á Norðurlöndunum, Þýskalandi, Kanada og Ástralíu. Ráðstefnan gaf okkur gott tækifæri til að fara yfir vinnu í hverju landi fyrir sig og stilla saman strengi auk þess að fræðast um helstu ávinninga af vinnu félaga okkar.
Í mars á þessu ári var haldinn fræðslufundur í húsnæði BSRB. Tilefnið var að sjálfsögðu hinn árlegi Mottumars sem notaður hefur verið til að auka vitundarvakningu um krabbamein á meðal karlmanna. Sigurður Þór Elísson kynnti þar þá frábæru vinnu sem unnin hefur verið hjá Slökkviliði Akraness og Hvalfjarðarsveitar. Sigurður Þór og Þráinn Ólafsson fyrrverandi slökkviliðsstjóri eiga mikið hrós skilið, þeir hafa báðir látið sig málefnið varða og unnið mikilvægt forvarnastarf á sínum vinnustað. Á fundinum í mars sl. var frumsýnt nýtt fræðslumyndband frá systursamtökum okkar í Noregi. Búið er að lesa inn á myndbandið íslenskt tal og og setja texta. Það á eftir að nýtast okkur til að viðhalda og efla fræðslu um rétt vinnubrögð slökkviliðsmanna til að lágmarka þá mengun sem þeir verða fyrir. Í apríl sl. var samþykktur nýr kjarasamningur LSS og SNS. Samningurinn gæti markað tímamót fyrir þá miklu vinnu sem við höfum lagt í undanfarin ár. Vilji er fyrir því hjá báðum samningsaðilum að endurskoða tryggingakafla kjarasamningsins í haust. Markmiðið er að starfstengdir sjúkdómar þ.m.t. krabbamein verði hluti af tryggingakaflanum. Mikið safn af gögnum er til og búið er að vinna mikla undirbúningsvinnu sem ætti að nýtast við endurskoðun tryggingakaflans. Við höfum verið svo heppnir að njóta liðsinnis lögfræðistofunnar Fulltingis þar sem Agnar Þór Guðmundsson hæstaréttarlögmaður hefur verið okkur ómetanlegur.
8
Á vakt fyrir Ísland
Auk þess hefur Magnús Smári Smárason formaður LSS unnið mikið og gott starf til þess að aðstoða okkur í baráttunni. Undanfarin ár hefur verið unnið að því fræða slökkviliðsmenn um þá mengun sem þeir verða fyrir í störfum sínum. Einnig um þær forvarnir sem hægt er að viðhafa til að lágmarka þá mengun sem slökkviliðsmenn verða fyrir. Næsta verkefni hlýtur því að vera að tryggja að loftgæði og hollustuhættir á slökkvistöðvum um allt land séu eins og best verður á kosið og að slökkvistöðvar séu útbúnar í samræmi við nútíma kröfur slökkviliðsmanna. Hrein og skítug svæði á slökkviliðsstöðvum skipta miklu máli. Aðstaða og búnaður verður að vera til staðar til þess að þrífa allan mengaðan búnað á þann hátt að starfsfólk verði fyrir sem minnstri mengun við vinnu sína. Auk þess þarf útsog að vera til staðar á allar bifreiðar. Það er alveg ljóst að víða vantar talsvert upp á að aðbúnaður sé í lagi. Heilsa slökkviliðsmanna verður alltaf að hafa forgang hjá eigendum slökkviliða.
„Góðir hlutir gerast hægt“. Þannig er staðan í baráttu okkar fyrir því að krabbamein sem slökkviliðsmenn eru útsettari fyrir en aðrir séu viðurkennd sem atvinnusjúkdómur. Þó að hægt gangi þá erum við að alltaf að ýta þessu mikilvæga hagsmunamáli okkar áfram. Vonandi sjáum við árangur á næstu mánuðum. Munum að vinnan byrjar hjá okkur! Hugum að þeim þáttum sem við getum haft áhrif á. Ef við hugsum um heilsu okkar og aðbúnað þá er auðveldara að setja pressu á að vinnuveitandinn standi sig jafn vel og við. Að lokum viljum við minna á að hægt er að styrkja krabbameinssjóð LSS með kaupum á bolum, pinnum, bindisnælum og derhúfum. Þessar vörur eru til sölu á skrifstofu LSS. Bjarni Ingimarsson formaður krabbameinsnefndar LSS og aðstoðarvarðstjóri hjá SHS Borgar Valgeirsson slökkviliðs- og sjúkraflutningamaður hjá SHS
