Over 100 nye Kværnermedarbeidarar på Stord TEKST OG FOTO ODD NAUSTDAL
For første gong sidan 2014 har Kværner på Stord auka talet medarbeidarar. Kring 100 personar er tilsett i løpet av året.
HR-leiar Holger Iversen fortel at Kværner har vore i ein rekrutteringsfase det meste av året, både på operatør- og funksjonærstillingar. – Me gjennomførte i vår ein omfattande GAP-analyse for å finna ut kva behov me hadde innanfor eksisterande prosjekt. Det avdekka eit behov for nærmare 40 funksjonærstillingar, som me no har tilsett, seier Iversen. Det vart også gjennomført ein GAP-analyse på operatørområdet. – Me har så langt tilsett 31 nye fagarbeidarar, men eg reknar med at me før året er omme har tilsett kring 40. I tillegg har me tatt inn 30 lærlingar, seier Iversen.
Holger Iversen er HP-leiar hos Kværner på Stord.
Det kom inn mange søknader, spesielt til funksjonærstillingane. Iversen fortel at personal avdelinga allereie før sommaren hadde mottatt over 1000 søknader til desse 40 stillingane. I tillegg kom det inn nærmare 300 søknader til operatørstillingane og 250 søkjarar til lærlingplassane.
– Me har fått stort sett det me treng. Kapasitetsmessig er me nokolunde der me skal vera, i alle fall på funksjonærsida. Det vil truleg bli nokre fleire tilsetjingar på operatørområdet, for å oppretthalda kapasiteten. I tillegg kan det sjølvsagt bli aktuelt med ein og annan spesialiststilling, men den store rekrutteringskampanjen er me ferdige med i denne omgang, seier Iversen.
Iversen er tilfreds med at Kværner ser ut til å vera ein attraktiv arbeidsplass.
Kværner på Stord hadde i tillegg inne nærare 100 sommarvikarar dette året. •
40
SYSTEMPOSTEN
