23
KIELÂPIERVÂLEH
Anarâškielâ servi oovded kielâpiervâltooimâ kielâtorjuu falâmáin.
ANARŠ-LOST JÁ LOOSTŠ
Anarâš-lostâ almostuvá ive 2022 ääigi kulmii, já niäljádin numerin lii Anarâš-kalender. Ive 2023 kalender fáddán láá aalmuglâšmuseost Siidan macâttum tiiŋgah. Loostâš-digilostâ almostuvá ive 2022 ääigi neljii. Ruttâ tai numerij várás lii uuccum Sämitiggeest, já lostâtooimân kiävttojeh meiddei seervi jieijâs ruuđah. Anarâš-loostâ já Lostii tooimât Fabrizio Brecciaroli, já tuáijimist västid Susanna Kaartinen.
KIRJETOIMÂ
Servi jurgâl já almostit vuosâsajasávt nuorâikirjálâšvuođâ, tastko nuorâi tuárjumân ij lah kiddejum tuárvi huámášume kielâiäláskittemtooimâst. Fáárust lii meid tihtâantologia, mii almostuvá ive 2022 loopâ räi.
Servi viggá almostittiđ ruttâtile mield čuávuváid kiirjijd: 1) Jeff Kinney: Neropatin päiväkirja: Viimeinen oljenkorsi 2) Katarina von Bredow: Liian iso rakkaus 3) Jeff Kinney: Neropatin päiväkirja: Kovan onnen kesä 4) Timo Parvela: Ella ja kaverit 3 5) André Kuipers: 3, 2, 1 Go! 6) Ann-Helén Laestadius: Dušše bijadit
Ive 2022 aalgâst seervist láá jo almostum čuávuvááh kirjeh: 1) Márjá-Liisá Olthuis: Masa jo Mánudást 2) Jeff Kinney: Neropatin päiväkirja: Isoveli isottelee Eres jurgâlum kiirjijd kalga tärhistiđ kielâlávt, já toh almostuveh máhđulávt iivij 2023–2024.
TUTKÂMJUÁVKKU
Fabrizio Brecciaroli parga tutkâmjuávhust 100 čälled -projektist ive 2022. Kielâteknologiatutkâmuš juátkoo máhđulâšvuođâi já ruttâtile mield.
NUORÂI TOIMÂ
Wikipedia-pargo juátkoo ive 2022. Servi fáálá kesipargo Wikipedia-čällen neelji nuorân, kiäh pargeh ohtsis 540 tijmed. Vaastâolmožin já nuorâi stivrejeijen tuáimá Fabrizio Brecciaroli.
ANARŠ EHIDEH
Anarâškielâ servi olášut ive 2022 anarâš ehidijd oovtâst Säämi máttááttâskuávdáin. Anarâš ehideh láá suullân ohtii teikâ kuohtii mánuppaajeest. Eehid ääigi puáhtá leđe miinii teemaid teikkâ tot puáhtá leđe tuše rijjâ savâstâllâm já káhvástâllâm.
STIPENDEH / PALHŠUMEH
Servi juáhá kiđđuv 2022 stipendijd já/teikâ kirjepalhâšuumijd škoovlâi já oppâlágádâsâi anarâškielâ uáppeid.
