FÜR DIE CHURZE | KOPERNIKUS
Ds Meer!
Gschicht Lorenz Pauli, Zeichnig Daniel Müller
Wasser isch wichtig … i mym Wasserschäli. Aber meh Wasser isch zvil Wasser. D Frou Bill isch ir Badwanne gläge. Die macht das freiwillig. I gloub, i sött ihre mal biibringe, wie dass me sech richtig putzt. D Frou Bill chönnt vo ihrem Kater no so vil lehre. D Frou Bill isch also ir Badwanne gläge u het es Heftli aagluegt. So Wärbig für Reise. Si het gsüfzget: «Ds Meer! Das hani scho lang nümme gseh. Kater, da bisch o chli du tschuld.» I bi usse ar Wanne ghocket u bi usgwiche, wo si mi mit der nasse Hand het wölle strychle. Für was söll ds Meer guet sy? Das isch ja no meh Wasser als ire Badwanne! Guet: Chli Meer mues me wahrschiinlech ertrage, we me wott Fisch ässe. Aber süsch chönnt me vo mir uus däm ganze Meer der Stöpsel usezieh u ds Wasser eifach ablah. Das het itz d Frou Bill mitem Badwasser o ändlech gmacht. Wo si troche isch gsi, isch si ggange. Auso d Frou Bill. Nid d Badwanne. Ds Heftli isch geng no bir Badwanne gläge. I ha mi aagschliche, bi drufgumpet u has mit de Chralle i Fätze grisse. Tschüss, Meer. Ir lääre Badwanne hani us de Fätze Fötzeli grupft. Us de Fötzeli hani Konfetti gmacht u uf de Konfetti bini dür d Badwanne gschlittlet. Deheime öppis mache isch doch eifach super. Aber de bini nachdänklech worde: Cha d Frou Bill würklech wäge mir nid ads Meer? Bini würklech tschuld? I finges ja scho besser, we si hie bi mir blybt. Aber vilech cha si mii ja mitnäh ads Meer. I müesst mi eifach vorhär a das vile Wasser gwane. Also guet: I probiere mal, ob i mi mitem Wasser chönnt aafründe. I ha bir Badwanne ds Wasser aagla. Das isch nid schwär gsi. Zack! Hebel ufe. Nächär bini ufe Stöpsel ghocket. O ganz eifach. Scho gli hani es nasses Füdli gha. Komisch … Nid schön... Schlimm... Ganz, ganz schlimm … I bi ufgstande. Bi aber muetig im Wasser blybe sta. Bis my Buuch isch nass worde. Das isch zvil gsi. I ha mi gschüttlet, bi aber wägem Schüttle usgrütscht u – PFLATSCH – ganz nass gsi. Logisch, dass i mi ufem Bett vor Frou Bill bi ga tröchne. Dert hets Sunne gha. U woni bi erwachet, hani z Gfüeu gha, da syg öppis nid so guet. Es het komisch plätscheret. D Bitze vom Ferieproschpäkt hei der Überlouf vo der Badwanne verstopft. Ds Wasser isch übere Badwannerand a Bode use gloffe. Heldehaft bini über d Wanne ggumpet für ds Wasser abzstelle, ha aber nid der richtig Hebel verwütscht u itz het d Dusche afa bruuse. Uf mii abe! Das het mi so erchlüpft. I bi dervo wie ne Rageete, ha
derby der Duscheschluuch abegrisse u d Bruuse isch näbe der Wanne a Bode gheit. Dert het si wyter vor sech häre grägnet. So fescht, dass i eifach usem Badzimmer ha use müesse. Irgend einisch isches o am heldehafte Kater Kopernikus z vil. I ha mi uf ds Sofa grettet u mi troche gschläcket. Hie ufem Sofa bini sicher gsi vorem Wasser. Das het sech ja sowieso nume langsam im Wohnzimmer usbreitet, u der Teppich het rächt vil möge ufsuge. U der under Teil vom Sofa isch us Holz. Das cha sicher schwümme. Die Sicherheit u das Plätschere sy so beruhigend gsi, dass i mi ha zäme gröllelet. Irgendeinisch isch d Wohnigstüre ufgange. Ds Wasser isch i Bewegig cho u isch ids Stägehuus use gschwappt. D Frou Bill isch heicho. Hinger ihre d Nachbarin vo unde dranne. Bi ihre heigs vo der Dili tropfet, het si vorwurfsvoll gseit. Die het gloub o nid gärn Wasser, fasch wien ig. Aber o d Frou Bill het ke Fröid gha. Eigentlech het si doch ads Meer wölle. Aber we ds Meer zu ihre chunnt, isches o wider nid rächt. Immer bin ig tschuld.
Dr Lorenz Pauli isch Chindergärtner, Chinderbuechoutor, Verleger und Verzeuer. www.mupf.ch Dr Daniel Müller zeichnet regumässig für verschiedeni Zytschrifte und Buechverläg wie z.B. d Globibüecher. www.illumueller.ch
