NUWE RYGOED
BAIC B40 PLUS
Veldryvoertuie is duur, veral as jy nuut koop. Cyril Klopper ontdek dat China die beste eienskappe van ander motors in een pakket saamvat – en dit teen ’n mededingende prys aanbied.
28 | Desember 2021-Januarie 2022 Weg! Ry & Sleep
D
ie Chinese motorvervaardiger BAIC (uitgespreek nes die Engelse woord “bike”) – of dan Beijing Automotive Industry Holding Co – het op 13 Oktober die B40 PLUS, ’n kompakte sportnuts, naby Hartbeespoort bekend gestel. Die B40 PLUS, in ander lande ook bekend as die BJ40, word sedert 2013 vervaardig deur dié motormaatskappy wat in staatsbesit is, maar het nou eers sy pad na Suid-Afrika gevind. Ons kan net raai hoe ontevrede Jeep met BAIC moet wees, omdat die B40 PLUS skaamteloos by die Wrangler steel, veral wat betref die stilering van die bakpanele. Daar is egter geen salf te smeer aan Jeep se vermoedelike griewe nie, omdat BAIC en Jeep in ’n stadium aangetroude familie was nadat DaimlerChrysler en BAIC saam in die kooi geklim het – die familiestamboom is egter té ingewikkeld om hier te verduidelik. Kortom: Die BAIC B40 PLUS herinner buitelangs aan ’n Wrangler,
die binneruim is pure MercedesBenz, en sy enjin kom uit ’n ou Saab, van alle dinge. Later meer daaroor.
Wat het ons hier? Die BAIC B40 PLUS is ’n veldryvoertuig met vier passasiersdeure en deeltydse viertrek met ’n agterste ewenaarslot en laestrektratte. Hy het onafhanklike voorvering met kronkelvere en ’n vaste agteras, ook met kronkelvere. Die 2 ℓ-enjin, die B201R, is oorspronklik in 1981 deur die Sweedse motorvervaardiger Saab ontwikkel, en BAIC het die tegnologie in 2009 by General Motors, in daardie stadium Saab se eienaar, gekoop en verder ontwikkel. Ons sê mos die stamboom is ingewikkeld! BAIC se enjin is beskikbaar in petrol óf diesel en lewer onderskeidelik 160 kW en 110 kW – aansienlik meer as toe dié meultjie destyds onder die Saab 90 (107 kW) se enjinkap vasgebout was. Die B40 PLUS is beskikbaar in
