32
IM LEABHARLANN DOM
An Tearmann Alex Hijmans Cois Life, 2016 Praghas €12 Léirmheas le: Tomás Ó Ceallaigh
Is tuairim sheanchaite ag scolairí na Gaeilge í nach ann don éagsúlacht théamúil i litríocht na Gaeilge trí chéile – tá na téamaí agus na mórcheisteanna
Timire Summer 2017.indd 32
a ndéantar plé orthu cúng go maith. Tá an náisiúnachas agus ceisteanna faoi chúrsaí reiligiúin go mór chun tosaigh sa bhfichiú haois agus má théann muid níos faide siar tá tús áite tugtha d’olagón fada faoi threascairt an tsean-oird Ghaelaigh agus tá caoineadh fada ann leis, maidir leis an droch-staid atá buailte ar lucht léinn. Mar sin is féidir a rá cinnte gur guth úrnua é guth Alex Hijmans, scríbhneoir a d’fhoghlaim an Ghaeilge go paiteanta agus fear ar ndóigh arb as an Ísiltír é ó dhúchas. San úrscéal spleodrach An Tearmann tarlaíonn an t-aicsean sa mBrasaíl – tá muid chomh fada is a d’fhéadfadh muid a bheith ó chladaigh Chonamara nó fiú áit ar bith in Éirinn – is sa dufair na mílte míle i gcéin atá muid agus nach cur chuige breá, friseáilte é sin le haghaidh úrsceál Gaeilge? Is gníomhaí óg cearta daonna é an príomhcharachtar agus tá sé sa mBrasaíl le haghaidh taighde a dhéanamh ar an gcoimhlint idir treibh bhundhúchasach agus úinéirí talún. Is eiseamláir é de na mílte duine óg idéalach in Éirinn, daoine a bhfuil fonn orthu a gcuid fuinnimh a chaitheamh chun maitheas éigin a chur i gcrích sa domhan. Ropann an scéal ar aghaidh go mear agus ní haon áibhéil é a rá go slogtar an léitheoir isteach sa reacaireacht go hiomlán go dtí deireadh an scéil, nuair a bhriseann alltacht agus sceon amach. Ní sceithfidh an scríbhneoir seo tada!
08/05/2017 12:50
