6
ENTREVISTA
VÍCTOR FONTÁN CRIADOR DA RAZA GALIÑA DE MOS
“A XENTE TEN MÁIS GANAS DE COMPRAR CA OUTROS ANOS E, EN XERAL, VÉN BUSCANDO CALIDADE” Outro dos criadores de Galiña de Mos co que falamos no transcurso da Semana Verde foi Víctor Fontán, propietario de A Granxa de Lola, situada en Arnois, no concello pontevedrés da Estrada. Víctor é xa un experimentado neste salón agroalimentario, pois leva acudindo con regularidade a Silleda dende hai oito anos.
Cando comezastes coa cría de Galiña de Mos e cantos animais tedes na actualidade? Empezamos a criar esta raza autóctona no ano 2014 máis ou menos e hoxe en día temos ao redor de trescentos animais en total (machos, femias e cría). Como xurdiu este proxecto? A explotación colleuna o meu sogro con dúas pitas; á miña muller e mais a min gustounos a actividade e empezamos a ter unhas cantas máis e agora pois estamos traballando ben. Autóctonas Galegas Número 14
Como é a cría destes animais? O día a día é moi complicado, porque é un animal que crece moi lento, que se fai en tres, catro e ata cinco meses e, no caso do macho, ata os dez meses non se mata, entón temos aí un período de tempo moi grande no que poden pasar moitas cousas, aínda que polo resto é moi forte. É un animal que non precisa estar encerrado; de feito, se o encerras sofre máis e é aí onde vén o perigo: pícanse os uns aos outros, danse casos de canibalismo, non comen ben e veñen as enfermidades. Porén, a Galiña de Mos soporta moi
ben as inclemencias meteorolóxicas, a choiva, o vento… No noso caso, á parte da cría desta raza, tamén temos horta, o que nos permite facer un circuíto entre ambas as actividades; o que non vendes porque está algo tocado vai para eles. Digamos que nos autoabastecemos e, nestes tempos que corren que está todo moi caro, é a única solución que hai. Que produtos vendedes? Vendemos galo e galiña para carne, galiña e pitos pequenos para vida e ovos. O noso produto estrela é o ovo.
